ਨਿੱਜੀ ਪੱਤਰ ਪ੍ਰੇਰਕ
ਜਲੰਧਰ, 5 ਅਕਤੂਬਰ
ਪ੍ਰਬਲ ਟੀਐੱਮਟੀ ਸਰੀਆ ਬਾਬਾ ਜੀਐੱਸ ਬੋਧੀ ਵੈਟਰਨ ਚੌਥੀ ਹਾਕੀ ਲੀਗ ਸਥਾਨਕ ਲਾਇਲਪੁਰ ਖ਼ਾਲਸਾ ਕਾਲਜ ਵਿਚ ਸ਼ੁਰੂ ਹੋ ਗਈ ਹੈ। ਇਸ ਵੈਟਰਨ ਲੀਗ ਦਾ ਉਦਘਾਟਨ ਮੁੱਖ ਮਹਿਮਾਨ ਵਜੋਂ ਪਹੁੰਚੇ ਜਲੰਧਰ ਕੇਂਦਰੀ ਵਿਧਾਨ ਸਭਾ ਹਲਕੇ ਦੇ ਵਿਧਾਇਕ ਰਾਜਿੰਦਰ ਬੇਰੀ ਨੇ ਕੀਤਾ ਜਦਕਿ ਪ੍ਰਬਲ ਟੀਐੱਮਟੀ ਸਰੀਆ ਦੇ ਐੱਮਡੀ ਬਲਦੇਵ ਸਿੰਘ ਕੰਗ ਅਤੇ ਡਾਇਰੈਕਟਰ ਸੁਦਰਸ਼ਨ ਕੌਰ ਕੰਗ ਵਿਸ਼ੇਸ਼ ਤੌਰ ’ਤੇ ਪਹੁੰਚੇ। ਇਸ ਲੀਗ ਵਿਚ ਕੁੱਲ 8 ਟੀਮਾਂ ਹਿੱਸਾ ਲੈ ਰਹੀਆਂ ਹਨ ਅਤੇ ਹਰ ਐਤਵਾਰ ਨੂੰ ਕੁੱਲ 4 ਮੈਚ ਖੇਡੇ ਜਾਣਗੇ। ਬਾਬਾ ਜੀਐੱਸ ਬੋਧੀ ਹਾਕੀ ਕਲੱਬ ਦੇ ਪ੍ਰਧਾਨ ਅਤੇ ਕੌਮਾਂਤਰੀ ਹਾਕੀ ਖਿਡਾਰੀ ਦਲਜੀਤ ਸਿੰਘ ਅਤੇ ਟੂਰਨਾਮੈਂਟ ਡਾਇਰੈਕਟਰ ਓਲੰਪੀਅਨ ਸੰਜੀਵ ਕੁਮਾਰ ਡਾਂਗ ਨੇ ਦੱਸਿਆ ਕਿ ਉਦਘਾਟਨੀ ਮੈਚ ਵਿਚ ਓਲੰਪੀਅਨ ਜਗਦੇਵ ਸਿੰਘ ਅਤੇ ਓਲੰਪੀਅਨ ਸੁਰਜੀਤ ਸਿੰਘ ਹਾਕੀ ਟੀਮਾਂ ਵਿਚ ਫਸਵਾਂ ਮੁਕਾਬਲਾ ਹੋਇਆ ਅਤੇ ਦੋਵੇਂ ਟੀਮਾਂ 5-5 ਗੋਲਾਂ ਦੇ ਮੁਕਾਬਲੇ ’ਤੇ ਰਹੀਆਂ। ਦੂਜਾ ਮੈਚ ਵਿੱਚ ਪ੍ਰਬਲ ਟੀਐੱਮਟੀ ਸਰੀਆ ਓਲੰਪੀਅਨ ਅਸ਼ੋਕ ਕੁਮਾਰ ਕਲੱਬ ਨੇ ਓਲੰਪੀਅਨ ਬਲਬੀਰ ਸਿੰਘ ਕਲੱਬ ਨੂੰ 5-4 ਗੋਲਾਂ ਨਾਲ ਹਰਾਇਆ। ਤੀਜਾ ਮੈਚ ਓਲੰਪੀਅਨ ਮਹਿੰਦਰ ਮੁਨਸ਼ੀ ਕਲੱਬ ਨੇ ਓਲੰਪੀਅਨ ਜਗਜੀਤ ਸਿੰਘ ਕਲੱਬ ਤੋਂ 6-3 ਨਾਲ ਜਿੱਤਿਆ।
