ਟ੍ਰਿਬਿਊਨ ਨਿਊਜ਼ ਸਰਵਿਸ
ਖੰਨਾ, 13 ਸਤੰਬਰ
ਖੰਨਾ ਦੀ ਫੈਕਟਰੀ ਵਿੱਚ ਹੋਏ ਭਿਆਨਕ ਧਮਾਕੇ ਦਾ ਕਾਰਨ ਹੈਕਸੇਨ ਗੈਸ ਸਾਬਤ ਹੋਈ ਹੈ। ਇਹ ਗੈਸ ਪੈਟਰੋਲ ਦੇ ਮੁਕਾਬਲੇ ਪੰਜ ਗੁਣਾ ਵੱਧ ਜਲਣਸ਼ੀਲ ਹੁੰਦੀ ਹੈ। ਫੈਕਟਰੀ ਵਿੱਚ 3600 ਕਿਲੋ ਹੈਕਸੇਨ ਗੈਸ ਜਮ੍ਹਾਂ ਸੀ। ਹੁਣ ਤਕ ਹੋਈ ਜਾਂਚ ਵਿੱਚ ਅੱਗ ਬੁਝਾਊ ਪ੍ਰਬੰਧਾਂ ਦੀ ਘਾਟ ਵੀ ਸਾਹਮਣੇ ਆਈ ਹੈ। ਇਸ ਅਗਨੀ ਕਾਂਡ ਵਿੱਚ ਸੱਤ ਵਿਅਕਤੀ ਮਾਰੇ ਗਏ ਹਨ। ਖੰਨਾ ਦੇ ਐਸਡੀਐਮ  ਪੀ.ਐਨ. ਸੋਢੀ ਇਸ ਕਾਂਡ ਦੀ ਜਾਂਚ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਅਜਿਹੇ ਹਾਦਸੇ ਰੋਕੇ ਜਾ ਸਕਦੇ ਹਨ। ਸ੍ਰੀ ਸੋਢੀ ਨੇ ਕਿਹਾ ਕਿ ਫੈਕਟਰੀ ਵਿੱਚ ਸੁਰੱਖਿਆ ਦੇ ਪੁਖਤਾ ਪ੍ਰਬੰਧ ਨਹੀਂ ਸਨ।
ਇਕ ਹੋਰ ਜ਼ਖਮੀ ਨੇ ਦਮ ਤੋੜਿਆ: ਚੰਡੀਗੜ੍ਹ, ਤੋਂ ਟ੍ਰਿਬਿਊਨ ਨਿਊਜ਼ ਸਰਵਿਸ ਅਨੁਸਾਰ ਪੀ ਜੀ ਆਈ ਵਿਚ ਖੰਨਾ ਧਮਾਕਾ ਕਾਂਡ ਦਾ ਇਕ ਹੋਰ ਜ਼ਖਮੀ ਜੈਨਰਥ ਦਮ ਤੋੜ ਗਿਆ ਹੈ। ਉਸ ਨੇ ਅੱਜ ਤੜਕੇ 2.40 ਵਜੇ ਆਖਰੀ ਸਾਹ ਲਿਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਜ਼ਖਮੀਆਂ ਵਿੱਚੋਂ ਚਾਰ ਅਜੇ ਵੀ ਟਰੌਮਾ ਸੈਂਟਰ ਵਿਚ ਜ਼ਿੰਦਗੀ-ਮੌਤ ਦੀ ਲੜਾਈ ਲੜ ਰਹੇ ਹਨ ਜਦੋਂਕਿ ਪੰਜ ਨੂੰ ਐਮਰਜੈਂਸੀ ਵਾਰਡ ਨੰਬਰ ਪੰਜ ਵਿਚ ਤਬਦੀਲ ਕਰ ਦਿੱਤਾ ਗਿਆ ਹੈ। ਫੱਟੜਾਂ ਦਾ ਇਲਾਜ ਕਰ ਰਹੇ ਇਕ ਡਾਕਟਰ ਦਾ ਕਹਿਣਾ  ਹੈ ਕਿ ਉਨ੍ਹਾਂ ਦੀ ਹਾਲਤ ਵਿਚ ਲਗਾਤਾਰ ਸੁਧਾਰ ਹੋ ਰਿਹਾ ਹੈ। ਪੀ ਜੀ ਆਈ ਵਿਚ ਕੁੱਲ 12 ਮਰੀਜ਼ ਦਾਖਲ ਕਰਵਾਏ ਗਏ ਸਨ ਜਿਨ੍ਹਾਂ ਵਿੱਚੋਂ ਤਿੰਨ ਦੀ ਮੌਤ ਹੋ ਗਈ ਹੈ। ਖੰਨਾ ਧਮਾਕਾ ਕਾਂਡ 12 ਸਤੰਬਰ ਨੂੰ ਵਾਪਰਿਆ ਸੀ। ਧਮਾਕੇ ਦੇ ਜ਼ਖਮੀਆਂ ’ਚ ਵੱਡੀ ਗਿਣਤੀ ਨੂੰ ਪੀ ਜੀ ਆਈ ਰੈਫਰ ਕਰ ਦਿੱਤਾ ਗਿਆ ਸੀ।