ਨਿੱਜੀ ਪੱਤਰ ਪ੍ਰੇਰਕ
ਬਟਾਲਾ, 18 ਸਤੰਬਰ
ਸਰਕਾਰੀ ਪ੍ਰਾਇਮਰੀ ਸਕੂਲਾਂ ਦੇ ਬਲਾਕ ਪੱਧਰੀ ਮੁਕਾਬਲਿਆਂ ਤਹਿਤ ਬਲਾਕ ਕਾਦੀਆਂ- 1 ਅਧੀਨ ਆਉਂਦੇ ਕਰੀਬ ਸਾਢੇ ਪੰਜ ਦਰਜਨ ਸਕੂਲਾਂ ਦੇ ਬੱਚਿਆਂ ਨੇ ਵੱਖ-ਵੱਖ ਖੇਡਾਂ ਵਿੱਚ ਸਖ਼ਤ ਮੁਕਾਬਲੇ ਦੇਖਣ ਨੂੰ ਮਿਲੇ। ਬਲਾਕ ਕਾਦੀਆਂ- 1 ਦੇ ਬੀਪੀਈਓ ਪ੍ਰਲੋਕ ਸਿੰਘ ਮਨੇਸ਼ ਨੇ ਦੱਸਿਆ ਕਿ ਸਰਕਾਰੀ ਪ੍ਰਾਇਮਰੀ ਸਕੂਲ ਰਾਮਪੁਰ ਦੇ ਖੇਡ ਮੈਦਾਨ ’ਚ ਹੋਈਆਂ ਖੇਡਾਂ ਵਿੱਚ ਬੱਚਿਆਂ ਦੇ ਦਿਲਚਸਪ ਮੁਕਾਬਲੇ ਹੋਏ। ਲੜਕਿਆਂ ਦੀਆਂ ਖੇਡਾਂ ’ਚ 200 ਮੀਟਰ ਦੌੜ, 400 ਮੀਟਰ ਦੌੜ ਅਤੇ ਲੰਬੀ ਛਾਲ ਵਿੱਚ ਕਲੱਸਟਰ ਲੀਲ ਕਲਾਂ ਦਾ ਵਿਦਿਆਰਥੀ ਸਹਿਜਪਾਲ ਸਿੰਘ ਪਹਿਲੇ ਸਥਾਨ ’ਤੇ ਰਿਹਾ। ਕੁਸ਼ਤੀ ਵਿੱਚ ਕਲੱਸਟਰ ਰਸੂਲਪੁਰ ਦਾ ਵਿਦਿਆਰਥੀ ਰਣਬੀਰ ਸਿੰਘ 22 ਕਿਲੋ ਭਾਰ ਵਰਗ, ਕਲੱਸਟਰ ਭਰਥ ਦਾ ਵਿਦਿਆਰਥੀ ਲਵਜੀਤ ਸਿੰਘ 25 ਕਿਲੋ ਅਤੇ ਕਲੱਸਟਰ ਡੱਲਾ ਦਾ ਵਿਦਿਆਰਥੀ ਪਰਮਜੀਤ ਸਿੰਘ 30 ਕਿਲੋ ਭਾਰ ਵਰਗ ਵਿੱਚ ਪਹਿਲੇ ਸਥਾਨ ’ਤੇ ਰਹੇ। ਰੱਸੀ ਟੱਪਣ ਦੇ ਮੁਕਾਬਲੇ ’ਚ ਕਲੱਸਟਰ ਸ਼ਾਹਬਾਦ ਦੇ ਜਪਦੀਪ ਸਿੰਘ ਜਿੱਥੇ ਪਹਿਲੇ ਸਥਾਨ ’ਤੇ ਰਹੇ, ਉੱਥੇ ਗਤਕਾ ਮੁਕਾਬਲੇ ’ਚ ਕਲੱਸਟਰ ਡੱਲਾ ਦੇ ਪ੍ਰਭਜੋਤ ਸਿੰਘ ਨੂੰ ਪਹਿਲਾ ਸਥਾਨ ਮਿਲਿਆ।
