ਸ਼੍ਰੋਮਣੀ ਕਮੇਟੀ ਵਿਚਾਰ ਕਰੇ
14 ਜੁਲਾਈ ਦਾ ਸੰਪਾਦਕੀ ‘ਦੁੱਧ ਦੀ ਖ਼ਰੀਦ’ ਵਾਚਿਆ। ਸੰਪਾਦਕੀ ਵਿਚ ਸਹੀ ਮੁੱਦਾ ਉਭਾਰਿਆ ਹੈ ਕਿ ਆਮਦਨ ਦਾ ਵੱਡਾ ਹਿੱਸਾ ਸਿੱਖ ਭਾਈਚਾਰੇ ਤੇ ਕਿਸਾਨਾਂ ਵੱਲੋਂ ਆਉਂਦਾ ਹੈ। ਸੰਪਾਦਕੀ ਦੇ ਇਹ ਥੋੜ੍ਹੇ ਸ਼ਬਦ ਹੀ ਦੱਸ ਰਹੇ ਹਨ ਕਿ ਪੰਜਾਬ ਦੇ ਲੋਕ ਅਤੇ ਕਿਸਾਨ ਸਿੱਧੇ ਰੂਪ ਵਿਚ ਲੰਗਰ ਲਈ ਅਨਾਜ ਭੇਜਦੇ ਹਨ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਦੁੱਧ ਪਦਾਰਥ ਕਿਸੇ ਹੋਰ ਸੂਬੇ ਦੀ ਪ੍ਰਾਈਵੇਟ ਕੰਪਨੀ ਦੀ ਥਾਂ ਮਿਲਕਫੈੱਡ ਤੋਂ ਖ਼ਰੀਦਣਾ ਚਾਹੀਦਾ ਹੈ। ਸ਼੍ਰੋਮਣੀ ਕਮੇਟੀ ਇਸ ਫ਼ੈਸਲੇ ਬਾਰੇ ਮੁੜ ਵਿਚਾਰ ਕਰੇ। ਅਦਾਰੇ ਨੂੰ ਇਕ ਸੁਝਾਅ ਹੈ। ਕਰੋਨਾ ਕਾਰਨ ਅਖ਼ਬਾਰ ਦਾ ਆਕਾਰ ਛੋਟਾ ਹੋ ਗਿਆ ਹੈ, ਖ਼ਾਸ ਕਰਕੇ ਵਿਸ਼ੇਸ਼ ਪੰਨਿਆਂ ਅਤੇ ਸ਼ਨਿਚਰਵਾਰ, ਐਤਵਾਰ ਛਪਦੇ ਰਹੇ ਵੱਖਰੇ ਪੰਨਿਆਂ ਵਿਚ ਕਟੌਤੀ ਕੀਤੀ ਗਈ ਹੈ। ਲੇਖਾਂ ਅਤੇ ਹੋਰ ਵੰਨਗੀ ਵਾਲੇ ਇਹ ਸਫ਼ੇ ਛੇਤੀ ਸ਼ੁਰੂ ਹੋਣੇ ਚਾਹੀਦੇ ਹਨ।
ਨੇਹਾ ਜਮਾਲ, ਮੁਹਾਲੀ
ਜੰਗ ਦੀ ਸਿਆਸਤ
14 ਜੁਲਾਈ ਨੂੰ ਨਜ਼ਰੀਆ ਪੰਨੇ ’ਤੇ ਛਪੇ ਲੇਖ ‘ਬਿਨ ਤਲਖ਼ੀ ਤੋਂ ਤਲਖ਼ੀ’ ਵਿਚ ਕੁਲਜੀਤ ਦਿਆਲਪੁਰੀ ਨੇ ਵਿਦੇਸ਼ ਵਿਚ ਰਹਿੰਦੇ ਹੋਏ ਸਾਡੇ ਦੇਸ਼ ਦਾ ਚੀਨ ਨਾਲ ਕੀ ਰੌਲਾ ਰੱਪਾ ਚੱਲ ਰਿਹਾ ਹੈ, ਦੇ ਪ੍ਰਸੰਗ ਵਿਚ ਚੀਨ ਦੀ ਇਕ ਜੋੜੀ ਅਤੇ ਆਪਣੇ ਸਮਾਜਿਕ ਸਬੰਧਾਂ ਦਾ ਵਰਨਣ ਕੀਤਾ ਹੈ ਜੋ ਪਹਿਲਾਂ ਵੀ ਉਹੀ ਸਨ ਤੇ ਅੱਜ ਵੀ ਉਹੀ ਸੋਹਣਾ ਵਰਤਾਰਾ ਹੈ। ਮੈਂ ਮਰਚੈਂਟ ਨੇਵੀ ਵਿਚ ਆਪਣੀ ਨੌਕਰੀ ਦੌਰਾਨ ਦੇਖਿਆ ਹੈ, ਜਦੋਂ ਕਾਰਗਿਲ ਯੁੱਧ ਚੱਲ ਰਿਹਾ ਸੀ, ਪਾਕਿਸਤਾਨੀ ਭਰਾ ਮੇਰੇ ਨਾਲ ਨੌਕਰੀ ਕਰਦੇ ਸਨ ਤਾਂ ਅਸੀਂ ਕਦੇ ਵੀ ਯੁੱਧ ਦੀ ਗੱਲ ਤਾਂ ਕੀ ਕਰਨੀ ਸੀ, ਸਾਡੇ ਸਬੰਧ ਉਸੇ ਤਰ੍ਹਾਂ ਹੀ ਸੁਹਿਰਦ ਸਨ। ਅਸਲ ਵਿਚ ਲੋਕਾਂ ਦੀ ਕਿਸੇ ਵੀ ਦੇਸ਼ ਦੇ ਲੋਕਾਂ ਨਾਲ ਕੋਈ ਦੁਸ਼ਮਣੀ ਨਹੀਂ ਹੁੰਦੀ, ਇਹ ਸਭ ਰਾਜਨੀਤੀ ਦੀ ਰੰਗਤ ਹੈ। ਲੋਕ ਮਰ ਜਾਂਦੇ ਹਨ, ਬਾਅਦ ਵਿਚ ਸਿਆਸੀ ਲੋਕ ਸਮਝੌਤਾ ਕਰ ਕੇ ਜੱਫ਼ੀਆਂ ਪਾਉਂਦੇ ਮੀਟਿੰਗਾਂ ਕਰਦੇ ਹਨ। ਕਿਸੇ ਨੇ ਇਹ ਸਵਾਲ ਪੁੱਛੇ ਨਹੀਂ ਕਿ ਕਦੇ ਪਾਕਿਸਤਾਨ ਤੇ ਕਦੇ ਚੀਨ ਨਾਲ ਹਾਲਾਤ ਅਚਾਨਕ ਕਿਉਂ ਖ਼ਰਾਬ ਹੁੰਦੇ ਹਨ ? ਇਸੇ ਦਿਨ ਦਾ ਸੰਪਾਦਕੀ ‘ਦੁੱਧ ਦੀ ਖ਼ਰੀਦ’ ਥੋੜ੍ਹੇ ਸ਼ਬਦਾਂ ’ਚ ਵੱਡਾ ਸੱਚ ਹੈ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਦੁੱਧ ਪਦਾਥਾਂ ਦੀ ਖ਼ਰੀਦ ਬਾਰੇ ਆਪਣਾ ਫ਼ੈਸਲਾ ਤੁਰੰਤ ਠੀਕ ਕਰ ਲੈਣਾ ਚਾਹੀਦਾ ਹੈ। ਇਕ ਗੱਲ ਅਦਾਰੇ ਬਾਰੇ; ਅਖ਼ਬਾਰ ਉੱਤੇ ਕਰੋਨਾ ਦਾ ਹਮਲਾ ਕੁਝ ਜ਼ਿਆਦਾ ਹੀ ਹੋਇਆ ਲੱਗਦਾ ਹੈ। ਪਾਠਕ ਵਿਸ਼ੇਸ਼ ਪੰਨੇ ਪੜ੍ਹਨ ਨੂੰ ਪਹਿਲ ਦਿੰਦੇ ਹਨ। ਇਸ ਪਾਸੇ ਧਿਆਨ ਦਿਓ ਜੀ।
