ਨਿੱਜੀ ਪੱਤਰ ਪ੍ਰੇਰਕ
ਜਲੰਧਰ, 11 ਅਕਤੂਬਰ
ਬਾਬਾ ਜੀਐੱਸ ਬੋਧ4ੀ ਹਾਕੀ ਕਲੱਬ ਵੱਲੋਂ ਸਥਾਨਕ ਲਾਇਲਪੁਰ ਖਾਲਸਾ ਕਾਲਜ ਦੇ ਐਸਟਰੋਟਰਫ ਹਾਕੀ ਮੈਦਾਨ ਵਿੱਚ ਕਰਵਾਈ ਜਾ ਰਹੀ ਚੌਥੀ ਪਰਬਲ ਟੀਐੱਮ ਸਰੀਆ ਬਾਬਾ ਜੀਐੱਸ ਬੋਧੀ ਸਿਕਸ ਏ ਸਾਈਡ ਵੈਟਰਨ ਹਾਕੀ ਲੀਗ ਦੀ ਦੂਜੀ ਲੜੀ ਤਹਿਤ ਖੇਡੇ ਗਏ ਚਾਰ ਮੈਚਾਂ ਦੌਰਾਨ ਮੁੱਖ ਮਹਿਮਾਨ ਵਜੋਂ ਸੰਦੀਪ ਸਿੰਘ ਵੜਿੰਗ, ਪੰਜਾਬ ਐਂਡ ਸਿੰਧ ਬੈਂਕ ਦੇ ਜ਼ੋਨਲ ਮੈਨੇਜਰ ਰਾਜੇਸ਼ ਮਲਹੋਤਰਾ, ਸਾਲਸਨ ਸਟੀਲ ਦੇ ਐੱਮਡੀ ਬਲਦੇਵ ਸਿੰਘ ਕੰਗ, ਐਕਸੀਅਨ ਪਰਮਜੀਤ ਸਿੰਘ ਸੈਣੀ ਨੇ ਸ਼ਮੂਲੀਅਤ ਕੀਤੀ। ਕਲੱਬ ਦੇ ਪ੍ਰਧਾਨ ਦਲਜੀਤ ਸਿੰਘ ਅੰਤਰਰਾਸ਼ਟਰੀ ਤੇ ਟੂਰਨਾਮੈਂਟ ਡਾਇਰੈਕਟਰ ਓਲੰਪੀਅਨ ਸੰਜੀਵ ਕੁਮਾਰ ਨੇ ਦੱਸਿਆ ਕਿ ਪਹਿਲੇ ਮੈਚ ਵਿੱਚ ਓਲੰਪੀਅਨ ਬਲਬੀਰ ਸਿੰਘ ਸੀਨੀਅਰ ਕਲੱਬ ਨੂੰ ਓਲੰਪੀਅਨ ਊਧਮ ਸਿੰਘ ਹਾਕੀ ਕਲੱਬ ਦੇ ਸ਼ਰਨਜੀਤ ਸਿੰਘ ਦੀ ਹੈਟ੍ਰਿਕ ਨੇ 3 ਦੇ ਮੁਕਾਬਲੇ ਚਾਰ ਗੋਲਾਂ ਨਾਲ ਹਰਾਇਆ। ਇਸੇ ਤਰ੍ਹਾਂ ਦੂਜੇ ਮੁਕਾਬਲੇ ਵਿੱਚ ਓਲੰਪੀਅਨ ਸੁਰਜੀਤ ਹਾਕੀ ਕਲੱਬ ਦੇ ਖਿਡਾਰੀ ਬਲਜੀਤ ਸਿੰਘ ਚੰਦੀ ਦੇ ਸ਼ਾਨਦਾਰ ਤਿੰਨ ਗੋਲ ਓਲੰਪੀਅਨ ਮਹਿੰਦਰ ਸਿੰਘ ਮੁਨਸ਼ੀ ਹਾਕੀ ਕਲੱਬ ’ਤੇ ਭਾਰੀ ਪਏ ਅਤੇ ਟੀਮ ਨੂੰ 4-1 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਤੀਜੇ ਮੁਕਾਬਲੇ ਵਿੱਚ ਵਿਜੈ ਕੁਮਾਰ ਵੱਲੋਂ ਲਾਈ ਗਈ ਸ਼ਾਨਦਾਰ ਹੈਟ੍ਰਿਕ ਨਾਲ ਨੈਸ਼ਨਲ ਹਾਕੀ ਕਲੱਬ ਕਪੂਰਥਲਾ ਨੇ ਓਲੰਪੀਅਨ ਅਸ਼ੋਕ ਕੁਮਾਰ ਹਾਕੀ ਕਲੱਬ ਨੂੰ 4-3 ਨਾਲ ਹਰਾਇਆ। ਆਖਰੀ ਮੁਕਾਬਲੇ ਵਿੱਚ ਓਲੰਪੀਅਨ ਜਗਦੇਵ ਸਿੰਘ ਹਾਕੀ ਕਲੱਬ ਨੇ ਓਲੰਪੀਅਨ ਜਗਜੀਤ ਸਿੰਘ ਹਾਕੀ ਕਲੱਬ ਨੂੰ ਇੱਕ ਪਾਸੜ ਜਿੱਤ 6-2 ਨਾਲ ਦਰਜ ਕੀਤੀ।
