ਫੁਟਬਾਲ: ਭਾਰਤ ਏਸ਼ਿਆਈ ਕੱਪ ਕੁਆਲੀਫਾਇਰਜ਼ ਦੇ ਤੀਸਰੇ ਗੇੜ ’ਚ

ਦੋਹਾ: ਅਫਗਾਨਿਸਤਾਨ ਦੇ ਗੋਲ ਕੀਪਰ ਅੋਵੇਸ ਅਜ਼ੀਜ਼ੀ ਵੱਲੋਂ ਕੀਤੇ ਆਤਮਘਾਤੀ ਗੋਲ ਦੀ ਬਦੌਲਤ ਭਾਰਤੀ ਟੀਮ ਇੱਥੇ 1-1 ਨਾਲ ਮੁਕਾਬਲਾ ਬਰਾਬਰ ਕਰ ਕੇ ਏਸ਼ਿਆਈ ਕੱਪ-2023 ਕੁਆਲੀਫਾਇਰਜ਼ ਦੇ ਤੀਸਰੇ ਦੌਰ ਵਿੱਚ ਪੁੱਜ ਗਈ ਹੈ। ਭਾਰਤੀ ਟੀਮ ਅਫਗਾਨ ਗੋਲਕੀਪਰ ਵੱਲੋਂ ਕੀਤੇ ਆਤਮਘਾਤੀ ਗੋਲ ਨਾਲ ਮਿਲੀ 1-0 ਦੀ ਲੀਡ ਬਰਕਰਾਰ ਰੱਖਣ ਵਿੱਚ ਨਾਕਾਮ ਰਹੀ।  ਭਾਰਤ ਨੂੰ ਕੁਆਲੀਫਾਇਰਜ਼ ਦੇ ਤੀਜੇ ਦੌਰ ਵਿੱਚ ਪਹੁੰਚਣ ਲਈ ਡਰਾਅ ਜਦਕਿ ਅਫਗਾਨਿਸਤਾਨ ਨੂੰ ਜਿੱਤ ਦੀ ਜ਼ਰੂਰਤ ਸੀ। ਸੁਨੀਲ ਛੇਤਰੀ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਇਸ ਡਰਾਅ ਮਗਰੋਂ ਗਰੁੱਪ-ਈ ਵਿੱਚ ਤੀਜੇ ਸਥਾਨ ’ਤੇ ਰਹੀ। ਮੈਚ ਦੇ 75ਵੇਂ ਮਿੰਟ ਵਿੱਚ ਭਾਰਤੀ ਸਮਰਥਕਾਂ ਵਿੱਚ ਉਸ ਵੇਲੇ ਖੁਸ਼ੀ ਦੀ ਲਹਿਰ ਦੌੜ ਗਈ ਜਦੋਂ ਅਫਗਾਨਿਸਤਾਨ ਦੇ ਗੋਲਕੀਪਰ ਅਜ਼ੀਜ਼ੀ ਨੇ ਆਤਮਘਾਤੀ (ਸੈਲਫ) ਗੋਲ ਕਰ ਦਿੱਤਾ। ਹਾਲਾਂਕਿ ਭਾਰਤੀ ਟੀਮ ਦਾ ਇਹ ਵਾਧਾ ਜ਼ਿਆਦਾ ਸਮੇਂ ਤੱਕ ਕਾਇਮ ਨਹੀਂ ਰਿਹਾ ਤੇ ਅਫਗਾਨਿਸਤਾਨ ਦੇ ਹੋਸੇਨ ਜ਼ਮਾਨੀ ਨੇ 82ਵੇਂ ਮਿੰਟ ਵਿੱਚ ਗੋਲ ਕਰ ਕੇ ਸਕੋਰ 1-1 ਕਰ ਦਿੱਤਾ। -ਪੀਟੀਆਈ