ਖੇਤਰੀ ਪ੍ਰਤੀਨਿਧ
ਐਸ.ਏ.ਐਸ. ਨਗਰ (ਮੁਹਾਲੀ), 27 ਮਾਰਚ
ਪੀਸੀਏ ਪੰਜਾਬ ਇਲੈਵਨ ਨੇ ਟਰਾਈਡੈਂਟ ਪੀਸੀਏ ਕ੍ਰਿਕਟ ਕੱਪ ਜਿੱਤ ਲਿਆ ਹੈ। ਪੀਸੀਏ ਪੰਜਾਬ ਇਲੈਵਨ ਨੇ ਮੁਹਾਲੀ ਦੇ ਆਈਐਸ ਬਿੰਦਰਾ ਸਟੇਡੀਅਮ ’ਚ ਖੇਡੇ ਗਏ ਟਰਾਈਡੈਂਟ ਪੀਸੀਏ ਕ੍ਰਿਕਟ ਕੱਪ ਤਿਕੋਣੀ ਚੈਲੇਂਜਰ ਸੀਰੀਜ਼ ਦੇ ਤੀਜੇ ਫ਼ੈਸਲਾਕੁੰਨ ਫਾਈਨਲ ’ਚ ਰੈਸਟ ਆਫ਼ ਪੰਜਾਬ ਰੈੱਡ ਨੂੰ 12 ਦੌੜਾਂ ਨਾਲ ਹਰਾ ਕੇ ਦੋ ਲੱਖ ਦਾ ਪਹਿਲਾ ਇਨਾਮ ਹਾਸਲ ਕੀਤਾ। ਉੱਪ ਜੇਤੂ ਟੀਮ ਨੂੰ ਇੱਕ ਲੱਖ ਦਾ ਇਨਾਮ ਦਿੱਤਾ ਗਿਆ।
ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਪੰਜਾਬ ਇਲੈਵਨ ਦੀ ਟੀਮ ਨੇ ਪੰਜਾਹ ਓਵਰਾਂ ਵਿੱਚ ਚਾਰ ਵਿਕਟਾਂ ਪਿੱਛੇ 335 ਦੌੜਾਂ ਬਣਾਈਆਂ। ਪ੍ਰਭਜੋਤ ਨੇ 158 ਅਤੇ ਅਭਿਜੀਤ ਨੇ 100 ਦੌੜਾਂ ਦੀ ਪਾਰੀ ਖੇਡੀ। ਟੀਚਾ ਦਾ ਪਿੱਛਾ ਕਰਦਿਆਂ ਪੰਜਾਬ ਰੈੱਡ ਦੀ ਟੀਮ 49.4 ਓਵਰਾਂ ਵਿੱਚ 323 ਦੌੜਾਂ ਹੀ ਬਣਾ ਸਕੀ। ਇਸੇ ਤਰਾਂ ਅਭਿਜੀਤ ਗਰਗ ਨੂੰ ਮੈਨ ਆਫ ਦਾ ਸੀਰੀਜ਼, ਅਭਿਨਵ ਸ਼ਰਮਾ ਨੂੰ ਗੇਂਦਬਾਜੀ, ਪ੍ਰਭਜੋਤ ਸਿੰਘ ਨੂੰ ਬੱਲੇਬਾਜ਼ੀ, ਗੌਰਵ ਚੌਧਰੀ ਨੂੰ ਆਲਰਾਊਂਡਰ, ਸਲਿਲ ਅਰੋੜਾ ਨੂੰ ਵਿਕਟਕੀਪਰ, ਰਮਨਦੀਪ ਸਿੰਘ ਨੂੰ ਫੀਲਡਰ ਵਜੋਂ ‘ਮੈਨ ਆਫ਼ ਦਿ ਸੀਰੀਜ਼’ ਐਵਾਰਡ ਤਹਿਤ ਗਿਆਰਾਂ-ਗਿਆਰਾਂ ਹਜ਼ਾਰ ਦੇ ਨਕਦ ਇਨਾਮ ਦਿੱਤੇ ਗਏ। ਭੁਪਿੰਦਰ ਸਿੰਘ ਸੀਨੀਅਰ ਨੇ ਸਾਰਿਆਂ ਦਾ ਧੰਨਵਾਦ ਕੀਤਾ।
