ਵਾਰਾਨਸੀ
ਕੁਸ਼ਤੀ ਫੈਡਰੇਸ਼ਨ ਦੇ ਪ੍ਰਧਾਨ ਸੰਜੇ ਸਿੰਘ ਨੇ ਕਿਹਾ ਕਿ ਪਹਿਲਵਾਨਾਂ ਵਿਨੇਸ਼ ਫੋਗਾਟ ਅਤੇ ਬਜਰੰਗ ਪੂਨੀਆ ਦੇ ਕਾਂਗਰਸ ’ਚ ਸ਼ਾਮਲ ਹੋਣ ਨਾਲ ਸਾਬਤ ਹੋ ਗਿਆ ਹੈ ਕਿ ਪਹਿਲਵਾਨਾਂ ਦੇ ਪ੍ਰਦਰਸ਼ਨ ਦੇ ਸਾਜ਼ਿਸ਼ਘਾੜੇ ਦੀਪੇਂਦਰ ਹੁੱਡਾ ਅਤੇ ਹੁੱਡਾ ਪਰਿਵਾਰ ਸਨ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਦੀ ਸ਼ਹਿ ’ਤੇ ਪਹਿਲਵਾਨਾਂ ਨੇ ਅੰਦੋਲਨ ਕੀਤਾ ਸੀ। ਸੰਜੇ ਸਿੰਘ ਨੇ ਕਿਹਾ ਕਿ ਅੰਦੋਲਨ ਦੀ ਨੀਂਹ ਉਸ ਸਮੇਂ ਹੀ ਪੈ ਗਈ ਸੀ ਜਦੋਂ ਪ੍ਰਧਾਨ ਮੰਤਰੀ ਨੇ ਬ੍ਰਿਜ ਭੂਸ਼ਣ ਦੀ ਸ਼ਲਾਘਾ ਕਰਦਿਆਂ ਕਿਹਾ ਸੀ ਕਿ ਕੁਸ਼ਤੀ ਸੁਰੱਖਿਅਤ ਹੱਥਾਂ ’ਚ ਹੈ। ਉਨ੍ਹਾਂ ਕਿਹਾ ਕਿ ਓਲੰਪਿਕਸ ’ਚ ਕੁਸ਼ਤੀ ’ਚ 4-5 ਤਗ਼ਮੇ ਆਉਣੇ ਸਨ ਪਰ ਅੰਦੋਲਨ ਕਾਰਨ ਇਹ ਨਹੀਂ ਆ ਸਕੇ। ਉਨ੍ਹਾਂ ਮੁਤਾਬਕ ਦੋ ਸਾਲ ਤੱਕ ਕੁਸ਼ਤੀ ਦੀਆਂ ਸਰਗਰਮੀਆਂ ਨਹੀਂ ਹੋਈਆਂ ਜਿਸ ਕਾਰਨ ਕੁਝ ਹੀ ਤਗ਼ਮੇ ਆਏ। -ਏਐੱਨਆਈ