ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 8 ਜੁਲਾਈ
ਦਿੱਲੀ ਨਗਰ ਨਿਗਮ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਐੱਮਸੀਡੀ ਨੇ ਪੂਰੇ ਸ਼ਹਿਰ ਵਿੱਚ 28 ਕੂੜਾ ਸਥਾਨਾਂ ਨੂੰ ਸਫਲਤਾਪੂਰਵਕ ਖਤਮ ਕਰ ਦਿੱਤਾ ਹੈ ਅਤੇ ਇਨ੍ਹਾਂ ਸਥਾਨਾਂ ’ਤੇ ਕੂੜਾ ਸੰਭਾਲਣ ਵਾਲੇ ਉਪਕਰਣ ਲਗਾਉਣ ਲਈ ਪ੍ਰਾਜੈਕਟਾਂ ਲਈ ਪ੍ਰਸਤਾਵ ਮੰਗੇ ਗਏ ਹਨ। ਕਰੋਲ ਬਾਗ ਜ਼ੋਨ ਵਿੱਚ ਕੂੜਾ ਚੁੱਕਣ ਵਾਲੇ 14 ਵਿੱਚੋਂ ਤਿੰਨ ਪੁਆਇੰਟਾਂ ਨੂੰ ਪੇਂਟਿੰਗਾਂ, ਪੌਦਿਆਂ ਅਤੇ ਡੱਬਿਆਂ ਨਾਲ ਸੁੰਦਰ ਬਣਾਇਆ ਗਿਆ ਹੈ। ਨਗਰ ਨਿਗਮ ਨੇ ਫਿਕਸਡ ਕੰਪੈਕਟਰ ਟਰਾਂਸਫਰ ਸਟੇਸ਼ਨ ਮਸ਼ੀਨਾਂ ਵਰਗੇ ਕੂੜਾ-ਕਰਕਟ ਸੰਭਾਲਣ ਵਾਲੇ ਉਪਕਰਨ ਲਗਾਉਣ ਲਈ ਪ੍ਰਸਤਾਵ ਮੰਗੇ ਹਨ। ਮੇਅਰ ਸ਼ੈਲੀ ਓਬਰਾਏ ਨੇ ਕਿਹਾ ਕਿ ਐੱਮਸੀਡੀ ਜ਼ੋਨ ਸਵੱਛਤਾ ਵਿੱਚ ਸੁਧਾਰ ਲਈ ਮਹੱਤਵਪੂਰਨ ਕਦਮ ਚੁੱਕ ਰਹੇ ਹਨ। ਵੱਖ-ਵੱਖ ਜ਼ੋਨਾਂ ਦੇ ਅਧਿਕਾਰੀਆਂ ਨੂੰ ਬਾਕੀ ਥਾਵਾਂ ਦੇ ਖਾਤਮੇ ਅਤੇ ਸੁੰਦਰੀਕਰਨ ਦੀ ਨਿਗਰਾਨੀ ਕਰਨ ਲਈ ਨੋਡਲ ਅਫਸਰ ਨਿਯੁਕਤ ਕਰਨ ਲਈ ਨਿਰਦੇਸ਼ ਦਿੱਤੇ ਗਏ ਹਨ। ਉਨ੍ਹਾਂ ਦੱਸਿਆ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਜ਼ਿਆਦਾ ਥਾਂ ਸਾਫ਼ ਕੀਤੇ ਗਏ ਹਨ। ਪੱਛਮੀ ਦਿੱਲੀ ਜ਼ੋਨ ਵਿੱਚ 12 ਵਿੱਚੋਂ ਸੱਤ ਥਾਵਾਂ ਨੂੰ ਖਤਮ ਕਰ ਦਿੱਤਾ ਗਿਆ ਹੈ ਤੇ ਦੋ ਮਾਮੂਲੀ ਪੁਆਇੰਟਾਂ ਵਿੱਚ ਹੁਣ 24 ਘੰਟਿਆਂ ਦੇ ਅੰਦਰ ਕੂੜਾ ਇਕੱਠਾ ਹੁੰਦਾ ਹੈ। ਇਸੇ ਤਰ੍ਹਾਂ ਕਰੋਲ ਬਾਗ ਜ਼ੋਨ ਵਿੱਚ, 14 ਵਿੱਚੋਂ ਤਿੰਨ ਥਾਵਾਂ ਨੂੰ ਪੇਂਟਿੰਗਾਂ, ਪੌਦਿਆਂ ਅਤੇ ਡੱਬਿਆਂ ਨਾਲ ਸੁੰਦਰ ਬਣਾਇਆ ਗਿਆ ਹੈ। ਸ਼ਾਹਦਰਾ ਦੱਖਣੀ ਜ਼ੋਨ ਵਿੱਚ, 15 ਵਿੱਚੋਂ 14 ਨੂੰ ਸਾਫ਼ ਕਰ ਦਿੱਤਾ ਗਿਆ ਹੈ, ਜਦੋਂ ਕਿ ਦੱਖਣੀ ਦਿੱਲੀ ਜ਼ੋਨ ਵਿੱਚ, 33 ਵਿੱਚੋਂ ਤਿੰਨ ਨੂੰ ਸੁੰਦਰ ਬਣਾਇਆ ਗਿਆ ਹੈ ਤੇ ਬਾਕੀ ਪੁਆਇੰਟਾਂ ਨੂੰ ਸਾਫ਼ ਕਰਨ ਲਈ ਕੰਮ ਚੱਲ ਰਿਹਾ ਹੈ। ਕੇਂਦਰੀ ਦਿੱਲੀ ਜ਼ੋਨ ਨੇ 17 ਵਿੱਚੋਂ ਇੱਕ ਨੂੰ ਖਤਮ ਕਰ ਦਿੱਤਾ ਹੈ, ਜਿਸ ਵਿੱਚ 24 ਘੰਟਿਆਂ ਦੇ ਅੰਦਰ ਦੋ ਤੋਂ ਤਿੰਨ ਪੁਆਇੰਟਾਂ ਤੱਕ ਕੂੜਾ ਇਕੱਠਾ ਕੀਤਾ ਜਾ ਰਿਹਾ ਹੈ।
