ਨਵੀਂ ਦਿੱਲੀ, 27 ਮਈ
ਕੇਂਦਰੀ ਖੇਡ ਮੰਤਰੀ ਅਜੇ ਮਾਕਨ ਨੇ ਅੱਜ ਕਿਹਾ ਹੈ ਕਿ ਭਾਰਤੀ ‘ਦਰੋਣਾਚਾਰੀਆ’ ਨੂੰ ਕੋਚਿੰਗ ਦੇ ਮਾਮਲੇ ’ਚ ਵਿਦੇਸ਼ੀ ਕੋਚਾਂ ਨਾਲੋਂ ਬਿਹਤਰ ਬਣਨਾ ਪਵੇਗਾ ਤਾਂ ਹੀ ਉਹ ਦੇਸ਼ ਨੂੰ ਕੌਮਾਂਤਰੀ ਪੱਧਰ ’ਤੇ ਤਮਗੇ ਜਿੱਤਣ ਵਾਲੇ ਖਿਡਾਰੀ ਦੇ ਸਕਣਗੇ।
ਇੱਥੇ ਐਸੋਸੀਏਸ਼ਨ ਆਫ ਦਰੋਣਾਚਾਰੀਆ ਐਵਾਰਡੀ ਦੇ ਛੇਵੇਂ ਸਮਾਰੋਹ ਨੂੰ ਸੰਬੋਧਨ ਕਰਦਿਆਂ ਸ੍ਰੀ ਮਾਕਨ ਨੇ ਕਿਹਾ ਕਿ ਭਾਰਤੀ ਕੋਚਿੰਗ ਸਿਸਟਮ ਦੂਜੇ ਦੇਸ਼ਾਂ ਦੇ ਮੁਕਾਬਲੇ ਪਛੜਿਆ ਹੋਇਆ ਹੈ ਤੇ ਇਹ ਹੁਣ ਤਕ ਇਕ ਹੀ ਸੇਧ ’ਚ ਚੱਲ  ਰਿਹਾ ਹੈ ਜਦੋਂ ਕਿ ਇਸ ’ਚ ਅਹਿਮ ਸੁਧਾਰ ਲਿਆਉਣ ਤੇ ਇਸ ਨੂੰ ਵਿਦੇਸ਼ੀ ਕੋਚਾਂ ਦੀ ਬਰਾਬਰੀ ’ਤੇ ਪਹੁੰਚਾਉਣ ਦੀ ਜ਼ਰੂਰਤ ਹੈ। ਇਸ ਮੌਕੇ ਖੇਡ ਮੰਤਰੀ ਨੇ ਕਿਹਾ ਕਿ ਉਨ੍ਹਾਂ ਚੀਨ ਤੇ ਕਿਊਬਾ ਵਰਗੇ ਕਈ ਦੇਸ਼ਾਂ ਦਾ ਦੌਰਾ ਕੀਤਾ ਹੈ ਜਿੱਥੇ ਕੋਚਿੰਗ ਦੀਆਂ ਸਹੂਲਤਾਂ ਭਾਰਤ ਤੋਂ ਕਿਤੇ ਬਿਹਤਰ ਹਨ। ਇਸ ਲਈ ਤਮਗੇ ਜਿੱਤਣ ਲਈ  ਭਾਰਤ ਨੂੰ ਉਨ੍ਹਾਂ ਦੇ ਪੱਧਰ ’ਤੇ ਕੋਚਿੰਗ ਸਿਸਟਮ ਉਸਾਰਨਾ ਪਵੇਗਾ।
ਸ੍ਰੀ ਮਾਕਨ ਨੇ ਕਿਹਾ ਕਿ ਦੇਸ਼ ਦਾ ਭਵਿੱਖ ਅਜਿਹੇ ਸਨਮਾਨਤ ਕੋਚਾਂ ’ਤੇ ਨਿਰਭਰ ਹੈ ਕਿਉਂਕਿ ਉਹ ਹੀ ਦੇਸ਼ ਨੂੰ ‘ਅਰਜਨ’ ਪੈਦਾ ਕਰਕੇ ਦੇ ਸਕਦੇ ਹਨ। ਉਨ੍ਹਾਂ ਸੱਦਾ ਦਿੱਤਾ ਕਿ ਜ਼ਿਆਦਾ ਤੋਂ ਜ਼ਿਆਦਾ ਖਿਡਾਰੀ ਆਪਣੇ ਖੇਡ ਕਰੀਅਰ ਤੋਂ ਬਾਅਦ ਕੋਚਿੰਗ ਨਾਲ ਜੁੜਨ ਕਿਉਂਕਿ ਉਹ ਖਿਡਾਰੀਆਂ ਦੀਆਂ ਜ਼ਰੂਰਤਾਂ ਤੇ ਭਾਵਨਾਵਾਂ ਨੂੰ ਜ਼ਿਆਦਾ ਬਿਹਤਰ ਢੰਗ ਨਾਲ ਸਮਝ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਖੇਡ ਮੰਤਰਾਲਾ ਕੋਚਿੰਗ ’ਚ ਸੁਧਾਰ ਲਈ ਉਪਰਾਲੇ ਕਰ ਰਿਹਾ ਹੈ। ਐਨ ਆਈ ਐਸ ਪਟਿਆਲਾ ਨੂੰ ਵਿਸ਼ਵ ਪੱਧਰੀ ਬਣਾਉਣ ਲਈ 300 ਕਰੋੜ ਰੁਪਏ ਖਰਚ ਕੀਤੇ ਜਾਣਗੇ ਤਾਂ ਕਿ ਇੱਥੋਂ ਦੇਸ਼ ਦੇ ਖਿਡਾਰੀਆਂ ਨੂੰ ਬਿਹਤਰੀਨ ਸਿਖਲਾਈ ਮਿਲ ਸਕੇ।
ਇਸ ਮੌਕੇ ਸ੍ਰੀ ਮਾਕਨ ਨੇ ਮੰਨਿਆ ਕਿ ਵਿਦੇਸ਼ੀ ਕੋਚਾਂ ਦੀਆਂ ਸਹੂਲਤਾਂ ਸੀਨੀਅਰ ਪੱਧਰ ਤੋਂ ਇਲਾਵਾ ਸਬ ਜੂਨੀਅਰ ਤੇ ਜੂਨੀਅਰ ਪੱਧਰ ’ਤੇ ਮੁਹੱਈਆ ਕਰਵਾਈ ਜਾਵੇ ਕਿਉਂਕਿ ਇੱਥੋਂ ਹੀ ਭਵਿੱਖ ਦੇ ਚੈਂਪੀਅਨ ਤਿਆਰ ਹੁੰਦੇ ਹਨ। ਉਨ੍ਹਾਂ ਕਿਹਾ ਕਿ ਜੂਨੀਅਰ ਪੱਧਰ ’ਤੇ ਜਦੋਂ ਚੰਗੇ ਖਿਡਾਰੀ ਤਿਆਰ ਹੋਣਗੇ ਤਾਂ ਹੀ ਉਹ ਅੱਗੇ ਚੱਲ ਕੇ ਸੀਨੀਅਰ ਪੱਧਰ ’ਤੇ ਆਪਣੀ ਛਾਪ ਛੱਡ ਸਕਣਗੇ।
      -ਪੀ.ਟੀ.ਆਈ.