ਪਰਥ, 2 ਜਨਵਰੀ
ਨੋਵਾਕ ਜੋਕੋਵਿਚ ਨੇ ਗੁੱਟ ਦੇ ਦਰਦ ਤੋਂ ਉਭਰਦਿਆਂ ਚੈੱਕ ਗਣਰਾਜ ਦੇ ਜਿਰੀ ਲੇਹੇਕਾ ਨੂੰ 6-1, 6-7 (3), 6-1 ਨਾਲ ਹਰਾ ਦਿੱਤਾ, ਜਿਸ ਦੀ ਮਦਦ ਨਾਲ ਸਰਬੀਆ ਨੇ ਯੂਨਾਈਟਿਡ ਕੱਪ ਮਿਕਸਡ ਟੀਮ ਟੈਨਿਸ ਦੇ ਕੁਆਰਟਰ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ ਹੈ। ਦੁਨੀਆ ਦੇ ਨੰਬਰ ਇਕ ਖਿਡਾਰੀ ਜੋਕੋਵਿਚ ਨੂੰ ਗੁੱਟ ਦੇ ਦਰਦ ਕਾਰਨ ਡਾਕਟਰੀ ਮਦਦ ਲੈਣੀ ਪਈ। ਇਸ ਤੋਂ ਪਹਿਲਾਂ ਵਿੰਬਲਡਨ ਚੈਂਪੀਅਨ ਮਾਰਕੇਟਾ ਵੋਂਡਰੋਸੋਵਾ ਨੇ ਓਲਗਾ ਦਾਨਿਲੋਵਿਚ ਨੂੰ 6-1, 3-6, 6-3 ਨਾਲ ਮਾਤ ਦੇ ਕੇ ਚੈੱਕ ਗਣਰਾਜ ਨੂੰ ਲੀਡ ਦਿਵਾਈ ਸੀ। ਹੋਰ ਮੈਚਾਂ ਵਿੱਚ ਚਿੱਲੀ ਨੇ ਯੂਨਾਨ ਨੂੰ 2-1 ਨਾਲ ਹਰਾਇਆ। ਹੁਣ ਯੂਨਾਨ ਨੂੰ ਕੁਆਰਟਰ ਫਾਈਨਲ ਵਿੱਚ ਪਹੁੰਚਣ ਲਈ ਕੈਨੇਡਾ ਨੂੰ ਹਰਾਉਣਾ ਪਵੇਗਾ। ਉਧਰ ਸਾਬਕਾ ਚੈਂਪੀਅਨ ਅਮਰੀਕਾ ਨੂੰ 2-1 ਨਾਲ ਹਰਾ ਕੇ ਮੇਜ਼ਬਾਨ ਆਸਟਰੇਲੀਆ ਕੁਆਰਟਰ ਫਾਈਨਲ ਵਿੱਚ ਪਹੁੰਚ ਗਿਆ ਹੈ। ਮੈਥਿਊ ਐਬਡੇਨ ਅਤੇ ਸਟੋਰਮ ਹੰਟਰ ਨੇ ਮਿਕਸਡ ਡਬਲਜ਼ ਵਿੱਚ ਜੈਸਿਕਾ ਪੇਗੁਲਾ ਅਤੇ ਰਾਜੀਵ ਰਾਮ ਨੂੰ 6-3, 6 1 ਨਾਲ ਹਰਾਇਆ। ਆਸਟਰੇਲੀਆ 18 ਦੇਸ਼ਾਂ ਦੇ ਮਿਕਸਡ ਟੀਮ ਟੂਰਨਾਮੈਂਟ ਵਿੱਚ ਗਰੁੱਪ ‘ਸੀ’ ’ਚ ਸਿਖਰ ’ਤੇ ਰਿਹਾ। -ਏਪੀ