ਰਮੇਸ਼ਵਰ ਸਿੰਘ, ਪਟਿਆਲਾ
ਭੰਬੀਰੀਆਂ ਦੀ ਹਵਾ
9 ਜੁਲਾਈ ਨੂੰ ਦੀਪ ਦੇਵਿੰਦਰ ਸਿੰਘ ਦਾ ਲੇਖ ‘ਭੰਬੀਰੀਆਂ ਦੀ ਹਵਾ’ ਚੰਗਾ ਲੱਗਾ। ਛੋਟੀ ਉਮਰ ਦੇ ਖੇਡਦੇ ਜਵਾਕਾਂ ਦੀਆਂ ਯਾਦਾਂ ਤਾਜ਼ਾ ਹੋਈਆਂ। ਪਿੰਡਾਂ ਵਿਚ ਅਸੀਂ ਭੰਬੀਰੀਆਂ ਨੂੰ ਫੜ-ਫੜ ਭੱਜਦੇ। ਧਾਗੇ ਨਾਲ ਬੰਨ੍ਹ ਕੇ ਪਤੰਗ ਵਾਂਗ ਉਡਾਉਣ ਦਾ ਮਜ਼ਾ ਬਚਪਨ ਦੀਆਂ ਖੇਡਾਂ ਦਾ ਮੁੜ ਧਿਆਨ ਦਿਵਾ ਰਿਹਾ ਸੀ। ਮਹਿੰਗੇ ਖਿਡੌਣਿਆਂ ਅੱਗੇ ਕਾਗਜ਼ ਨਾਲ ਬਣੀਆਂ ਭੰਬੀਰੀਆਂ ਦਾ ਮੁੱਲ ਗ਼ਰੀਬ ਦੇ ਢਿੱਡ ਦੀ ਅੱਗ ਨਾਲੋਂ ਘੱਟ ਸੀ।
ਅਨਿਲ ਕੌਸ਼ਿਕ, ਕਿਓੜਕ (ਕੈਥਲ)
ਪਰਵਾਸੀਆਂ ਲਈ ਔਕੜਾਂ
ਦੂਜੇ ਦੇਸ਼ਾਂ ’ਚ ਪੜ੍ਹਦੇ ਭਾਰਤੀ ਵਿਦਿਆਰਥੀਆਂ ਲਈ ਮੁਸ਼ਕਿਲਾਂ ਵਧ ਰਹੀਆਂ ਹਨ। ਆਰਥਿਕ ਸਥਿਤੀ ਖ਼ਰਾਬ ਹੋਣ ਦੇ ਨਾਲ ਹਰ ਦੇਸ਼ ਆਪਣੇ ਨਾਗਰਿਕਾਂ ਲਈ ਕੋਸ਼ਿਸ਼ਾਂ ਕਰ ਰਿਹਾ ਹੈ। ਕੁਵੈਤ ਦੇ ਬਿਲ ਤੋਂ ਲੈ ਕੇ ਅਮਰੀਕਾ ਤਕ ਪਰਵਾਸੀਆਂ ਦਾ ਭਵਿੱਖ ਦਾਅ ’ਤੇ ਲੱਗਾ ਹੋਇਆ ਹੈ। ਕੌਮਾਂਤਰੀ ਸਹਿਯੋਗ ਨੂੰ ਬਰਕਰਾਰ ਰੱਖਣਾ ਮਹੱਤਵਪੂਰਨ ਹੈ ਕਿਉਂਕਿ ਇਸ ਸਮੇਂ ਹਰ ਦੇਸ਼ ਬਿਮਾਰੀ ਦੇ ਕਹਿਰ ਦਾ ਸਾਹਮਣਾ ਕਰ ਰਿਹਾ ਹੈ।
ਦੀਆ ਅਰੋੜਾ, ਬਠਿੰਡਾ
ਸ਼ਾਮਲਾਟ ਜ਼ਮੀਨਾਂ ਅਤੇ ਕੈਪਟਨ
