ਲਾਹੌਰ, 17 ਜੂਨ
ਪਾਕਿਸਤਾਨ ਦੇ ਹਰਫਨਮੌਲਾ ਸ਼ਾਹਿਦ ਅਫਰੀਦੀ ਦਾ ਕਹਿਣਾ ਹੈ ਕਿ ਟੀਮ ਦੀ ਚੋਣ ’ਚ ਕੀਤੀ ਜਾ ਰਹੀ ਦੇਰੀ ਘਾਤਕ ਹੋ ਸਕਦੀ ਹੈ। ਅਫਰੀਦੀ ਚਾਹੁੰਦਾ ਹੈ ਕਿ ਕੌਮੀ ਚੋਣਕਰਤਾ ਟੀ-ਟਵੰਟੀ ਵਿਸ਼ਵ ਕੱਪ ਲਈ ਜਲਦ ਤੋਂ ਜਲਦ ਟੀਮ ਦਾ ਐਲਾਨ ਕਰਨ ਕਿਉਂਕਿ ਇਸ ’ਚ ਦੇਰੀ ਵਿਸ਼ਵ ਕੱਪ ’ਚ ਟੀਮ ’ਤੇ ਬੁਰਾ ਅਸਰ ਪਾਵੇਗੀ।
ਪਹਿਲਾਂ ਟਵੰਟੀ-20 ਵਿਸ਼ਵ ਕੱਪ ਦੇ ਫਾਈਨਲ ’ਚ ਪਹੁੰਚਣ ਤੋਂ ਬਾਅਦ 2009 ’ਚ ਚੈਂਪੀਅਨ ਬਣੇ ਪਾਕਿਸਤਾਨ ਨੇ ਹਾਲ ’ਚ ਮਿਸਬਾਹ ਉਲ ਹੱਕ ਦੀ ਥਾਂ ਮੁਹੰਮਦ ਹਫੀਜ਼ ਨੂੰ ਇਸ ਸ਼੍ਰੇਣੀ ’ਚ ਆਪਣਾ ਨਵਾਂ ਕਪਤਾਨ ਬਣਾਇਆ ਹੈ। ਅਫਰੀਦੀ ਨੇ ਕੋਲੰਬੋ ’ਚ ਜਿਓ ਨਿਊਜ਼ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਇਹ ਵਿਸ਼ਵ ਕੱਪ ਟੀਮਾਂ ਨੂੰ ਆਖਰੀ ਰੂਪ ਦੇਣ ਦਾ ਸਹੀ ਮੌਕਾ ਹੈ। ਉਸ ਦਾ ਕਹਿਣਾ ਸੀ ਕਿ ਸਹੀ ਸਮੇਂ ’ਤੇ ਟੀਮ ਦੇ ਐਲਾਨ ਲਈ ਖਿਡਾਰੀ ਆਪਣੇ ਆਪ ਨੂੰ ਮਾਨਸਿਕ ਰੁਪ ’ਚ ਤਿਆਰ ਕਰ ਸਕਣਗੇ।                        -ਪੀ.ਟੀ.ਆਈ.