ਨਵੀਂ ਦਿੱਲੀ, 17 ਜੂਨ
ਭਾਰਤੀ ਸੈਲਾਨੀਆਂ ਵੱਲੋਂ ਛੁੱਟੀਆਂ ਮਨਾਉਣ ਲਈ ਏਸ਼ਿਆਈ ਮੁਲਕਾਂ ਨੂੰ ਤਰਜੀਹ ਦਿੱਤੀ ਜਾ ਰਹੀ ਹੈ। ਇਸ ਦਾ ਕਾਰਨ ਡਾਲਰ ਦੇ ਮੁਕਾਬਲੇ ਰੁਪਏ ਦੀ ਘਟੀ ਕੀਮਤ ਨੂੰ ਮੰਨਿਆ ਜਾ ਰਿਹਾ ਹੈ।
ਸੈਰ-ਸਪਾਟੇ ਪ੍ਰਬੰਧਨ ਕੰਪਨੀਆਂ ਅਨੁਸਾਰ ਜੋ ਲੋਕ ਏਸ਼ਿਆਈ ਮੁਲਕਾਂ ਦੀ ਬਜਾਏ ਹੋਰ ਥਾਵਾਂ ‘ਤੇ ਜਾਣਾ ਚਾਹੁੰਦੇ ਹਨ, ਉਨ੍ਹਾਂ ਨੂੰ ਵੱਧ ਖਰਚੇ ਕਾਰਨ ਦਿਨ ਘੱਟ ਕਰਨੇ ਪੈ ਰਹੇ ਹਨ। ਟੀ.ਯੂ.ਆਈ. ਇੰਡੀਆ ਦੇ ਸੀਨੀਅਰ ਉਪ ਪ੍ਰਧਾਨ ਸੁਨੀਲ ਹਸੀਜਾ ਨੇ ਦੱਸਿਆ, ”ਇਸ ਤਿਮਾਹੀ ਦੌਰਾਨ ਭਾਰਤ ਤੋਂ ਵਿਦੇਸ਼ ਜਾਣ ਵਾਲੇ ਕੁੱਲ ਸੈਲਾਨੀਆਂ ਵਿਚੋਂ ਭੂਟਾਨ, ਕੰਬੋਡੀਆ, ਮਿਆਂਮਾਰ, ਸ੍ਰੀਲੰਕਾ, ਨੇਪਾਲ, ਫਿਲਪੀਨਜ਼, ਸਿੰਗਾਪੁਰ ਅਤੇ ਵੀਅਤਨਾਮ ਆਦਿ ਮੁਲਕਾਂ ਵਿਚ ਛੁੱਟੀਆਂ ਮਨਾਉਣ ਲਈ ਜਾਣ ਵਾਲਿਆਂ ਦੀ ਗਿਣਤੀ ਵਿਚ 40 ਫੀਸਦ ਵਾਧਾ ਹੋਇਆ ਹੈ।”
ਭੁਟਾਨ ਟਰੈਵਲ ਏਜੰਸੀ ਡਾਟ ਕਾਮ ਦੇ ਨਿਰਦੇਸ਼ਕ ਕਾਰਤਿਕ ਤਿਵਾੜੀ ਅਨੁਸਾਰ ਭਾਰਤ ਦੇ ਲੋਕ ਅਜਿਹੀਆਂ ਥਾਵਾਂ ‘ਤੇ ਛੁੱਟੀਆਂ ਮਨਾਉਣਾ ਪਸੰਦ ਕਰਦੇ ਹਨ, ਜਿਥੇ ਸਫਰ ਦਾ ਘੱਟ ਸਮਾਂ, ਸੌਖਾਲਾ ਵੀਜ਼ਾ ਅਤੇ ਘੱਟ ਖਰਚਾ ਹੋਵੇ। ਪਰਲਜ਼ ਇੰਟਰਨੈਸ਼ਨਲ ਟੂਰਜ਼ ਅਤੇ ਟਰੈਵਲ ਦੇ ਅਰਜੁਨ ਸੇਠ ਅਨੁਸਾਰ ਆਰਥਿਕ ਸਥਿਤੀਆਂ ਜਿਵੇਂ, ਮਹਿੰਗਾਈ, ਰੁਪਏ ਦੀ ਕੀਮਤ ਘਟਣਾ, ਤੇਲ ਕੀਮਤਾਂ, ਆਰਥਿਕ ਸੁਧਾਰਾਂ ਵਿਚ ਖੜੋਤ ਆਦਿ ਕਾਰਨ ਭਾਰਤੀ ਲੋਕਾਂ ਵੱਲੋਂ ਛੁੱਟੀਆਂ ਲਈ ਅਮਰੀਕਾ, ਬਰਤਾਨੀਆ, ਯਰੂਪੀ ਮੁਲਕਾਂ ਦੀ ਬਜਾਏ ਏਸ਼ਿਆਈ ਮੁਲਕਾਂ ਨੂੰ ਤਰਜੀਹ ਦਿੱਤੀ ਜਾ ਰਹੀ ਹੈ।

 -ਪੀ.ਟੀ.ਆਈ.