ਪ੍ਰਮੋਦ ਕੁਮਾਰ ਸਿੰਗਲਾ
ਸ਼ਹਿਣਾ, 23 ਅਗਸਤ
ਇਥੇ ਪਿੰਡ ਉਗੋਕੇ ਵਿੱਚ ਅੱਜ ਸਵੇਰੇ ਸੋਹਨ ਲਾਲ ਵਾਸੀ ਤਪਾ ਮੰਡੀ ਅਨਾਜ ਮੰਡੀ ਵਿੱਚ ਲੱਗੇ ਟਾਵਰ ’ਤੇ ਪੈਟਰੋਲ ਲੈ ਕੇ ਚੜ੍ਹ ਗਿਆ। ਉਹ ਕਹਿ ਰਿਹਾ ਸੀ ਕਿ ਕੁਝ ਵਿਅਕਤੀਆਂ ਵੱਲੋਂ ਉਸ ਦੀ ਲਗਾਤਾਰ ਕੁੱਟਮਾਰ ਕੀਤੀ ਜਾ ਰਹੀ ਹੈ ਤੇ ਪੁਲੀਸ ਇਸ ਸਬੰਧੀ ਸੂਚਨਾ ਦਿੱਤੇ ਜਾਣ ਬਾਅਦ ਵੀ ਮੁਲਜ਼ਮਾਂ ਖ਼ਿਲਾਫ਼ ਕੋਈ ਕਾਰਵਾਈ ਨਹੀਂ ਕਰ ਰਹੀ ਹੈ। ਉਸ ਨੇ ਕਿਹਾ ਕਿ ਉਹ ਇਨਸਾਫ਼ ਲਈ ਟਾਵਰ ’ਤੇ ਚੜ੍ਹਿਆ ਹੈ। ਸੋਹਨ ਲਾਲ ਆਮ ਆਦਮੀ ਪਾਰਟੀ ਦਾ ਸਮਰਥਕ ਹੈ। ਇਸ ਦਾ ਪਤਾ ਚੱਲਦੇ ਹੀ ਪੁਲੀਸ ਥਾਣਾ ਸ਼ਹਿਣਾ ਦੇ ਅਧਿਕਾਰੀ ਮੌਕੇ ’ਤੇ ਪੁੱਜੇ ਤੇ ਸੋਹਨ ਲਾਲ ਨੂੰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਉਹ ਨਹੀਂ ਮੰਨਿਆ, ਅਖੀਰ ਪੰਚਾਇਤ ਵੱਲੋਂ ਸਮਝਾਉਣ ’ਤੇ ਉਹ ਹੇਠਾਂ ਉਤਰ ਆਇਆ। ਉਸ ਨੇ ਚਿਤਾਵਨੀ ਦਿੱਤੀ ਕਿ ਜੇਕਰ ਪੁਲੀਸ ਨੇ ਢੁੱਕਵੀਂ ਕਾਰਵਾਈ ਨਾ ਕੀਤੀ ਤਾਂ ਉਹ ਮੁੜ ਟਾਵਰ ’ਤੇ ਚੜ੍ਹ ਜਾਵੇਗਾ ਅਤੇ ਖੁਦਕੁਸ਼ੀ ਕਰ ਲਏਗਾ। ਪਤਾ ਚਲਿਆ ਹੈ ਕਿ ਉਸ ਦਾ ਰੌਲਾ ਤਪਾ ਮੰਡੀ ਦੇ ਹੀ ਕਿਸੇ ਵਿਅਕਤੀ ਨਾਲ ਹੈ ਪ੍ਰੰਤੂ 14 ਕਿਲੋਮੀਟਰ ਦੂਰ ਪਿੰਡ ਉਗੋਕੇ ਦੀ ਅਨਾਜ ਮੰਡੀ ਦੇ ਟਾਵਰ ’ਤੇ ਚੜ੍ਹਨਾ ਭੇਤ ਬਣਿਆ ਹੋਇਆ ਹੈ।
