ਸ੍ਰੀਨਗਰ, 22 ਜੁਲਾਈ
ਸ੍ਰੀ ਅਮਰਨਾਥ ਦੀ ਪਵਿੱਤਰ ਗੁਫ਼ਾ ਦੇ ਦਰਸ਼ਨ ਕਰਨ ਆਏ ਯਾਤਰੀਆਂ ਵਿੱਚੋਂ 9 ਦੀ ਬੀਤੇ ਚੌਵੀ ਘੰਟਿਆਂ ਦੌਰਾਨ ਮੌਤ ਹੋ ਗਈ। ਮਰਨ ਵਾਲਿਆਂ ਵਿੱਚ ਪੰਜਾਬ ਦੇ ਦੋ ਵਿਅਕਤੀ ਤੇ ਉੜੀਸਾ ਦਾ ਇਕ ਜੋੜਾ ਸ਼ਾਮਲ ਹੈ। ਹੁਣ ਤੱਕ ਯਾਤਰਾ ਦੌਰਾਨ 97 ਸ਼ਰਧਾਲੂਆਂ ਦੀ ਮੌਤ ਹੋ ਚੁੱਕੀ ਹੈ। ਯਾਤਰਾ ਦੌਰਾਨ ਸਿਹਤ ਖ਼ਰਾਬ ਹੋਣ ਕਾਰਨ ਪੰਜਾਬ ਦੇ ਰਘੂਨਾਥ ਸਿੰਘ ਤੇ ਉਮੇਸ਼ ਅਤੇ ਪੱਛਮੀ ਬੰਗਾਲ ਦੀ ਲਲਿਤਾ ਡਾਂਡ ਦੀ ਹਸਪਤਾਲ ਵਿੱਚ ਮੌਤ ਹੋਈ। ਬਾਲਟਾਲ ਵਿਖੇ ਦਿਲ ਦਾ ਦੌਰਾ ਪੈਣ ਨਾਲ ਮੱਧ ਪ੍ਰਦੇਸ਼ ਦੇ ਐਚ.ਪੀ. ਬਰਯਾਨੀ (65) ਦੀ ਮੌਤ ਹੋ ਗਈ। ਪੰਚਤਰਨੀ ਤੇ ਗੁਫ਼ਾ ਨੇੜੇ ਦੋ ਸਾਧੂਆਂ ਦੀਆਂ ਲਾਸ਼ਾਂ ਮਿਲੀਆਂ ਹਨ।
ਸ੍ਰੀਨਗਰ ਦੇ ਬਾਹਰਵਾਰ ਜ਼ਕੂਰਾ ਵਿਖੇ ਪਠਾਨ ਕਲੋਨੀ ਨੇੜੇ ਸੜਕ ਹਾਦਸੇ ਵਿੱਚ ਉੜੀਸਾ ਤੋਂ ਆਏ ਸ਼ਰਧਾਲੂ ਜੋੜੇ ਲਕਸ਼ਮੀ ਪ੍ਰਿਆ ਸੈਨਾਪਤੀ ਤੇ ਕੁਲਮਨੀ ਸੈਨਾਪਤੀ ਦੀ ਮੌਤ ਹੋ ਗਈ। ਮਹਾਰਾਸ਼ਟਰ ਦੇ 50 ਸਾਲਾ ਰਾਮ ਬਾਬੂ ਦੀ ਬਾਲਟਾਲ ਦੇ ਰਾਹ ’ਤੇ ਮੌਤ ਹੋ ਗਈ। ਬੀਤੀ ਸ਼ਾਮ ਤੱਕ 5,64,179 ਸ਼ਰਧਾਲੂਆਂ ਨੇ ਪਵਿੱਤਰ ਗੁਫ਼ਾ ਦੇ ਦਰਸ਼ਨ ਕਰ ਲਏ ਸਨ। ਇਸੇ ਦੌਰਾਨ ਅਮਰਨਾਥ ਦੀ ਯਾਤਰਾ ਲਈ ਜੰਮੂ ਨੇੜੇ ਭਗਵਤੀ ਕੈਂਪ ਤੋਂ 1350 ਯਾਤਰੀਆਂ ਦਾ ਜਥਾ ਅੱਜ ਸਵੇਰੇ ਰਵਾਨਾ ਹੋਇਆ, ਇਸ ’ਚ 979 ਪੁਰਸ਼, 212 ਔਰਤਾਂ, 18 ਬੱਚੇ ਤੇ 141 ਸਾਧੂ ਸ਼ਾਮਲ ਹਨ।    -ਪੀ.ਟੀ.ਆਈ.