ਪੱਤਰ ਪ੍ਰੇਰਕ
ਨਵੀਂ ਦਿੱਲੀ,11 ਜੂਨ
ਯੂਥ ਕਾਂਗਰਸ ਵੱਲੋਂ ਕੇਂਦਰੀ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੂੰ ਮਕਬੂਲ ਕੌਮਾਂਤਰੀ ਉਰਦੂ ਸ਼ਾਇਰ ਮਰਹੂਮ ਗ਼ਾਲਬਿ ਦੀ ਉਹ ਸ਼ਾਇਰੀ ਵਾਲੀ ਕਿਤਾਬ ਕੋਰੀਅਰ ਰਾਹੀਂ ਭੇਟ ਕੀਤੀ, ਜੋ ਸ੍ਰੀ ਰਾਜਨਾਥ ਸਿੰਘ ਨੇ ਗ਼ਲਤ ਤਰੀਕੇ ਨਾਲ ਬੋਲੀ ਸੀ। ਯੂਥ ਆਗੂਆਂ ਨੇ ਕਿਹਾ ਕਿ ਇਹ ਕਿਤਾਬ ਇਸ ਲਈ ਭੇਜੀ ਜਾ ਰਹੀ ਹੈ ਕਿ ਕੇਂਦਰੀ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਉਰਦੂ ਸ਼ਾਇਰੀ ਸਹੀ ਤਰੀਕੇ ਨਾਲ ਸਿੱਖ ਸਕਣ। ਯੂਥ ਆਗੂਆਂ ਮੁਤਾਬਕ ਬੀਤੇ ਦਿਨੀਂ ਗ਼ਾਲਬਿ ਦੀ ਸ਼ਾਇਰੀ ਦਾ ਕਬਾੜਾ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਸੀ, ਜਦੋਂ ਕੇਂਦਰੀ ਮੰਤਰੀ ਉਰਦੂ ਸ਼ਾਇਰੀ ਦਾ ਸਤਿਆਨਾਸ ਕਰ ਗਏ। ਯੂਥ ਕਾਂਗਰਸ ਮੁਤਾਬਕ ਇੰਡੀਅਨ ਯੂਥ ਕਾਂਗਰਸ ਨੇ ਅੱਜ ਕੇਂਦਰੀ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੂੰ ਮਿਰਜ਼ਾ ਗਾਲਬਿ ਦੀ ਕਿਤਾਬ ਦਿੱਤੀ। ਆਈਵਾਈਸੀ ਦੇ ਕੌਮੀ ਇੰਚਾਰਜ ਹਰੀਸ਼ ਪਵਾਰ, ਆਈਵਾਈਸੀ ਦੇ ਰਾਸ਼ਟਰੀ ਇੰਚਾਰਜ ਸ਼ਕਤੀ ਰਾਹੁਲ ਰਾਓ ਅਤੇ ਆਈਵਾਈਸੀ ਦੇ ਕੌਮੀ ਸਕੱਤਰ ਸ੍ਰੀ ਮੁਕੇਸ਼ ਕੁਮਾਰ ਨੇ ਸਪੀਡ ਪੋਸਟ ਰਾਹੀਂ ਕਿਤਾਬ ਕੋਰੀਅਰ ਕੀਤੀ।
