ਪੱਤਰ ਪ੍ਰੇਰਕ
ਸ਼ਾਹਕੋਟ, 30 ਅਗਸਤ
ਤਹਿਸੀਲ ਦੇ ਦੋ ਪਿੰਡਾਂ ਵਿਚ ਅਸਮਾਨੀ ਬਿਜਲੀ ਡਿੱਗਣ ਕਾਰਨ ਕਰੀਬ 20 ਬਿਜਲੀ ਦੇ ਮੀਟਰ ਸੜ ਗਏ। ਇਸ ਦੌਰਾਨ ਗੁਰਦੁਆਰੇ ਅਤੇ 5 ਘਰਾਂ ਦੇ ਬਿਜਲੀ ਉਪਕਰਣਾਂ ਦਾ ਵੀ ਨੁਕਸਾਨ ਹੋਇਆ। ਪ੍ਰਾਪਤ ਹੋਈ ਜਾਣਕਾਰੀ ਮੁਤਾਬਕ ਸੁਰੈਣ ਸਿੰਘ ਵਾਸੀ ਕੋਠਾ ਦੇ ਘਰ ’ਤੇ ਅਸਮਾਨੀ ਬਿਜਲੀ ਡਿੱਗਣ ਕਾਰਨ ਪਿੰਡ ਦਾ ਟਰਾਂਸਫਾਰਮਰ ਸੜ ਗਿਆ। ਇਸਦੌਰਾਨ ਸੁਰਜਣ ਸਿੰਘ ਜੱਜ ਦੇ ਘਰ ਦੀ ਪਾਣੀ ਵਾਲੀ ਮੋਟਰ, ਮੋਟਰ ਦਾ ਸਵਿੱਚ, ਸਟਾਰਟਰ ਅਤੇ ਘਰ ਦੀ ਸਾਰੀ ਫਿਟਿੰਗ ਵੀ ਸੜ ਗਈ। ਉਧਰ ਪਿੰਡ ਦਾਨੇਵਾਲ ਵਿੱਚ ਅਸਮਾਨੀ ਬਿਜਲੀ ਡਿੱਗਣ ਕਾਰਨ ਲੋਕਾਂ ਦੇ ਘਰਾਂ ਤੋਂ ਬਾਹਰ ਬਕਸਿਆਂ ਵਿਚ ਲਾਏ ਕਰੀਬ 20 ਬਿਜਲੀ ਦੇ ਮੀਟਰ ਅਤੇ ਘਰਾਂ ਦੇ ਬਿਜਲੀ ਦੇ ਉਪਕਰਨ ਸੜ ਗਏ।