ਨਵੀਂ ਦਿੱਲੀ, 14 ਦਸੰਬਰ
ਕਰੋਨਾ ਦੇ ਮੱਦੇਨਜ਼ਰ ਪਿਛਲੇ ਡੇਢ ਸਾਲ ਤੋਂ ਵੱਧ ਸਮੇਂ ਤੋਂ ਬੰਦ ਪਈ ਦਿੱਲੀ-ਕਾਠਮੰਡੂ ਬੱਸ ਸੇਵਾ 15 ਦਸੰਬਰ ਤੋਂ ਬਹਾਲ ਹੋ ਜਾਵੇਗੀ। ਟਰਾਂਸਪੋਰਟ ਅਧਿਕਾਰੀਆਂ ਨੇ ਅੱਜ ਇਹ ਜਾਣਕਾਰੀ ਦਿੱਤੀ। ਦਿੱਲੀ ਟਰਾਂਸਪੋਰਟ ਕਾਰਪੋਰੇਸ਼ਨ (ਡੀਟੀਸੀ) ਦੇ ਡਿਪਟੀ ਚੀਫ਼ ਜਨਰਲ ਮੈਨੇਜਰ (ਆਰਆਰ) ਆਰਐੱਸ ਮਿਨਹਾਸ ਨੇ ਦੱਸਿਆ ਕਿ ਡੀਟੀਸੀ ਨੇ ਬੀਤੇ ਦਿਨੀਂ ਇੱਕ ਨੋਟਿਸ ਜਾਰੀ ਕਰ ਕੇ ਕਿਹਾ ਹੈ ਅੰਬੇਦਕਰ ਬੱਸ ਟਰਮੀਨਲ ਤੋਂ ਦਿੱਲੀ-ਕਾਠਮੰਡੂ ਬੱਸ 15 ਦਸੰਬਰ ਨੂੰ ਸਵੇਰੇ ਦਸ ਵਜੇ ਚੱਲੇਗੀ। ਡੀਟੀਸੀ ਨੇ ਬੱਸ ਚਲਾਉਣ ਲਈ ਸਕਾਈਲਾਈਨ ਇੰਡੀਆ (ਮੋਟਰਜ਼) ਪ੍ਰਾਈਵੇਟ ਲਿਮਿਟਡ ਨਾਲ ਸਮਝੌਤਾ ਕੀਤਾ ਹੈ। ਨੋਟੀਫਿਕੇਸ਼ਨ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਕੇਂਦਰੀ ਗ੍ਰਹਿ ਮੰਤਰਾਲੇ ਵੱਲੋਂ ਕਰੋਨਾ ਨਿਯਮਾਂ ਸਬੰਧੀ ਜਾਰੀ ਪ੍ਰੋਟੋਕੋਲ/ਹਦਾਇਤਾਂ ਨੂੰ ਹਰ ਹਾਲ ਸੱਚੀ ਭਾਵਨਾ ਨਾਲ ਲਾਗੂ ਕਰਨਾ ਲਾਜ਼ਮੀ ਹੈ।’’ ਭਾਰਤ ਤੇ ਨੇਪਾਲ ਦੀਆਂ ਰਾਜਧਾਨੀਆਂ ਨੂੰ ਜੋੜਨ ਵਾਲੀ ਬੱਸ ਸੇਵਾ ਨਵੰਬਰ 2014 ਵਿੱਚ ਸ਼ੁਰੂ ਕੀਤੀ ਗਈ ਸੀ। -ਪੀਟੀਆਈ
