ਬੈਂਕਾਕ, 9 ਮਾਰਚ
ਥਾਈਲੈਂਡ ਦੇ ਪ੍ਰਧਾਨ ਮੰਤਰੀ ਤੇ ਫ਼ੌਜ ਦੇ ਸਾਬਕਾ ਕਮਾਂਡਰ ਪ੍ਰਾਯੂਥ ਚਾਨ-ਓਚਾ ਨੇ ਅੱਜ ਪੱਤਰਕਾਰਾਂ ਨੂੰ ਘੇਰ ਲਿਆ। ਬੈਂਕਾਕ ਵਿੱਚ ਹਫ਼ਤਾਵਾਰੀ ਪ੍ਰੈੱਸ ਕਾਨਫਰੰਸ ਦੌਰਾਨ ਪੱਤਰਕਾਰਾਂ ਵੱਲੋਂ ਲਗਾਤਾਰ ਪ੍ਰਸ਼ਨਾਂ ਦੀ ਝੜੀ ਲਾਉਣ ਤੋਂ ਔਖੇ ਪ੍ਰਧਾਨ ਮੰਤਰੀ ਪ੍ਰਾਯੂਥ ਚਾਨ-ਓਚਾ ਨੇ ਉਨ੍ਹਾਂ ’ਤੇ ਕੀਟਾਣੂਨਾਸ਼ਕ ਦਵਾਈ ਦਾ ਛਿੜਕਾਅ ਕਰਵਾ ਦਿੱਤਾ। ਕੈਬਨਿਟ ਵਿੱਚ ਫੇਰਬਦਲ ਬਾਰੇ ਪੁੱਛੇ ਗਏ ਪ੍ਰਸ਼ਨ ’ਤੇ ਉਨ੍ਹਾਂ ਪੱਤਰਕਾਰਾਂ ਨੂੰ ਆਪਣੇ ਕੰਮ ਨਾਲ ਮਤਲਬ ਰੱਖਣ ਲਈ ਕਿਹਾ ਤੇ ਮਗਰੋਂ ਕੀਟਾਣੂਨਾਸ਼ਕ ਦਵਾਈ ਨਾਲ ਭਰਿਆ ਕੰਟੇਨਰ ਮੰਗਵਾਇਆ। ਉਨ੍ਹਾਂ ਅਗਲੀ ਲਾਈਨ ’ਚ ਬੈਠੇ ਪੱਤਰਕਾਰਾਂ ’ਤੇ ਇਸ ਦਾ ਛਿੜਕਾਅ ਕਰਵਾ ਦਿੱਤਾ। ਪ੍ਰਾਯੂਥ ਚਾਨ-ਓਚਾ ਆਪਣੇ ਅਸਥਿਰ ਤੇ ਗੁੱਸੇ ਵਾਲੇ ਸੁਭਾਅ ਲਈ ਪ੍ਰਸਿੱਧ ਹਨ। 2018 ’ਚ ਵੀ ਉਨ੍ਹਾਂ ਨੇ ਰਿਪੋਰਟਰਾਂ ਨਾਲ ਗੱਲਬਾਤ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ। -ਪੀਟੀਆਈ
