ਨਿੱਜੀ ਪੱਤਰ ਪੇ੍ਰਰਕ
ਕੋਟਕਪੂਰਾ, 16 ਮਾਰਚ
ਇਥੇ ਵਿਆਹ ਸਮਾਗਮ ਦੌਰਾਨ ਮਹਾਂਲਕਸ਼ੀ ਪੈਲੇਸ ਵਿਚ ਚਾਰ ਮੁਲਜ਼ਮਾਂ ਵੱਲੋਂ ਲਾੜੇ ਦੇ ਦੋਸਤ ’ਤੇ ਜਾਨਲੇਵਾ ਹਮਲਾ ਕਰ ਦਿੱਤਾ। ਪੁਲੀਸ ਨੇ ਇਸ ਸਬੰਧੀ ਵਿਚ ਮੁਲਜ਼ਮ ਰਾਜਦੀਪ ਸਿੰਘ ਵਾਸੀ ਭਲੂਰ, ਜਗਮੀਤ ਸਿੰਘ, ਅੰਮ੍ਰਿਤ ਸਿੰਘ ਅਤੇ ਲਵਪ੍ਰੀਤ ਸਿੰਘ ਵਾਸੀ ਡੇਮਰੂ ਖੁਰਦ (ਮੋਗਾ) ਖ਼ਿਲਾਫ਼ ਇਰਾਦਾ ਕਤਲ ਦਾ ਕੇਸ ਦਰਜ ਕੀਤਾ ਹੈ। ਹਮਲੇ ਵਿਚ ਜ਼ਖ਼ਮੀ ਪਰਮਿੰਦਰ ਸਿੰਘ ਵਾਸੀ ਡੇਮਰੂ ਖੁਰਦ ਨੂੰ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਹਸਪਤਾਲ ਫ਼ਰੀਦਕੋਟ ਭਰਤੀ ਕਰਵਾਇਆ ਗਿਆ ਹੈ। ਜਾਂਚ ਅਧਿਕਾਰੀ ਸਹਾਇਕ ਥਾਣੇਦਾਰ ਭੁਪਿੰਦਰ ਸਿੰਘ ਨੇ ਦੱਸਿਆ ਕਿ ਪਰਮਿੰਦਰ ਸਿੰਘ ਦੁਪਹਿਰੇ ਮੈਰਿਜ ਪੈਲੇਸ ਵਿਚੋਂ ਆਪਣੇ ਦੋਸਤ ਲਾੜੇ ਦੀ ਕਿਰਪਾਨ ਰੱਖਣ ਲਈ ਗੱਡੀਆਂ ਦੀ ਪਾਰਕਿੰਗ ’ਚ ਆਇਆ ਸੀ ਜਿਥੇ ਮੁਲਜ਼ਮਾਂ ਨੇ ਉਸ ’ਤੇ ਹਮਲਾ ਕਰ ਦਿੱਤਾ। ਜ਼ਖ਼ਮੀ ਨੂੰ ਤੁਰੰਤ ਸਿਵਲ ਹਸਪਤਾਲ ਕੋਟਕਪੂਰਾ ਲਿਆਂਦਾ ਗਿਆ ਜਿਥੋਂ ਉਸ ਨੂੰ ਫ਼ਰੀਦਕੋਟ ਰੈਫ਼ਰ ਕੀਤਾ ਗਿਆ।
