ਇਕਬਾਲ ਸਿੰਘ ਸ਼ਾਂਤ
ਡੱਬਵਾਲੀ, 19 ਅਗਸਤ
ਸੜਕ ਕੰਢੇ ਟਰੱਕ ਖੜ੍ਹਾ ਕੇ ਪਿਸ਼ਾਬ ਕਰਨਾ ਇੱਕ ਟਰੱਕ ਡਰਾਈਵਰ ਨੂੰ ਕਾਫ਼ੀ ਮਹਿੰਗਾ ਪੈ ਗਿਆ। ਬੀਤੀ ਰਾਤ ਇੱਥੇ ਚੌਟਾਲਾ ਰੋਡ ’ਤੇ ਜੈਨ ਮੰਦਰ ਦੇ ਕੋਲ ਅਲਵਰ ਵਾਸੀ ਡਰਾਈਵਰ ਮੁਫ਼ੀਦ ਆਪਣਾ ਟਰੱਕ ਰੋਕ ਪਿਸ਼ਾਬ ਕਰਨ ਲਈ ਲੱਗਿਆ ਤਾਂ ਉਸ ਦੇ ਪਿੱਛੇ ਆ ਰਹੇ ਮੋਟਰਸਾੲਪਕਲ ਸਵਾਰ ਦੋ ਵਿਅਕਤੀਆਂ ਨੇ ਉਸਦਾ ਟਰੱਕ ਚੋਰੀ ਕਰ ਲਿਆ। ਜਦੋਂ ਤੱਕ ਮੁਫ਼ੀਦ ਨੇ ਟਰੱਕ ਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ, ਤਦ ਤੱਕ ਚੋਰ ਟਰੱਕ ਨੰਬਰ ਆਰਜੇ 02ਜੀਬੀ/2401 ਨੂੰ ਲੈ ਕੇ ਨਜ਼ਰਾਂ ਤੋਂ ਓਜਲ ਹੋ ਚੁੱਕੇ ਸਨ। ਸੂਚਨਾ ਮਿਲਣ ’ਤੇ ਸਰਗਰਮ ਹੋਈ ਡੱਬਵਾਲੀ ਪੁਲਿਸ ਨੇ ਕਈ ਟੀਮਾਂ ਰਾਹੀਂ ਪੜਤਾਲ ਸ਼ੁਰੂ ਕਰ ਦਿੱਤੀ। ਪੁਲੀਸ ਦੇ ਸ਼ਿਕੰਜੇ ’ਚ ਘਿਰਦੇ ਵੇਖ ਚੋਰਾਂ ਨੇ ਪਿੰਡ ਚੌਟਾਲਾ ਨੇੜੇ ਹਨੂੰਮਾਨਗੜ ਬਾਈਪਾਸ ’ਤੇ ਟਰੱਕ ਖੇਤ ਵਿੱਚ ਪਲਟਾ ਦਿੱਤਾ ਅਤੇ ਹਨੇਰੇ ਦਾ ਲਾਹਾ ਲੈਂਦੇ ਖੁਦ ਫ਼ਰਾਰ ਹੋ ਗਏ। ਪੁਲੀਸ ਨੇ ਚੋਰਾਂ ਦਾ ਮੋਟਰਸਾਈਕਲ ਨੰਬਰ ਪੀ.ਬੀ. 03ਏ/6123 ਬਰਾਮਦ ਕੀਤਾ ਹੈ, ਜੋ ਚੋਰੀਸ਼ੁਦਾ ਦੱਸਿਆ ਜਾਂਦਾ ਹੈ। ਪੁਲੀਸ ਨੇ ਟਰੱਕ ਵੀ ਬਰਾਮਦ ਕਰ ਲਿਆ ਹੈ। ਘਟਨਾ ਸਮੇਂ ਮੁਫ਼ੀਦ ਵਾਸੀ ਇਸਮਾਇਲਪੁਰ (ਜ਼ਿਲ੍ਹਾ ਅਲਵਰ) ਸਿਰਸਾ ’ਚ ਚੂਨਾ ਲਾਹ ਕੇ ਵਾਪਸ ਪਰਤ ਰਿਹਾ ਸੀ।
