ਬਠਿੰਡਾ (ਪੱਤਰ ਪ੍ਰੇਰਕ): ਪਿੰਡ ਦਿਉਣ ਵਿੱਚ ਅੱਜ ਪੰਚਾਇਤ ਵੱਲੋਂ ਢਾਬਾਂ ਵਾਲੇ ਰਾਹ ਦੀ ਨਿਸ਼ਾਨਦੇਹੀ ਲਈ ਸੱਦੇ ਗਏ ਪ੍ਰਸ਼ਾਸਨਕ ਅਧਿਕਾਰੀਆਂ ਨੂੰ ਕਿਸਾਨ ਜਥੇਬੰਦੀਆਂ ਨੇ ਘੇਰ ਕੇ ਨਾਅਰੇਬਾਜ਼ੀ ਸ਼ੁਰੂ ਕਰ ਦਿੱਤੀ। ਗੌਰਤਲਬ ਹੈ ਕਿ ਢਾਬਾਂ ਵਾਲੇ ਖੇਤਾਂ ਨੂੰ ਜਾਂਦੀ ਪਹੀ ’ਤੇ ਕੁਝ ਕਿਸਾਨਾਂ ਵੱਲੋਂ ਕਬਜ਼ਾ ਕੀਤਾ ਹੋਇਆ ਹੈ ਜਿਸ ਨੂੰ ਛਡਵਾਉਣ ਲਈ ਲੰਮੇ ਸਮੇਂ ਤੋਂ ਪੰਚਾਇਤ ਵੱਲੋਂ ਪੈਰਵਾਈ ਕੀਤੀ ਜਾ ਰਹੀ ਸੀ। ਅੱਜ ਜਦੋਂ ਵਾਰੰਟ ਅਫ਼ਸਰ ਬੀਡੀਪੀਓ ਭੁਪਿੰਦਰ ਸਿੰਘ ਕਿਸਾਨਾਂ ਤੋਂ ਕਬਜ਼ਾ ਛੁਡਾਉਣ ਲਈ ਪੁੱਜੇ ਤਾਂ ਕਥਿਤ ਕਬਜ਼ਾਧਾਰਕ ਕਿਸਾਨਾਂ ਨੇ ਨਿਸ਼ਾਨ ਦਹੀ ਦੇ ਠੱਡੇ ਹਿਲਣ ਦਾ ਕਹਿ ਕੇ ਉਨ੍ਹਾਂ ਨੂੰ ਰੋਕ ਦਿੱਤਾ ਗਿਆ ਪਰ ਜਦੋਂ ਬੀਡੀਪੀਓ ਬਿਨਾਂ ਕਬਜ਼ਾ ਛੁਡਾਏ ਵਾਪਸ ਜਾਣ ਲੱਗੇ ਤਾਂ ਮੌਕੇ ’ਤੇ ਪੁੱਜੇ ਬੀਕੇਯੂ ਉਗਰਾਹਾਂ ਦੇ ਝੰਡੇ ਹੇਠ ਸੁਖਜੀਵਨ ਸਿੰਘ ਬਬਲੀ, ਗੁਰਪਾਲ ਸਿੰਘ ਦਿਉਣ ਦੀ ਅਗਵਾਈ ਹੇਠ ਬੀਡੀਪੀਓ ਦਾ ਘਿਰਾਓ ਕਰਦੇ ਹੋਏ ਸ੍ਰੀ ਮੁਕਤਸਰ ਸਾਹਿਬ ਨੂੰ ਜਾਣ ਵਾਲੀ ਸੜਕ ’ਤੇ ਧਰਨਾ ਲਾ ਦਿੱਤਾ। ਕਿਸਾਨ ਧਿਰਾਂ ਵੱਲੋਂ ਨਾਅਰੇਬਾਜ਼ੀ ਨੂੰ ਦੇਖਦਿਆਂ ਨਾਇਬ ਤਹਿਸੀਲਦਾਰ ਹਰਪ੍ਰੀਤ ਕੌਰ ਅਤੇ ਡੀਐੱਸਪੀ ਮਨਜੀਤ ਸਿੰਘ ਨੇ ਪਹੁੰਚ ਕੇ ਕਿਸਾਨ ਜਥੇਬੰਦੀ ਨਾਲ ਗੱਲਬਾਤ ਕੀਤੀ ਪਰ ਜਥੇਬੰਦੀ ਰਾਹ ਨੂੰ ਚਾਲੂ ਕਰਵਾਉਣ ਲਈ ਅੜੀ ਰਹੀ। ਦੇਰ ਸ਼ਾਮ ਤੱਕ ਚੱਲੇ ਧਰਨੇ ਤੋਂ ਬਾਅਦ ਮਾਮਲਾ ਹੱਲ ਕਰ ਲਿਆ ਗਿਆ ਹੈ। ਤਹਿਸੀਲਦਾਰ ਬਠਿੰਡਾ ਸ੍ਰੀ ਪਰਮਜੀਤ ਸਿੰਘ ਬਰਾੜ ਨੇ ਦੱਸਿਆ ਕਿ ਨਿਸ਼ਾਨਦੇਹੀ ਦੇ ਆਧਾਰ ’ਤੇ ਰਸਤੇ ਤੋਂ ਕਬਜ਼ਾ ਛੁਡਾਇਆ ਜਾ ਰਿਹਾ ਹੈ।