ਪੱਤਰ ਪ੍ਰੇਰਕ
ਧੂਰੀ, 22 ਜੁਲਾਈ
ਪਿੰਡ ਮਾਹਮਦਪੁਰ ਦੇ ਸਾਬਕਾ ਸਰਪੰਚ ਗੁਰਮੀਤ ਸਿੰਘ ਫੌਜੀ ਨੂੰ ਇੱਕ ਫਾਇਨਾਂਸ ਕੰਪਨੀ ਦੇ ਮੋਹਰੀਆਂ ਵੱਲੋਂ ਕਥਿਤ ਦੁਰਵਿਵਹਾਰ ਕਰਨ ਅਤੇ ਜਾਤੀਸੂਚਕ ਸ਼ਬਦ ਬੋਲਣ ਵਿਰੁੱਧ ਮਾਮਲਾ ਡੀਆਈਜੀ ਪਟਿਆਲਾ ਕੋਲ ਪੁੱਜਣ ਮਗਰੋਂ ਇਸ ਮਾਮਲੇ ਦੀ ਜਾਂਚ ਹੁਣ ਡੀਐੱਸਪੀ ਧੂਰੀ ਤਲਵਿੰਦਰ ਸਿੰਘ ਕਰਨਗੇ। ਅੱਜ ਬੀਕੇਯੂ ਡਕੌਂਦਾ (ਧਨੇਰ) ਦੇ ਜ਼ਿਲ੍ਹਾ ਪ੍ਰਧਾਨ ਕਰਮਜੀਤ ਸਿੰਘ ਛੰਨਾ ਦੀ ਅਗਵਾਈ ਹੇਠ ਵਫਦ ਨੇ ਡੀਐੱਸਪੀ ਧੂਰੀ ਨਾਲ ਮੁਲਾਕਾਤ ਕਰਕੇ ਸਾਬਕਾ ਸਰਪੰਚ ਲਈ ਇਨਸਾਫ਼ ਦੀ ਮੰਗ ਕੀਤੀ।
ਛੰਨਾ ਨੇ ਦੱਸਿਆ ਕਿ ਤਕਰੀਬਨ ਪੰਜ ਛੇ ਸਾਲ ਪਹਿਲਾਂ ਸਾਬਕਾ ਸਰਪੰਚ ਨੇ ਸ਼ੇਰਪੁਰ ਤੋਂ ਮੋਟਰਸਾਈਕਲ ਲਿਆ ਜਿਸ ਦਾ ਫਾਇਨਾਂਸ ਇੱਕ ਮਾਲੇਕੋਟਲਾ ਦੀ ਕੰਪਨੀ ਵੱਲੋਂ ਕੀਤਾ ਗਿਆ। ਸਾਬਕਾ ਸਰਪੰਚ ਨੇ ਮੋਟਰਸਾਈਕਲ ਦਾ 26 ਹਜ਼ਾਰ ਰੁਪਏ ਭਰ ਦਿੱਤੇ ਅਤੇ ਫਿਰ ਕਰੋਨਾ ਕਾਰਨ ਕਿਸ਼ਤਾਂ ਟੁੱਟ ਗਈਆਂ। ਕਿਸਾਨ ਆਗੂ ਛੰਨਾ ਅਨੁਸਾਰ ਜਦੋਂ ਉਹ ਫਾਈਨਾਂਸਰ ਦੇ ਮਾਲੇਰਕੋਟਲਾ ਦਫ਼ਤਰ ਗਏ ਤਾਂ ਉਨ੍ਹਾਂ ਸਾਰੇ ਪਤਵੰਤਿਆਂ ਦੀ ਹਾਜ਼ਰੀ ਵਿੱਚ ਸਾਬਕਾ ਸਰਪੰਚ ਨਾਲ ਕਥਿਤ ਦੁਰਵਿਵਹਾਰ ਕਰਦਿਆਂ ਜਾਤੀਸੂਚਕ ਸ਼ਬਦ ਬੋਲੇ। ਕਿਸਾਨ ਆਗੂ ਨੇ ਦੱਸਿਆ ਕਿ ਪਹਿਲਾਂ ਮਾਲੇਰਕੋਟਲਾ ਵਿਖੇ ਹੋਈ ਇਨਕੁਆਰੀ ਵਿੱਚ ਕਥਿਤ ਰਾਜਸੀ ਪ੍ਰਭਾਵ ਦੌਰਾਨ ਪੁਲੀਸ ਨੇ ਦਲਿਤ ਸਰਪੰਚ ਨੂੰ ਇਨਸਾਫ਼ ਦੇਣ ਦੀ ਥਾਂ ਕਥਿਤ ਤੌਰ ’ਤੇ ਡਾਹਢਿਆਂ ਦਾ ਪੱਖ ਪੂਰਿਆ। ਆਗੂ ਨੇ ਪੁਲੀਸ ਨੂੰ ਤਿੰਨ ਦਿਨ ਦਾ ਸਮਾਂ ਦਿੰਦਿਆਂ ਕਿਹਾ ਕਿ ਜੇ ਕਿਸੇ ਅਗਿਆਤ ਪ੍ਰਭਾਵ ਕਾਰਨ ਸਾਬਕਾ ਸਰਪੰਚ ਨੂੰ ਇਨਸਾਫ਼ ਦੇਣ ਵਿੱਚ ਆਨਾਕਾਨੀ ਹੋਈ ਤਾ ਕਿਸਾਨ ਜਥੇਬੰਦੀ ਸੰਘਰਸ਼ ਦੇ ਰਾਹ ਪਵੇਗੀ। ਡੀਐਸਪੀ ਧੂਰੀ ਤਲਵਿੰਦਰ ਸਿੰਘ ਨੇ ਸੰਪਰਕ ਕਰਨ ’ਤੇ ਉਨ੍ਹਾਂ ਵਫ਼ਦ ਨਾਲ ਹੋਈ ਮੀਟਿੰਗ ਦੀ ਪੁਸ਼ਟੀ ਕੀਤੀ।