ਰਾਜਿੰਦਰ ਮਰਾਹੜ
ਭਗਤਾ ਭਾਈ, 14 ਜਨਵਰੀ
‘ਪੰਜਾਬ ਦੀ ਮੌਜੂਦਾ ਬਦਤਰ ਰਾਜਨੀਤਕ, ਸਮਾਜਿਕ ਅਤੇ ਆਰਥਿਕ ਹਾਲਤ ਲਈ ਸੂਬੇ ਦੇ ਭ੍ਰਿਸ਼ਟ, ਖੁਦਗਰਜ਼ ਅਤੇ ਪਰਿਵਾਰ ਪਾਲੂ ਬਿਰਤੀ ਦੇ ਮਾਲਕ ਤੇ ਆਗੂ ਸਿੱਧੇ ਤੌਰ ’ਤੇ ਜ਼ਿੰਮੇਵਾਰ ਹਨ।’ ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਪੀਪਲਜ਼ ਪਾਰਟੀ ਆਫ ਪੰਜਾਬ ਦੇ ਪ੍ਰਧਾਨ ਮਨਪ੍ਰੀਤ ਸਿੰਘ ਬਾਦਲ ਨੇ ਭਗਤਾ ਭਾਈ ਵਿਖੇ (ਹਲਕਾ ਰਾਮਪੁਰਾ ਫੂਲ) ਤੋਂ ਸਾਂਝੇ ਮੋਰਚੇ ਦੇ ਉਮੀਦਵਾਰ ਲਖਵੀਰ ਸਿੰਘ ਲੱਖਾ ਸਿਧਾਨਾ ਦੇ ਹੱਕ ਵਿਚ ਭਰਵੀਂ ਚੋਣ  ਰੈਲੀ ਨੂੰ ਸੰਬੋਧਨ ਕਰਦਿਆਂ ਕੀਤਾ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਸਿਆਸੀ ਆਗੂਆਂ ਕੋਲ ਸੂਬੇ ਦੇ ਸੁਨਹਿਰੀ ਭਵਿੱਖ ਲਈ ਕੋਈ ਸਿਆਸੀ ਏਜੰਡਾ ਨਹੀਂ ਜਦਕਿ ਸਾਂਝਾ ਮੋਰਚਾ ਉਸਾਰੂ ਸੋਚ ਅਤੇ ਸਾਫ ਨੀਅਤ ਲੈ ਕੇ ਪੰਜਾਬ ਦੀ ਤਕਦੀਰ ਬਦਲਣ ਲਈ ਅੱਗੇ ਆਇਆ ਹੈ।
ਉਨ੍ਹਾਂ ਕਿਹਾ ਕਿ ਜੇਕਰ ਪੰਜਾਬ ਵਾਸੀਆਂ ਨੇ ਸਾਂਝੇ ਮੋਰਚੇ ਨੂੰ ਸਰਕਾਰ ਬਣਾਉਣ ਦਾ ਮੌਕਾ ਦਿੱਤਾ ਤਾਂ ਸੂਬੇ ਵਿਚ ਆਉਣ ਵਾਲੀ ਪੀੜ੍ਹੀ ਦਾ ਭਵਿੱਖ ਸੁਆਰਨ ਲਈ ਵੱਖ-ਵੱਖ ਸਰਕਾਰੀ ਵਿਭਾਗਾਂ ਵਿਚ ਫਜ਼ੂਲ ਖਰਚੀ ’ਤੇ ਰੋਕ ਲਗਾਈ ਜਾਵੇਗੀ। ਸ੍ਰੀ ਬਾਦਲ ਨੇ ਦੋਸ਼ ਲਗਾਇਆ ਕਿ ਪਿਛਲੇ 64 ਸਾਲਾਂ ਤੋਂ ਰਾਜਭਾਗ ਦਾ ਆਨੰਦ ਮਾਣ ਰਹੇ ਅਕਾਲੀ ਅਤੇ ਕਾਂਗਰਸੀਆਂ ਨੇ ਲੋਕਾਂ ਦੇ ਬੁਨਿਆਦੀ ਮਸਲਿਆਂ ਵੱਲ ਕੋਈ ਧਿਆਨ ਨਹੀਂ ਦਿੱਤਾ ਜਿਸ ਕਾਰਨ ਉਹ ਬਦਤਰ ਜ਼ਿੰਦਗੀ ਜਿਉਣ ਲਈ ਮਜਬੂਰ ਹਨ। ਉਨ੍ਹਾਂ ਕਿਹਾ ਕਿ ਸਾਂਝਾ ਮੋਰਚਾ ਖੁਸ਼ਹਾਲ ਪੰਜਾਬ ਦੀ ਸਿਰਜਨਾ ਲਈ ਵਚਨਬੱਧ ਹੈ, ਇਸ ਲਈ ਨੌਜਵਾਨ ਪੀੜ੍ਹੀ ਦਾ ਭਵਿੱਖ ਸੰਵਾਰਨ ਲਈ ਪਾਰਟੀਬਾਜ਼ੀ ਅਤੇ ਛੋਟੇ ਮਤਭੇਦਾਂ ਤੋਂ ਉਪਰ ਉੱਠ ਕੇ ਸਾਂਝੇ ਮੋਰਚੇ ਨੂੰ ਸੱਤਾ ਵਿਚ ਲਿਆਂਦਾ ਜਾਵੇ।
ਇਸ ਮੌਕੇ ਕਾਮਰੇਡ ਬਲਕਰਨ ਸਿੰਘ  ਬਰਾੜ, ਗੁਰਚਰਨ ਸਿੰਘ ਭਗਤਾ ਅਤੇ ਗੁਰਦੇਵ ਸਿੰਘ ਦਿਆਲਪੁਰਾ ਨੇ ਵੋਟਰਾਂ ਨੂੰ ਸਾਂਝੇ ਮੋਰਚੇ ਦੇ ਉਮੀਦਵਾਰ ਲੱਖਾ ਸਿਧਾਨਾ ਨੂੰ ਕਾਮਯਾਬ ਕਰਨ ਲਈ ਅਪੀਲ ਕੀਤੀ। ਉਮੀਦਵਾਰ ਲੱਖਾ ਸਿਧਾਨਾ ਨੇ ਮਨਪ੍ਰੀਤ ਸਿੰਘ ਬਾਦਲ ਦਾ ਹਲਕੇ ਵਿਚ ਪਹੁੰਚਣ ’ਤੇ ਧੰਨਵਾਦ ਕਰਦਿਆਂ ਵੋਟਰਾਂ ਤੋਂ ਸਹਿਯੋਗ ਦੀ ਮੰਗ ਕੀਤੀ। ਇਸ ਮੌਕੇ ਸੁਖਦੇਵ ਸਿੰਘ ਮਲੂਕਾ, ਮਹਾਂ ਸਿੰਘ ਦਿਆਲਪੁਰਾ, ਜਸਵੀਰ ਸਿੰਘ ਕੋਠਾ ਗੁਰੂ, ਅਮਨਾ ਸਿਧਾਨ, ਗੁਰਤੇਜ ਸਿੰਘ ਕੋਠਾ ਗੁਰੂ, ਜੱਗੀ ਸ਼ਰਮਾ, ਗੁਰਜੀਤ ਸਿੰਘ ਗੁੰਮਟੀ, ਟੀਟੂ ਸਰਦਾਰ, ਅਵਤਾਰ ਸਿੰਘ, ਬਲਦੇਵ ਸਿੰਘ ਭਗਤਾ ਹਾਜ਼ਰ ਸਨ।