ਲੜਕੀ ਦੀ ਕੁੱਟਮਾਰ ਕਰ ਰਹੀ ਸਰਪੰਚ ਪਾਲ ਕੌਰ

ਗੁਰਪ੍ਰੀਤ ਸਿੰਘ ਧਾਲੀਵਾਲ
ਮੋਗਾ, 22 ਅਗਸਤ
ਪਿੰਡ ਭਿੰਡਰ ਕਲਾਂ ਵਿੱਚ ਅੱਜ ਦੇਰ ਸ਼ਾਮ ਪਿੰਡ ਦੀ ਸਰਪੰਚ ਨੇ ਦਸ ਸਾਲਾਂ ਲੜਕੀ ‘ਚੋਂ ਕਥਿਤ ਭੂਤ ਕੱਢਣ ਲਈ ਉਸਨੂੰ ਚਿਮਟਿਆਂ ਨਾਲ ਕੁੱਟ ਕੇ ਮਾਰ ਦਿੱਤਾ। ਇਹ ਸਰਪੰਚ ਪਿੰਡ ‘ਚ ਬਾਬਾ ਗੁੱਗਾ ਪੀਰ ਦੀ ਜਗ੍ਹਾ ‘ਤੇ ਚੌਕੀ ਲਾਉਂਦੀ ਹੈ ਜਿੱਥੇ ਬਿਮਾਰ ਲੋਕਾਂ ਵੱਲੋਂ ਸਿਹਤਯਾਬੀ ਲਈ ਮੰਨਤਾਂ ਮੰਗੀਆਂ ਜਾਂਦੀਆਂ ਹਨ। ਮ੍ਰਿਤਕ ਲੜਕੀ ਸਰਪੰਚ ਦੀ ਭਤੀਜੀ ਸੀ।  ਥਾਣਾ ਧਰਮਕੋਟ ਮੁਖੀ ਜਸਵੀਰ ਸਿੰਘ ਨੇ ਦੱਸਿਆ ਕਿ ਪਿੰਡ  ਭਿੰਡਰ ਕਲਾਂ ਦੀ  ਸਰਪੰਚ ਪਾਲ ਕੌਰ ਨੇ ਪਿੰਡ ਵਿੱਚ ਕਰਵਾਏ ਜਾਣ ਵਾਲੇ ਸਾਲਾਨਾ ਮੇਲੇ ‘ਤੇ ਚੌਕੀ ਲਾਈ ਹੋਈ ਸੀ। ਪਿੰਡ ਮਨਾਵਾਂ ਦੀ ਲੜਕੀ ਵੀਰਪਾਲ ਕੌਰ ਜੋ ਮੇਲੇ ‘ਤੇ ਆਈ ਸੀ ਵਿੱਚੋਂ ਕਥਿਤ ਭੂਤ ਕੱਢਣ ਲਈ ਸਰਪੰਚ ਪਾਲ ਕੌਰ ਨੇ ਉਸ ‘ਤੇ ਗਰਮ ਚਿਮਟਿਆਂ ਨਾਲ ਕਈ ਵਾਰ ਕੀਤੇ। ਲੜਕੀ ਵੱਲੋਂ ਵਾਰ-ਵਾਰ ਪਾਣੀ ਮੰਗਣ ‘ਤੇ ਵੀ ਉਸਨੂੰ ਪਾਣੀ ਨਾ ਦੇਣ ਅਤੇ ਉਸਦੀ ਹਾਲਤ ਖਾਰਬ ਹੋਣ ਕਾਰਨ ਉੱਥੇ ਮੌਜੂਦ ਲੋਕਾਂ ਨੇ ਇਸ ਦੀ ਸੂਚਨਾ ਪੁਲੀਸ ਨੂੰ ਦਿੱਤੀ ਪਰ ਪੁਲੀਸ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਲੜਕੀ ਜ਼ਖ਼ਮਾਂ ਦੀ ਤਾਬ ਨਾ ਸਹਾਰਦੀ ਹੋਈ ਮਰ ਗਈ। ਇਸ ਸਬੰਧੀ ਧਰਮਕੋਟ ਪੁਲੀਸ ਵੱਲੋਂ ਸਰਪੰਚ ਪਾਲ ਕੌਰ ਅਤੇ ਉਸਦੇ ਪਤੀ ਦਰਬਾਰਾ ਸਿੰਘ ਨੂੰ ਗ੍ਰਿਫਤਾਰ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।