ਨਿਊਯਾਰਕ, 31 ਮਈ
ਅਮਰੀਕਾ ਵਿਚ ਨਿਊਯਾਰਕ ਸਿਟੀ ਟਰਾਂਜ਼ਿਟ ਅਥਾਰਟੀ (ਐਨ.ਵਾਈ.ਸੀ. ਟੀ.ਏ.) ਦੇ ਸਿੱਖ ਤੇ ਮੁਸਲਮਾਨ ਕਰਮਚਾਰੀ ਹੁਣ ਪਗੜੀ ਤੇ ਟੋਪੀ ਬਗੈਰ ਸਰਕਾਰੀ ਏਜੰਸੀ ਦਾ ਲੋਗੋ ਲਗਾਏ ਪਹਿਨ ਸਕਣਗੇ।  9/11 ਦੇ ਅਤਿਵਾਦੀ ਹਮਲੇ ਮਗਰੋਂ ਨਵੇਂ ਵਰਦੀ ਨਿਯਮ ਲਾਗੂ ਹੋਣ ਮਗਰੋਂ ਕਰਮਚਾਰੀਆਂ ਲਈ ਇਹ ਵੱਡੀ ਕਾਨੂੰਨੀ ਜਿੱਤ ਹੈ।
ਅਮਰੀਕੀ ਨਿਆਂ ਮੰਤਰਾਲੇ ਨੇ ਕੱਲ੍ਹ ਐਨ.ਵਾਈ.ਸੀ.ਟੀ.ਏ. ਨਾਲ ਸਮਝੌਤਾ ਕੀਤਾ। ਇਹ ਸਮਝੌਤਾ ਮੰਤਰਾਲੇ ਵੱਲੋਂ ਸਤੰਬਰ 2004 ਵਿਚ ਪੂਰਬੀ ਨਿਊਯਾਰਕ ਜ਼ਿਲ੍ਹੇ ਦੀ ਅਮਰੀਕੀ ਜ਼ਿਲ੍ਹਾ ਅਦਾਲਤ ਵਿਚ ਇਹ ਸ਼ਿਕਾਇਤ ਦਰਜ ਕਰਾਉਣ ਮਗਰੋਂ ਹੋਇਆ ਹੈ ਜਿਸ ਵਿਚ ਉਸ ਨੇ ਐਨ.ਵਾਈ.ਸੀ.ਟੀ.ਏ. ਉਪਰ ਦੋਸ਼ ਲਗਾਇਆ ਸੀ ਕਿ ਉਹ ਧਾਰਮਿਕ ਭੇਦਭਾਵ ਕਰ ਰਿਹਾ ਹੈ। ਇਸ ਸਮਝੌਤੇ ਤਹਿਤ ਐਨ.ਵਾਈ.ਸੀ.ਟੀ.ਏ. ਨੂੰ ਨਵੀਂ ਵਰਦੀ ਪਗੜੀ ਨੀਤੀ ਨੂੰ ਮਨਜ਼ੂਰੀ ਦੇਣੀ ਹੋਵੇਗੀ ਜਿਸ ਤਹਿਤ ਜਨਤਕ ਸੰਪਰਕ ਅਹੁਦਿਆਂ, ਜਿਵੇਂ ਬੱਸ ਤੇ ਅੰਡਰ-ਗਰਾਊਂਡ ਟਰੇਨ ਸੇਵਾ ਦੇ ਕਰਮਚਾਰੀਆਂ ਨੂੰ ਮੈਟਰੋਪੋਲਿਟਨ ਟਰਾਂਜ਼ਿਟ ਅਥਾਰਟੀ (ਐਮ.ਟੀ.ਏ.) ਦਾ ਲੋਗੋ ਲਗਾਏ ਬਗੈਰ ਹੀ ਖਿਮਾਰਸ, ਪਗੜੀ, ਕੁਯੀਸ, ਟੋਪੀ, ਸਾਫਾ ਤੇ ਸਕਾਰਫ ਪਾਉਣ ਦੀ ਇਜਾਜ਼ਤ ਹੋਵੇਗੀ। ਐਮ.ਟੀ.ਏ. ਰੇਲ ਤੇ ਬੱਸ ਅਪਰੇਟਰ ਐਨ.ਵਾਈ.ਸੀ.ਟੀ.ਏ. ਦੀ ਮੂਲ ਏਜੰਸੀ ਹੈ।
