ਨਿੱਜੀ ਪੱਤਰ ਪ੍ਰੇਰਕ/ਪੱਤਰ ਪ੍ਰੇਰਕ
ਬਠਿੰਡਾ/ਤਲਵੰਡੀ ਸਾਬੋ, 14 ਫਰਵਰੀ
ਸੀਆਈਏ-1 ਬਠਿੰਡਾ ਦੀ ਪੁਲੀਸ ਨੇ ਕੱਚੇ ਕੇਲਿਆਂ ਨਾਲ ਲੱਦੇ ਟਰੱਕ ’ਚੋਂ ਲੁਕੋਇਆ ਹੋਇਆ 3 ਕੁਇੰਟਲ 15 ਗੱਟਿਆਂ ’ਚ ਬੰਦ ਭੁੱਕੀ ਚੂਰਾ ਪੋਸਤ ਬਰਾਮਦ ਕੀਤਾ ਹੈ। ਇਸ ਮਾਮਲੇ ’ਚ ਦੋ ਮੁਲਜ਼ਮਾਂ ਸਮੇਤ ਟਰੱਕ ਪੁਲੀਸ ਵੱਲੋਂ ਗ੍ਰਿਫ਼ਤ ’ਚ ਲੈ ਲਿਆ ਗਿਆ ਹੈ। ਜਾਣਕਾਰੀ ਅਨੁਸਾਰ ਸੀਆਈਏ ਸਟਾਫ਼ ਦੇ ਕਰਮਚਾਰੀਆਂ ਨੇ ਇਹ ਟਰੱਕ ਤਲਵੰਡੀ ਸਾਬੋ-ਮੌੜ ਦੌਰਾਨ ਗਸ਼ਤ ਦੌਰਾਨ ਕਾਬੂ ਕੀਤਾ। ਸ਼ੱਕ ਪੈਣ ’ਤੇ ਟਰੱਕ ਦੀ ਤਲਾਸ਼ੀ ਲਈ ਗਈ ਤਾਂ ਕੱਚੇ ਕੇਲਿਆਂ ਹੇਠ ਛੁਪਾਏ ਹੋਏ ਨਸ਼ੇ ਦੇ ਗੱਟੇ ਹੱਥ ਲੱਗੇ। ਟਰੱਕ ਦਾ ਨੰਬਰ ਪੀਬੀ 10 ਸੀਡਬਲਿਓ 9535 ਦੱਸਿਆ ਜਾ ਰਿਹਾ ਹੈ। ਇਸ ਸਬੰਧ ’ਚ ਤਲਵੰਡੀ ਸਾਬੋ ਪੁਲੀਸ ਸਟੇਸ਼ਨ ਵਿੱਚ ਮੌਕੇ ’ਤੇ ਫੜ੍ਹੇ ਗਏ ਮੁਲਜ਼ਮਾਂ ਸੰਧੂਰਾ ਸਿੰਘ ਅਤੇ ਬਾਬੂ ਸਿੰਘ (ਦੋਵੇਂ ਵਾਸੀ ਪਿੰਡ ਸੇਲਬਰਾਹ) ਖ਼ਿਲਾਫ਼ ਐਨਡੀਪੀਐਸ ਐਕਟ ਤਹਿਤ ਪਰਚਾ ਦਰਜ ਕਰ ਲਿਆ ਗਿਆ ਹੈ।
