ਪੱਤਰ ਪ੍ਰੇਰਕ
ਦੋਰਾਹਾ, 26 ਮਾਰਚ
ਪਿੰਡ ਬੇਗੋਵਾਲ ਦੇ ਸਰਕਾਰੀ ਹਾਈ ਸਕੂਲ ਵਿੱਚ ਪੁਰਾਣੇ ਵਿਦਿਆਰਥੀ ਅਤੇ ਅਧਿਆਪਕ ਮਿਲਣੀ ਕਰਵਾਈ ਗਈ। ਮਿਲਣੀ ਵਿੱਚ ਸਕੂਲ ਦੇ 100 ਤੋਂ ਵਧੇਰੇ ਪੁਰਾਣੇ ਵਿਦਿਆਰਥੀਆਂ ਨੇ ਹਿੱਸਾ ਲੈਂਦਿਆਂ ਆਪਣੀਆਂ ਪੁਰਾਣੀਆਂ ਯਾਦਾਂ ਸਾਂਝੀਆਂ ਕੀਤੀਆਂ। ਇਸ ਦੌਰਾਨ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਨੇ ਖੂਬ ਹਾਸਾ ਠੱਠਾ ਕੀਤਾ। ਇਸ ਮੌਕੇ ਇਕ ਸੁਸਾਇਟੀ ਬਣਾਉਣ ਦਾ ਸੁਝਾਅ ਵੀ ਪਾਸ ਕੀਤਾ ਗਿਆ ਜਿਸ ਵਿਚ ਲੋੜਵੰਦ ਬੱਚਿਆਂ ਦੀ ਸਹਾਇਤਾ ਅਤੇ ਹੋਰ ਸਮਾਜਿਕ ਕਾਰਜ ਕਰਨ ਦਾ ਉਪਰਾਲਾ ਸ਼ਾਮਲ ਹੈ। ਸਕੂਲ ਦੇ ਸਭ ਤੋਂ ਪੁਰਾਣੇ ਡਰਾਇੰਗ ਮਾਸਟਰ ਪਿਆਰਾ ਸਿੰਘ, ਪਵਨ ਕੁਮਾਰ ਕੌਸ਼ਲ, ਬਲਦੇਵ ਸਿੰਘ, ਚਰਨਦਾਸ, ਕਰਨੈਲ ਸਿੰਘ, ਅਮਰਜੀਤ ਕੌਰ, ਧਨਿੰਦਰ ਪ੍ਰਕਾਸ਼ ਕੌਰ, ਜਗਦੇਵ ਸਿੰਘ ਨੇ ਅਜੋਕੇ ਤੇ ਪੁਰਾਣੇ ਸਮੇਂ ਅੰਦਰ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਦੇ ਨਿੱਘੇ ਰਿਸ਼ਤਿਆਂ ਬਾਰੇ ਗੱਲ ਕੀਤੀ। ਸਟੇਜ ਸਕੱਤਰ ਦੀ ਭੂਮਿਕਾ ਸਤਿੰਦਰਪਾਲ ਸਿੰਘ ਨੇ ਨਿਭਾਈ। ਅਖੀਰ ਪੁਰਾਣੇ ਵਿਦਿਆਰਥੀਆਂ ਤੇ ਅਧਿਆਪਕਾਂ ਨੂੰ ਸਨਮਾਨਿਤ ਕੀਤਾ ਗਿਆ। ਇਸ ਮੌਕੇ ਲਾਲ ਸਿੰਘ ਮਾਂਗਟ, ਰਣਬੀਰ ਸਿੰਘ, ਸੁਖਵਿੰਦਰ ਸਿੰਘ ਤੇ ਹਰਦੀਪ ਕੌਰ ਆਦਿ ਹਾਜ਼ਰ ਸਨ।