ਐਨ.ਵਾਈ.ਸੀ.ਟੀ.ਏ. ਇਸ ਦੇ ਨਾਲ ਹੀ ਆਪਣੇ ਅੱਠ ਮੌਜੂਦਾ ਤੇ ਸਾਬਕਾ ਕਰਮਚਾਰੀਆਂ ਨੂੰ 18,4500 ਡਾਲਰ ਦਾ ਭੁਗਤਾਨ ਕਰੇਗਾ। ਇਸ ਵਿਚ ਕੁਝ ਸਿੱਖ ਤੇ ਮੁਸਲਮਾਨ ਹਨ ਜਿਨ੍ਹਾਂ ਨੇ ਕਥਿਤ ਤੌਰ ’ਤੇ ਰੁਜ਼ਗਾਰ ਵਿਚ ਭੇਦਭਾਵ ਦੇ ਦੋਸ਼ ਲਗਾਏ।
ਇਹ ਸਮਝੌਤਾ ਸਿੱਖ ਐਮ.ਟੀ.ਏ. ਕਰਮਚਾਰੀਆਂ ਨੂੰ ਪਗੜੀ ਪਹਿਨਣ ਦੀ ਇਜਾਜ਼ਤ ਦੇਵੇਗੀ, ਜੇਕਰ ਉਨ੍ਹਾਂ ਦੀ ਪਗੜੀ ਉਨ੍ਹਾਂ ਦੀ ਨੀਲੇ ਰੰਗ ਦੀ ਵਰਦੀ ਦੇ ਰੰਗ ਦੀ ਹੋਵੇ। ਇਸ ਸਮਝੌਤੇ ਤਹਿਤ ਐਮ.ਟੀ.ਏ. ਨਵੀਂ ਨੀਤੀ ਤਹਿਤ ਟਰੇਨਿੰਗ ਦੇਵੇਗਾ।
ਸਿਵਲ ਰਾਈਟਸ ਡਿਵੀਜ਼ਨ ਦੇ ਅਟਾਰਨੀ ਜਨਰਲ ਥਾਮਸ ਪੇਰੇਜੇ ਨੇ ਇਕ ਬਿਆਨ ਵਿਚ ਕਿਹਾ, ‘‘ਇਹ ਸਮਝੌਤਾ ਸਪਸ਼ਟ ਸੰਦੇਸ਼ ਹੈ ਕਿ ਨਿਆਂ ਮੰਤਰਾਲਾ ਧਾਰਮਿਕ ਆਧਾਰ ਉਪਰ ਭੇਦਭਾਵ ਬਰਦਾਸ਼ਤ ਨਹੀਂ ਕਰੇਗਾ।’’
ਇਸ ਦੌਰਾਨ ਸਿੱਖ ਕੁਲੀਸ਼ਨ ਨਾਮ ਦੀ ਜਥੇਬੰਦੀ ਨੇ ਇਸ ਫੈਸਲੇ ਦਾ ਸੁਆਗਤ ਕੀਤਾ ਹੈ। ਕੁਲੀਸ਼ਨ ਦੇ ਪ੍ਰੋਗਰਾਮ ਡਾਇਰੈਕਟਰ ਅਮਰਦੀਪ ਸਿੰਘ ਨੇ ਕਿਹਾ, ‘‘ਅਸੀਂ ਖੁਸ਼ ਹਾਂ ਕਿ ਇਕ ਮਾੜਾ ਅਧਿਆਇ ਸਮਾਪਤ ਹੋ ਗਿਆ ਹੈ।  9/11 ਮਗਰੋਂ ਬੇਕਸੂਰ ਸਿੱਖਾਂ ਤੇ ਮੁਸਲਮਾਨਾਂ ਨੂੰ ਐਵੇਂ ਹੀ ਸਜ਼ਾ ਦਿੱਤੀ ਜਾ ਰਹੀ ਸੀ।’’
 -ਪੀ.ਟੀ.ਆਈ.