ਕੀਵ, 15 ਸਤੰਬਰ
ਰੂਸ ਅਤੇ ਯੂਕਰੇਨ ਨੇ ਸ਼ਨਿਚਰਵਾਰ ਅਤੇ ਐਤਵਾਰ ਦੀ ਦਰਮਿਆਨੀ ਰਾਤ ਨੂੰ ਇਕ-ਦੂਜੇ ’ਤੇ ਮਿਜ਼ਾਈਲਾਂ ਅਤੇ ਡਰੋਨ ਦਾਗ਼ੇ। ਰੂਸ ਵੱਲੋਂ ਯੂਕਰੇਨੀ ਬੰਦਰਗਾਹ ਸ਼ਹਿਰ ਓਡੇਸਾ ’ਤੇ ਕੀਤੇ ਗਏ ਮਿਜ਼ਾਈਲ ਹਮਲੇ ’ਚ ਦੋ ਵਿਅਕਤੀ ਮਾਰੇ ਗਏ। ਯੂਕਰੇਨੀ ਹਵਾਈ ਫੌਜ ਨੇ ਕਿਹਾ ਕਿ ਉਨ੍ਹਾਂ 14 ’ਚੋਂ 10 ਡਰੋਨ ਮਾਰ ਸੁੱਟੇ ਜਦਕਿ ਤਿੰਨ ਮਿਜ਼ਾਈਲਾਂ ’ਚੋਂ ਇਕ ਨੂੰ ਹਵਾ ’ਚ ਹੀ ਫੁੰਡ ਦਿੱਤਾ ਗਿਆ। ਓਡੇਸਾ ਦੇ ਗਵਰਨਰ ਓਲੇਹ ਕਿਪਰ ਨੇ ਕਿਹਾ ਕਿ ਸ਼ਨਿਚਰਵਾਰ ਰਾਤ ਹੋਏ ਹਮਲੇ ’ਚ ਇਕ ਵਿਆਹਿਆ ਜੋੜਾ ਮਾਰਿਆ ਗਿਆ ