ਟ੍ਰਿਬਿਊਨ ਨਿਊਜ਼ ਸਰਵਿਸ
ਲੁਧਿਆਣਾ, 1 ਦਸੰਬਰ
ਵਿਆਹ ਕਰਵਾ ਕੇ ਘਰ ਪਰਤ ਰਹੇ ਨਵਨੀਤ ਨਗਰ ਵਾਸੀ ਸਚਿਨ ਗੌੜ ਨੇ ਆਪਣੇ ਸਾਥੀਆਂ ਦੇ ਨਾਲ ਮਿਲ ਕੇ ਪਹਿਲਾਂ ਮੁਹੱਲੇ ’ਚ ਅਤੇ ਫਿਰ ਬਾਅਦ ’ਚ ’ਚ ਜੀਟੀ ਰੋਡ ’ਤੇ ਲਾਲੀ ਢਾਬੇ ਦੇ ਬਾਹਰ ਗੋਲੀਆਂ ਚਲਾਈਆਂ। ਗੋਲੀਆਂ ਚਲਾ ਕੇ ਮੁਲਜ਼ਮਾਂ ਨੇ ਜਿੱਥੇ ਕਾਨੂੰਨ ਦੀਆਂ ਧੱਜੀਆਂ ਉਡਾਈਆਂ, ਉੱਥੇ ਹੀ ਲੋਕਾਂ ’ਚ ਡਰ ਪੈਦਾ ਕੀਤਾ। ਇਸ ਦੌਰਾਨ ਕਿਸੇ ਨੇ ਇਸਦੀ ਜਾਣਕਾਰੀ ਪੁਲੀਸ ਨੂੰ ਦੇ ਦਿੱਤੀ। ਪੁਲੀਸ ਦੇ ਘਟਨਾ ਸਥਾਨ ’ਤੇ ਪੁੱਜਣ ਤੋਂ ਪਹਿਲਾਂ ਹੀ ਮੁਲਜ਼ਮ ਉਥੋਂ ਫ਼ਰਾਰ ਹੋ ਗਏ। ਪੁਲੀਸ ਨੇ ਇਸ ਮਾਮਲੇ ’ਚ ਨਵਨੀਤ ਨਗਰ ਵਾਸੀ ਸਚਿਨ ਗੌੜ, ਸਲੇਮ ਟਾਬਰੀ ਦੇ ਅਸ਼ੋਕ ਨਗਰ ਵਾਸੀ ਰਿੱਕੀ, ਅਮਿਤ, ਬੋਬੀ, ਜੋਸ਼ੀ ਤੇ ਕਮਲ ਦੇ ਨਾਲ ਨਾਲ ਮੇਸ਼ੀ ਤੇ ਦੇਸ਼ਾ ਦੇ ਖਿਲਾਫ਼ ਆਰਮਜ਼ ਐਕਟ ਸਮੇਤ ਕਈ ਧਰਾਵਾਂ ਤਹਿਤ ਕੇਸ ਦਰਜ ਕਰ ਮੁਲਜ਼ਮਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਜਾਂਚ ਅਧਿਕਾਰੀ ਮਨਜੀਤ ਸਿੰਘ ਨੇ ਦੱਸਿਆ ਕਿ ਵਿਆਹ ਸਮਾਗਮ ਖਤਮ ਹੋਣ ਤੋਂ ਬਾਅਦ ਮੁਲਜ਼ਮਾਂ ਨੇ ਨਵਨੀਤ ਨਗਰ ਇਲਾਕੇ ’ਚ ਸਾਰੀਆਂ ਗੱਡੀਆਂ ’ਚ ਉਚੀ ਆਵਾਜ਼ ’ਚ ਗਾਣੇ ਲਾਏ ਹੋਏ ਸਨ ਤੇ ਬਾਅਦ ’ਚ ਸ਼ਰਾਬ ਦੇ ਨਸ਼ੇ ’ਚ ਪਹਿਲਾਂ ਨਵਨੀਤ ਨਗਰ ’ਚ ਗੋਲੀਆਂ ਚਲਾਈਆਂ ਉਸ ਤੋਂ ਬਾਅਦ ਮੁਲਜ਼ਮ ਲਾਲੀ ਢਾਬਾ ਕੋਲ ਪੁੱਜੇ। ਜਿੱਥੇ ਮੁਲਜ਼ਮਾਂ ਨੇ ਫਿਰ ਤੋਂ ਹਵਾਈ ਫਾਇਰ ਕੀਤੇ। ਮੁਲਜ਼ਮ ਹਾਲੇ ਪੁਲੀਸ ਗ੍ਰਿਫ਼ਤ ’ਚੋਂ ਬਾਹਰ ਹੈ ਤੇ ਉਨ੍ਹਾਂ ਦੀ ਭਾਲ ’ਚ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।
