ਪੱਤਰ ਪ੍ਰੇਰਕ
ਭਗਤਾ ਭਾਈ, 30 ਅਪਰੈਲ
ਪਿੰਡ ਕੋਇਰ ਸਿੰਘ ਵਾਲਾ ਵਿੱਚ ਇਕ ਵਿਆਹੁਤਾ ਆਪਣੇ ਤਿੰਨ ਛੋਟੇ ਬੱਚਿਆਂ ਸਮੇਤ ਪਰਿਵਾਰ ਦੇ 6 ਮੈਂਬਰਾਂ ਦੇ ਖਾਣੇ ਵਿੱਚ ਨਸ਼ੇ ਦੀ ਕੋਈ ਦਵਾਈ ਮਿਲਾ ਕੇ ਕਥਿਤ ਤੌਰ ’ਤੇ ਆਪਣੇ ਪ੍ਰੇਮੀ ਨਾਲ ਘਰੋਂ ਫ਼ਰਾਰ ਹੋ ਗਈ। ਪਿੰਡ ਵਾਸੀਆਂ ਵੱਲੋਂ ਪਰਿਵਾਰਕ ਮੈਂਬਰਾਂ ਜਿਨ੍ਹਾਂ ਵਿੱਚ ਉਕਤ ਔਰਤ ਦਾ ਪਤੀ, ਤਿੰਨ ਛੋਟੇ ਬੱਚੇ ਤੇ ਸੱਸ ਸ਼ਾਮਲ ਹਨ, ਨੂੰ ਸਿਵਲ ਹਸਪਤਾਲ ਰਾਮਪੁਰਾ ਫੂਲ ਦਾਖਲ ਕਰਵਾਇਆ ਗਿਆ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਉਕਤ ਔਰਤ ਕੁਝ ਸਮਾਂ ਪਹਿਲਾਂ ਵਰਕ ਪਰਮਿਟ ’ਤੇ ਸਿੰਗਾਪੁਰ ਗਈ ਸੀ ਅਤੇ ਬੀਤੇ ਮਹੀਨੇ ਹੀ ਵਾਪਸ ਪੰਜਾਬ ਆਈ ਸੀ। ਥਾਣਾ ਦਿਆਲਪੁਰਾ ਭਾਈਕਾ ਦੀ ਪੁਲੀਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
