ਚੰਡੀਗੜ੍ਹ, 21 ਜੁਲਾਈ:  ਹਰਿਆਣਾ ਦੇ ਉਦਯੋਗ ਮੰਤਰੀ ਰਣਦੀਪ ਸਿੰਘ ਸੁਰਜੇਵਾਲਾ ਨੇ ਕਈ ਸਵਾਲ ਉਭਾਰਦਿਆਂ ਕਿਹਾ ਕਿ ਮਾਨੇਸਰ ਪਲਾਂਟ ’ਚ ਹਿੰਸਾ ਸੂਬੇ ’ਚ ਉਦਯੋਗਿਕ ਸ਼ਾਂਤੀ ਨੂੰ ਸਾਬੋਤਾਜ ਕਰਨ ਦੀ ਗਿਣੀ ਮਿਥੀ ਸਾਜ਼ਿਸ਼ ਹੋ ਸਕਦੀ ਹੈ।  ਸ੍ਰੀ ਸੁਰਜੇਵਾਲਾ ਨੇ ਕਿਹਾ ਕਿ ਇਸ ਬਾਰੇ ਕੁਝ ਸੰਕੇਤ ਮਿਲੇ ਹਨ ਜਿਨ੍ਹਾਂ ਤੋਂ ਲੱਗਦਾ ਹੈ ਕਿ ਇਹ ਸੂਬੇ ’ਚ ਉਦਯੋਗਿਕ ਖੇਤਰ ਦੀ ਸ਼ਾਂਤੀ ਭੰਗ ਕਰਨ ਦੀ ਗਿਣੀ ਮਿਥੀ ਯੋਜਨਾ ਹੋ ਸਕਦੀ ਹੈ। ਇਸ ਘਟਨਾ ’ਚ ਕਿਸੇ ਸਿਆਸੀ ਪਾਰਟੀ ਦਾ ਹੱਥ ਹੋਣ ਬਾਰੇ ਪੁੱਛੇ ਸਵਾਲ ਦੇ ਜਵਾਬ ’ਚ ਉਨ੍ਹਾਂ ਕਿਹਾ ਕਿ ਇਸ ਬਾਰੇ ਅਜੇ ਕੁਝ ਕਹਿਣਾ ਮੁਸ਼ਕਲ ਹੈ। ਦੂਜੇ ਪਾਸੇ ਸੂਬੇ ਦੇ ਕਿਰਤ ਤੇ ਰੁਜ਼ਗਾਰ ਮੰਤਰੀ ਸ਼ਿਵ ਚਰਨ ਲਾਲ ਸ਼ਰਮਾ ਨੇ ਵੀ ਕਿਹਾ ਹੈ ਕਿ ਪਲਾਂਟ ਦੇ ਕਾਮਿਆਂ ਨੂੰ ਬਾਹਰੋਂ ‘ਹੱਲਾਸ਼ੇਰੀ’ ਮਿਲੀ ਸੀ। ਸ੍ਰੀ ਸ਼ਰਮਾ ਨੇ ਕਿਹਾ ਕਿ ਪਲਾਂਟ ’ਚ ਹਿੰਸਾ ਕਰਨ ਵਾਲੇ ਕਾਮੇ ਬਿਲਕੁਲ ਗਲਤ ਸਨ। ਉਨ੍ਹਾਂ ਨੂੰ ਅੱਠ ਘੰਟੇ ਦੀ ਡਿਊਟੀ ਲਈ ਚੰਗੀਆਂ ਤਨਖਾਹਾਂ ਮਿਲਦੀਆਂ ਹਨ। ਉਹ ਕੰਪਨੀ ਵੱਲੋਂ ਬਹੁਤ ਸਾਰੀਆਂ ਸਹੂਲਤਾਂ ਦਾ ਆਨੰਦ ਮਾਣ ਰਹੇ ਹਨ। ਉਂਜ ਸ੍ਰੀ ਸ਼ਰਮਾ ਨੇ ਮੰਨਿਆ ਕਿ ਕਾਮੇ ਪਿਛਲੇ 2-3 ਮਹੀਨਿਆਂ ਤੋਂ ਤਨਖਾਹਾਂ ਵਧਾਉਣ ਲਈ ਕੰਪਨੀ ’ਤੇ ਦਬਾਅ ਪਾ ਰਹੇ ਸਨ। ਉਧਰ ਹਰਿਆਣਾ ਕਿਰਤ ਵਿਭਾਗ ਦੇ ਸੂਤਰਾਂ ਦਾ ਕਹਿਣਾ ਹੈ ਕਿ ਮਹੀਨਾਵਾਰ ਮੀਟਿੰਗਾਂ ’ਚ ਕਦੇ ਵੀ ਕਿਸੇ ਮੁਲਾਜ਼ਮ ਨੇ ਕੰਪਨੀ ’ਚ ਕਿਸੇ ਸਮੱਸਿਆ ਬਾਰੇ ਨਹੀਂ ਦੱਸਿਆ।
-ਪੀ.ਟੀ.ਆਈ.