17 ਜੁਲਾਈ ਨੂੰ ਛਪੇ ਸੰਪਾਦਕੀ ‘ਸ਼ਾਮਲਾਟ ਜ਼ਮੀਨ ਦੀ ਖ਼ਰੀਦ’ ਦੇ ਹਵਾਲੇ ਨਾਲ ਗੱਲ ਇਹ ਹੈ ਕਿ ਪੰਜਾਬ ਸਰਕਾਰ ਨੇ ਪਹਿਲਾਂ ਸਨਅਤੀ ਫ਼ੋਕਲ ਪੁਆਇੰਟ ਬਣਾਉਣ ਖਾਤਰ ਕਿਸਾਨਾਂ ਦੀ ਹਜ਼ਾਰਾਂ ਕਿੱਲੇ ਪੈਲ਼ੀ ਖੋਹੀ ਪਰ ਦਹਾਕਿਆਂ ਤਕ ਵੀ ਉੱਥੇ ਸਨਅਤਾਂ ਨਹੀਂ ਲੱਗੀਆਂ, ਫਿਰ ਇਹ ਜ਼ਮੀਨਾਂ ਕੌਡੀਆਂ ਦੇ ਭਾਅ ਕਾਰਪੋਰੇਟ ਘਰਾਣੇ ਰਿਲਾਇੰਸ ਨੂੰ ਬਿਨਾਂ ਕਿਸੇ ਟੈਂਡਰ ਜਾਂ ਬੋਲੀ ਤੋਂ ਚੁੱਪ-ਚੁਪੀਤੇ ਲੁਟਾ ਦਿੱਤੀਆਂ, ਨਾਲ ਦੀ ਨਾਲ ਪੰਚਾਇਤੀ ਜ਼ਮੀਨਾਂ ਵੀ ਇਸੇ ਘਰਾਣੇ ਨੂੰ ਦਿਵਾਉਣ ਦਾ ਅਹਿਦ ਕੀਤਾ। ਇਸ ਤੋਂ ਪਹਿਲਾਂ 3 ਜੂਨ 2006 ਨੂੰ ਕੈਪਟਨ ਅਮਰਿੰਦਰ ਸਿੰਘ ਨੇ ਬਤੌਰ ਮੁੱਖ ਮੰਤਰੀ ਐਲਾਨ ਕੀਤਾ ਸੀ ਕਿ ‘ਰਿਲਾਇੰਸ 2010 ਤਕ ਪੰਜਾਬ ਦੇ ਸਾਰੇ ਪਿੰਡਾਂ ਨੂੰ ਕਲਾਵੇ ’ਚ ਲਵੇਗਾ’। ਇਸ ਐਲਾਨ ਨੂੰ ਜੇ ਹੁਣ ਸਮਝਿਆ ਜਾਵੇ ਤਾਂ ਇਹਦਾ ਇਹੀ ਮਤਲਬ ਬਣਦਾ ਹੈ ਕਿ ਪੰਜਾਬ ਦੇ ਸਾਰੇ ਪਿੰਡਾਂ ਦੀ ਪੰਚਾਇਤੀ ਜ਼ਮੀਨ ਰਿਲਾਇੰਸ ਦੇ ਕਬਜ਼ੇ ਹੇਠ ਹੋਵੇਗੀ। ਹੁਣ ਜੇ ਇਨ੍ਹਾਂ ਦੋਹਾਂ ਤੱਥਾਂ ਨੂੰ ਜੋੜ ਕੇ ਪੜ੍ਹਿਆ ਜਾਵੇ ਤਾਂ ਇਹਦੇ ਪੇਸ਼ੇ ਨਜ਼ਰ ਹੁਣ ਵੀ ਪੰਚਾਇਤੀ ਤੇ ਨਿੱਜੀ ਜ਼ਮੀਨਾਂ ਖੋਹ ਕੇ ਵੱਡੇ ਘਰਾਣਿਆਂ ’ਤੇ ਵਾਰਨ ਦਾ ਮਨਸੂਬਾ ਉੱਘੜਦਾ ਹੈ।
ਗੁਰਪ੍ਰੀਤ ਸਿੰਘ ਮੰਡਿਆਣੀ, ਪਿੰਡ ਮੰਡਿਆਣੀ (ਲੁਧਿਆਣਾ)