ਨਿੱਜੀ ਪੱਤਰ ਪ੍ਰੇਰਕ
ਸ੍ਰੀ ਮੁਕਤਸਰ ਸਾਹਿਬ, 6 ਜੂਨ
ਇੱਥੋਂ ਨੇੜਲੇ ਪਿੰਡ ਬੂੜਾ ਗੁੱਜਰ ਦੇ ਫੌਜੀ ਪ੍ਰਭਜੋਤ ਸਿੰਘ ਦੀ ਰਾਜਸਥਾਨ ਵਿੱਚ ਬਾਰੂਦੀ ਸੁਰੰਗ ਫਟਣ ਕਾਰਨ ਮੌਤ ਹੋ ਗਈ। ਪੱਚੀ ਕੁ ਵਰ੍ਹਿਆਂ ਦਾ ਪ੍ਰਭਜੋਤ ਮਾਪਿਆਂ ਦਾ ਇਕਲੌਤਾ ਪੁੱਤਰ ਸੀ ਅਤੇ ਇਸੇ ਸਾਲ 3 ਜਨਵਰੀ ਨੂੰ ਉਸ ਦਾ ਵਿਆਹ ਹੋਇਆ ਸੀ। ਉਹ ਵਿਆਹ ਮੌਕੇ ਦੋ ਕੁ ਹਫ਼ਤਿਆਂ ਦੀ ਛੁੱਟੀ ਕੱਟਣ ਮਗਰੋਂ ਡਿਊਟੀ ’ਤੇ ਪਰਤ ਗਿਆ ਸੀ। ਪ੍ਰਭਜੋਤ ਸਿੰਘ ਰਾਜਸਥਾਨ ਵਿੱਚ ਚੱਲ ਰਹੀ ਇਕ ਫੌਜੀ ਮੁਹਿੰਮ ਦੌਰਾਨ ਜਦੋਂ ਆਰਮੀ ਕੈਂਪ ਵਾਸਤੇ ਬਾਂਸ ਗੱਡ ਰਿਹਾ ਸੀ ਤਾਂ ਜ਼ਮੀਨ ਵਿੱਚ ਬਣੀ ਬਾਰੂਦੀ ਸੁਰੰਗ ਨਾਲ ਬਾਂਸ ਟਕਰਾਉਣ ਕਾਰਨ ਬੰਬ ਫਟ ਗਿਆ, ਜਿਸ ਕਰ ਕੇ ਉਸ ਦੀ ਮੌਤ ਹੋ ਗਈ। ਪ੍ਰਭਜੋਤ ਸਿੰਘ ਦਾ ਸਸਕਾਰ ਅੱਜ ਉਸ ਦੇ ਪਿੰਡ ਬੂੜਾ ਗੁੱਜਰ ਵਿੱਚ ਪੂਰੇ ਫੌਜੀ ਸਨਮਾਨਾਂ ਨਾਲ ਕੀਤਾ ਗਿਆ ਹੈ।
