ਨਵੀਂ ਦਿੱਲੀ, 19 ਜੂਨ
ਬੀਤੇ ਅਪਰੈਲ ਮਹੀਨੇ ਦੌਰਾਨ ਭਾਰਤ ਵਿੱਚ ਸਿੱਧਾ ਵਿਦੇਸ਼ੀ ਨਿਵੇਸ਼ (ਐਫ ਡੀ ਆਈ) 41 ਫੀਸਦੀ ਘਟ ਕੇ 1.85 ਅਰਬ ਡਾਲਰ ਰਹਿ ਗਿਆ। ਇਹ ਤੱਥ ਭਾਰਤ ਵਿੱਚ ਅਰਥਚਾਰੇ ਦੇ ਮੰਦਵਾੜੇ ਅਤੇ ਨਿਵੇਸ਼ਕਾਂ ਦੇ ਭਰੋਸੇ ਨੂੰ ਖੋਰਾ ਲੱਗਣ ਦਾ ਸਾਫ ਇਜ਼ਹਾਰ ਕਰਦਾ ਹੈ। ਗੌਰਤਲਬ ਹੈ ਕਿ ਅਪਰੈਲ 2011 ਦੌਰਾਨ ਭਾਰਤ ਵਿੱਚ 3.12 ਅਰਬ ਡਾਲਰ ਦਾ ਸਿੱਧਾ ਵਿਦੇਸ਼ੀ ਨਿਵੇਸ਼ ਹੋਇਆ ਸੀ। ਇਸ ਕਮੀ ਲਈ ਆਲਮੀ ਤੇ ਘਰੇਲੂ ਮਾਲੀ ਮਸਲਿਆਂ ਨੂੰ ਜ਼ਿੰਮੇਵਾਰ ਠਹਿਰਾਉਂਦਿਆਂ ਮਾਹਰਾਂ ਨੇ ਸੁਝਾਅ ਦਿੱਤਾ ਕਿ ਸਰਕਾਰ ਨੂੰ ਆਲਮੀ ਨਿਵੇਸ਼ਕਾਂ ਦਾ ਭਰੋਸਾ ਬਹਾਲ ਕਰਨ ਲਈ ਸੁਧਾਰਾਂ ਸਬੰਧੀ ਕੋਈ ਵੱਡੀ ਪਹਿਲਕਦਮੀ ਕਰਨੀ ਚਾਹੀਦੀ ਹੈ। ਫਿੱਕੀ ਦੇ ਸਕੱਤਰ ਜਨਰਲ ਰਾਜੀਵ ਕੁਮਾਰ ਨੇ ਇਸ ਮੁਤੱਲਕ ਕਿਹਾ, ”ਸਰਕਾਰ ਨੂੰ ਤੁਰਤ ਅਹਿਮ ਤੇ ਮੁੱਖ ਸੁਧਾਰ ਕਰਨੇ ਚਾਹੀਦੇ ਹਨ ਜਿਨ੍ਹਾਂ ਵਿੱਚ ਬਹੁ-ਬਰਾਂਡ ਪ੍ਰਚੂਨ ਵਿੱਚ ਐਫ ਡੀ ਆਈ ਦੀ ਇਜਾਜ਼ਤ ਦੇਣ ਅਤੇ ਵਿਦੇਸ਼ੀ ਏਅਰਲਾਈਨਾਂ ਨੂੰ ਘਰੇਲੂ ਹਵਾਈ ਕੰਪਨੀਆਂ ਵਿੱਚ ਹਿੱਸੇ ਖਰੀਦਣ ਦੀ ਖੁੱਲ੍ਹ ਦੇਣਾ ਸ਼ਾਮਲ ਹੈ।” ਉਨ੍ਹਾਂ ਕਿਹਾ ਕਿ ਇਸ ਨਾਲ ਦੇਸ਼ ਵਿੱਚ ਐਫ ਡੀ ਆਈ ਦਾ ਵਹਾਅ ਤੇਜ਼ ਕਰਨ ‘ਚ ਮਦਦ ਮਿਲੇਗੀ।

-ਪੀ.ਟੀ.ਆਈ.