ਅਣਪਛਾਤਿਆਂ ਨੇ ਗੱਡੀ ’ਤੇ ਗੋਲੀਆਂ ਚਲਾਈਆਂ
ਜਗਰਾਉਂ (ਚਰਨਜੀਤ ਸਿੰਘ ਢਿੱਲੋਂ):ਪੁਲੀਸ ਥਾਣਾ ਸਦਰ ਦੇ ਸਬ-ਇੰਸਪੈਕਟਰ ਕਮਲਦੀਪ ਕੌਰ ਵੱਲੋਂ ਸਾਂਝੀ ਕੀਤੀ ਜਾਣਕਾਰੀ ਅਨੁਸਾਰ ਲੁਧਿਆਣਾ-ਫਿਰੋਜ਼ਪੁਰ ਮਾਰਗ ’ਤੇ ਥਾਣਾ ਸਦਰ ਦੇ ਅਧਿਕਾਰ ਖੇਤਰ ਪਿੰਡ ਸਿੱਧਵਾਂ ਕਲਾਂ ਨੇੜੇ ਪ੍ਰੀਤ ਢਾਬੇ ਕੋਲ ਪ੍ਰਗਟ ਸਿੰਘ ਪੁੱਤਰ ਸੁਰਿੰਦਰਪਾਲ ਸਿੰਘ ਵਾਸੀ ਪਿੰਡ ਜਵੰਦਾ ਕਲਾਂ (ਸਰਹਾਲੀ) ਤਰਤਾਰਨ ਨਾਨਕਸਰ ਵਿਖੇ ਮੱਥਾ ਟੇਕ ਕੇ ਆਪਣੀ ਸਵਿਫਟ ਕਾਰ- ਪੀਬੀ.43.ਏਸੀ.1035 ’ਚ ਲੁਧਿਆਣੇ ਨੂੰ ਜਾ ਰਿਹਾ ਸੀ। ਜਦੋਂ ਉਹ ਉਕਤ ਢਾਬੇ ਕੋਲ ਪੁੱਜਾ ਤਾਂ ਅਚਾਨਕ ਇੱਕ ਮੂੰਹ ਬੰਨ੍ਹੇ ਵਿਅਕਤੀ ਨੇ ਗੱਡੀ ਨੂੰ ਰੁੱਕਣ ਦਾ ਇਸ਼ਾਰਾ ਕੀਤਾ , ਜਦੋਂ ਪ੍ਰਗਟ ਸਿੰਘ ਨੇ ਗੱਡੀ ਹੌਲੀ ਕੀਤੀ ਤਾਂ ਖੱਬੇ ਪਾਸੇ ਤੋਂ ਨਿਕਲੇ ਇੱਕ ਹੋਰ ਵਿਅਕਤੀ ਨੇ ਗੱਡੀ ਉੱਪਰ ਲਗਾਤਾਰ ਚਾਰ ਗੋਲੀਆਂ ਚਲਾ ਦਿੱਤੀਆਂ। ਡੀਗੋਲੀਆਂ ਗੱ ਦੀ ਅਗਲੀ ਅਤੇ ਪਿਛਲੀ ਤਾਕੀ ਵਿੱਚ ਲੱਗੀਆਂ। ਪੜਤਾਲੀ ਅਫਸਰ ਕਮਲਦੀਪ ਕੌਰ ਨੇ ਦੱਸਿਆ ਕਿ ਮਾਮਲਾ ਗੰਭੀਰ ਹੈ ਫਿਲਹਾਲ ਅਣਪਛਾਤੇ ਮੁਲਜ਼ਮਾਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਕੇ ਜਾਂਚ ਕੀਤੀ ਜਾ ਰਹੀ ਹੈ। ਜਲਦੀ ਮਾਮਲੇ ’ਚ ਲੁੱਕੇ ਭੇਦ ਉਜਾਗਰ ਹੋ ਜਾਣਗੇ। ਦਿਨ ਰਾਤ ਚੱਲਣ ਵਾਲੇ ਮਾਰਗ ’ਤੇ ਦਿਨ-ਦਿਹਾੜੇ ਵਾਪਰੀ ਘਟਨਾ ਹੈਰਾਨ ਕਰਨ ਵਾਲੀ ਹੈ।
