ਦੇਵਿੰਦਰ ਸਿੰਘ ਜੱਗੀ/ਜੋਗਿੰਦਰ ਓਬਰਾਏ
ਪਾਇਲ/ਦੋਰਾਹਾ, 8 ਜੁਲਾਈ
ਸਬ-ਡਿਵੀਜ਼ਨ ਪਾਇਲ ਦੇ ਪਿੰਡ ਚਣਕੋਈਆਂ ਖੁੁਰਦ ਵਿੱਚ ਅੱਜ ਕੈਨੇਡਾ ਤੋਂ ਪਰਤੇ ਜਗਦੇਵ ਸਿੰਘ ਮੁੰਡੀ (65) ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਸਾਬਕਾ ਪੰਚ ਜਗਦੇਵ ਸਿੰਘ ਖੇਤੋਂ ਆ ਕੇ ਪਸ਼ੂਆਂ ਵਾਲੇ ਘਰ ਚਲਾ ਗਿਆ। ਦੁਪਹਿਰ ਸਮੇਂ ਜਦੋਂ ਘਰ ਵਿੱਚ ਕੰਮ ਕਰਨ ਵਾਲਾ ਪਰਵਾਸੀ ਮਜ਼ਦੂਰ ਉਧਰ ਤਾਂ ਉਸ ਨੇ ਦੇਖਿਆ ਕਿ ਜਗਦੇਵ ਸਿੰਘ ਲਹੂ-ਲੁਹਾਨ ਹੋਇਆ ਕੁਰਸੀ ’ਤੇ ਬੈਠਾ ਪਿਆ ਸੀ। ਜਦੋਂ ਮਜ਼ਦੂਰ ਨੇ ਨੇੜੇ ਜਾ ਕੇ ਦੇਖਿਆ ਤਾਂ ਜਗਦੇਵ ਸਿੰਘ ਦੀ ਮੌਤ ਹੋ ਚੁੱਕੀ ਸੀ। ਜਗਦੇਵ ਸਿੰਘ ਦੇ ਸਿਰ ਵਿੱਚ ਤੇਜ਼ਧਾਰ ਹਥਿਆਰ ਨਾਲ ਵਾਰ ਕੀਤੇ ਹੋਏ ਸਨ ਤੇ ਉਸ ਦੇ ਹੱਥਾਂ ਦੀਆਂ ਉਂਗਲੀਆਂ ਵੱਢੀਆਂ ਹੋਈਆਂ ਸਨ। ਇਸ ਵਾਰਦਾਤ ਦੀ ਜਾਣਕਾਰੀ ਤੁਰੰਤ ਪੁਲੀਸ ਨੂੰ ਦਿੱਤੀ ਗਈ, ਜਿਸ ਮਗਰੋਂ ਡੀਐੱਸਪੀ ਪਾਇਲ ਹਰਵਿੰਦਰ ਸਿੰਘ ਖਹਿਰਾ, ਐੱਸਐੱਚਓ ਲਖਵੀਰ ਸਿੰਘ, ਸੀਆਈਏ ਖੰਨਾ ਦੇ ਇੰਚਾਰਜ ਵਿਨੋਦ ਕੁਮਾਰ ਮੌਕੇ ’ਤੇ ਪੁੱਜ ਗਏ। ਦੱਸਣਯੋਗ ਹੈ ਕਿ ਜਗਦੇਵ ਸਿੰਘ ਦਾ ਵੱਡਾ ਪੁੱਤਰ ਇੱਥੇ ਰਹਿ ਕੇ ਖੇਤੀ ਕਰਦਾ ਹੈ ਜਦਕਿ ਛੋਟਾ ਪੁੱਤ ਕੈਨੇਡਾ ਰਹਿੰਦਾ ਹੈ। ਕੁਝ ਦਿਨਾਂ ਬਾਅਦ ਜਗਦੇਵ ਸਿੰਘ ਨੇ ਵੀ ਕੈਨੇਡਾ ਪਰਤ ਜਾਣਾ ਸੀ। ਪੁਲੀਸ ਨੇ ਕੇਸ ਦਰਜ ਕਰਕੇ ਮਾਮਲੇ ਦੀ ਜਾਂਚ ਆਰੰਭ ਦਿੱਤੀ ਹੈ।
