ਰਵਿੰਦਰ ਰਵੀ
ਬਰਨਾਲਾ, 21 ਅਗਸਤ
ਦੋ ਬਿਲੀਅਨ ਅਮਰੀਕੀ ਡਾਲਰ ਦੇ ਸਾਲਾਨਾ ਕਾਰੋਬਾਰ ਵਾਲੇ ਗਲੋਬਲ ਟਰਾਈਡੈਂਟ ਗਰੁੱਪ ਨੇ ਆਪਣਾ ਪ੍ਰਮੁੱਖ ਭਰਤੀ ਅਤੇ ਸਿਖਲਾਈ ਪ੍ਰੋਗਰਾਮ ‘ਤਕਸ਼ਿਲਾ’ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਪ੍ਰੋਗਰਾਮ ਦਾ ਉਦੇਸ਼ ਰੁਜ਼ਗਾਰ ਅਤੇ ਹੁਨਰ ਵਿਕਾਸ ਨੂੰ ਧਿਆਨ ’ਚ ਰੱਖਦਿਆਂ ਪੇਂਡੂ ਅਤੇ ਅਰਧ-ਸ਼ਹਿਰੀ ਭਾਰਤ ਦੇ 2000 ਪ੍ਰਵੇਸ਼-ਪੱਧਰ ਦੇ ਕਰਮਚਾਰੀਆਂ ਦੀ ਭਰਤੀ ਅਤੇ ਸਿਖਲਾਈ ਕਰਨਾ ਹੈ। ਇਹ ਪ੍ਰੋਗਰਾਮ ਨੌਜਵਾਨਾਂ ਲਈ ਇੱਕ ਪਲੇਟਫਾਰਮ ਪੇਸ਼ ਕਰਦਾ ਹੈ, ਜਿਸ ਵਿੱਚ ਆਈਟੀਆਈ, ਡਿਪਲੋਮੇ ਅਤੇ 10+2 ਸਿੱਖਿਆ ਸ਼ਾਮਲ ਹੈ। ਆਮ ਤਨਖ਼ਾਹ ਰੇਂਜ ਪੋਸਟ ਟਰੇਨਿੰਗ 12 ਲੱਖ ਪ੍ਰਤੀ ਸਾਲਾਨਾ ਤੋਂ ਸ਼ੁਰੂ ਹੁੰਦੀ ਹੈ। ਇਹ ਬੁਨਿਆਦੀ ਸਿੱਖਿਆ ਪਿਛੋਕੜ ਦੇ ਨਾਲ ਰਿਹਾਇਸ਼ ਅਤੇ ਰੋਜ਼ੀ-ਰੋਟੀ ਦੇ ਮੌਕੇ ਪ੍ਰਦਾਨ ਕਰਦਾ ਹੈ, ਜੋ ਕਿ ਕਾਰਪੋਰੇਟ ਭਾਰਤ ਵਿੱਚ ਵਿਲੱਖਣ ਅਤੇ ਆਪਣੀ ਕਿਸਮ ਦੀ ਅਨੋਖੀ ਪਹਿਲ ਹੈ। ਟਰਾਈਡੈਂਟ ਗਰੁੱਪ ਦੇ ਐਮਰੀਟਸ ਚੇਅਰਮੈਨ, ਪਦਮਸ੍ਰੀ ਰਜਿੰਦਰ ਗੁਪਤਾ ਨੇ ਕਿਹਾ ਕਿ ਇਹ ਪ੍ਰੋਗਰਾਮ ਸਮਾਜਿਕ ਵਿਕਾਸ, ਆਰਥਿਕ ਉਨਤੀ, ਵਿਭਿੰਨਤਾ, ਸਮਾਵੇਸ਼ ਅਤੇ ਰਾਸ਼ਟਰ ਨਿਰਮਾਣ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਤਿਆਰ ਕੀਤਾ ਗਿਆ ਹੈ।
ਇਸ ਲਈ ਔਰਤਾਂ (50 ਫ਼ੀਸਦੀ ਰਾਖਵੀਂਆਂ ਸੀਟਾਂ ਦੇ ਨਾਲ), ਪੇਂਡੂ ਅਤੇ ਆਰਥਿਕ ਤੌਰ ’ਤੇ ਕਮਜ਼ੋਰ ਪਰਿਵਾਰਾਂ, ਰੱਖਿਆ ਸੇਵਾ ਦੇ ਸਾਬਕਾ ਸੈਨਿਕਾਂ ਅਤੇ ਰਾਸ਼ਟਰੀ ਪੱਧਰ ਦੇ ਖੇਡ ਖਿਡਾਰੀਆਂ ਨੂੰ ਵਿਸ਼ੇਸ਼ ਤਰਜੀਹ ਦਿੱਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਤਕਸ਼ਿਲਾ ਪਹਿਲਕਦਮੀ ਨੇ ਨਿਮਰ ਪਿਛੋਕੜ ਵਾਲੇ 20,000 ਤੋਂ ਵੱਧ ਵਿਅਕਤੀਆਂ ਨੂੰ ਰੁਜ਼ਗਾਰ ਦਿੱਤਾ ਹੈ। ਇਸ ਪ੍ਰੋਗਰਾਮ ਰਾਹੀਂ ਕਈ ਸਮਾਗਮ ਉਲੀਕੇ ਜਾਣਗੇ, ਜਿਸ ਤਹਿਤ 50,000 ਤੋਂ ਵੱਧ ਬਿਨੈਕਾਰਾਂ ਤੱਕ ਪਹੁੰਚਣ ਦਾ ਉਪਰਾਲਾ ਹੈ। ਇਸ ਤਹਿਤ ਰੁਜ਼ਗਾਰ ਅਤੇ ਸਿਖਲਾਈ ਦਿੱਤੀ ਜਾਵੇਗੀ।
