ਪੱਤਰ ਪ੍ਰੇਰਕ
ਮਹਿਲ ਕਲਾਂ, 1 ਅਕਤੂਬਰ
ਪਿੰਡ ਮਹਿਲ ਖੁਰਦ ਵਿੱਚ ਬੀਤੇ ਕੱਲ੍ਹ ਦੋ ਕੀਮਤੀ ਮੱਝਾਂ ਦੀ ਕਰੰਟ ਲੱਗਣ ਕਾਰਨ ਮੌਤ ਹੋ ਗਈ। ਗੁੱਜਰ ਬਸ਼ੀਰ ਖਾਂ ਪੁੱਤਰ ਮੂਸਾ ਖ਼ਾਂ ਵਾਸੀ ਜੌਹਲਾ ਨੇ ਦੱਸਿਆ ਕਿ ਉਹ ਰੋਜ਼ਾਨਾ ਵਾਂਗ ਪਿੰਡਾਂ ਅੰਦਰ ਮੱਝਾਂ ਚਾਰ ਕੇ ਆਪਣੇ ਪਰਿਵਾਰਾਂ ਦਾ ਗੁਜ਼ਾਰਾ ਕਰਦੇ ਹਨ। ਜਦੋਂ ਉਹ ਬੀਤੀ ਸ਼ਾਮ ਮੱਝਾਂ ਚਾਰਦੇ ਹੋਏ ਪਿੰਡ ਮਹਿਲ ਖੁਰਦ ਵਿੱਚ ਪੁੱਜੇ ਤਾਂ ਪਿੰਡ ਦੇ ਪਟਵਾਰਖਾਨੇ ਨੇੜੇ ਮੱਝਾਂ ਪਾਣੀ ਪੀ ਕੇ ਟਰਾਂਸਫਾਰਮਰ ਕੋਲ ਦੀ ਲੰਘਣ ਲੱਗੀਆਂ ਤਾਂ ਕਿਸੇ ਤਾਰ ਵਿੱਚ ਆਏ ਕਰੰਟ ਨੇ ਮੱਝਾਂ ਨੂੰ ਲਪੇਟ ਵਿੱਚ ਲੈ ਲਿਆ ਤੇ ਉਨ੍ਹਾਂ ਦੀ ਮੌਤ ਹੋ ਗਈ। ਉਨ੍ਹਾਂ ਕਿਹਾ ਕਿ ਮੱਝਾਂ ਦੀ ਕੀਮਤ ਦੋ ਲੱਖ ਰੁਪਏ ਦੇ ਕਰੀਬ ਹੈ। ਪਿੰਡ ਵਾਸੀਆਂ ਨੇ ਮੰਗ ਕੀਤੀ ਕਿ ਪਰਿਵਾਰ ਨੂੰ ਮੁਆਵਜ਼ਾ ਦਿੱਤਾ ਜਾਵੇ। ਪਾਵਰਕੌਮ ਦੇ ਐਸਡੀਓ ਨਿਤਿਨ ਕੁਮਾਰ ਨੇ ਕਿਹਾ ਕਿ ਕਰੰਟ ਲੱਗਣ ਦੇ ਇਸ ਮਾਮਲੇ ਦੀ ਜਾਂਚ ਪੜਤਾਲ ਕੀਤੀ ਜਾ ਰਹੀ ਹੈ।
