ਰਵੀਕਾਂਤ ਸ਼ਰਮਾ ਚੰਡੀਗੜ੍ਹ ਦੇ ਨਵੇਂ ਮੇਅਰ ਬਣੇ

ਮੁਕੇਸ਼ ਕੁਮਾਰ

ਚੰਡੀਗੜ੍ਹ, 8 ਜਨਵਰੀ

ਭਾਜਪਾ ਦੇ ਕੌਂਸਲਰ ਰਵੀਕਾਂਤ ਸ਼ਰਮਾ ਚੰਡੀਗੜ੍ਹ ਦੇ ਨਵੇਂ ਮੇਅਰ ਚੁਣੇ ਗਏ ਹਨ। ਉਨ੍ਹਾਂ ਨੇ ਕਾਂਗਰਸੀ ਕੌਂਸਲਰ ਦਵਿੰਦਰ ਬਬਲਾ ਨੂੰ 12 ਵੋਟਾਂ ਨਾਲ ਹਰਾਇਆ। ਮੇਅਰ ਦੀ ਚੋਣ ਲਈ 26 ਕੌਂਸਲਰ ਅਤੇ 1 ਸੰਸਦ ਮੈਂਬਰ ਕਿਰਨ ਖੇਰ ਵੱਲੋਂ ਵੋਟ ਦੀ ਵਰਤੋਂ ਕਰਨੀ ਸੀ। ਇਨ੍ਹਾਂ ਵਿੱਚੋਂ ਕਿਰਨ ਖੇਰ ਦੀ ਸਿਹਤ ਠੀਕ ਨਾ ਹੋਣ ਕਰਕੇ ਅਤੇ ਭਾਜਪਾ ਕੌਂਸਲਰ ਨੂੰ ਕਰੋਨਾ ਹੋਣ ਕਰਕੇ ਉਹ ਗੈਰ ਹਾਜ਼ਰ ਰਹੇ, ਜਦ ਕਿ ਸ਼੍ਰੋਮਣੀ ਅਕਾਲੀ ਦਲ ਦੇ ਕੌਂਸਲਰ ਨੇ ਬਾਈਕਾਟ ਕੀਤਾ। ਇਸ ਤਰ੍ਹਾਂ 24 ਕੌਂਸਲਰਾਂ ਨੇ ਵੋਟ ਪਾਈ, ਜਿਸ ਵਿੱਚੋਂ 17 ਵੋਟਾਂ ਭਾਜਪਾ ਦੇ ਰਵੀਕਾਂਤ ਨੂੰ, 5 ਕਾਂਗਰਸ ਦੇ ਦਵਿੰਦਰ ਬਬਲਾ ਨੂੰ ਪਈਆਂ ਜਦਕਿ ਦੋ ਵੋਟਾਂ ਰੱਦ ਹੋ ਗਈਆਂ। ਸ੍ਰੀ ਬਬਲਾ ਨੇ ਦੋਸ਼ ਲਾਇਆ ਕਿ ਭਾਜਪਾ ਕੌਂਸਲਰ ਅਧਿਕਾਰੀਆਂ ਦੀ ਕਥਿਤ ਮਿਲੀਭੁਗਤ ਨਾਲ ਵੋਟਿੰਗ ਵੇਲੇ ਮੋਬਾਈਲ ਦੀ ਵਰਤੋਂ ਕਰ ਰਹੇ ਸਨ। ਭਾਜਪਾ ਦੇ ਸੀਨੀਅਰ ਡਿਪਟੀ ਮੇਅਰ ਦੇ ਉਮੀਦਵਾਰ ਮਹੇਸ਼ਇੰਦਰ ਸਿੰਘ ਅਤੇ ਡਿਪਟੀ ਮੇਅਰ ਉਰਮਿਲਾ ਦੇਵੀ ਨੇ ਵੀ ਚੋਣ ਜਿੱਤ ਲਈ। ਦੋਵਾਂ ਨੂੰ ਉਥੇ ਮੌਜੂਦ 19 ਕੌਂਸਲਰਾਂ ਦੀਆਂ ਵੋਟਾਂ ਮਿਲੀਆਂ।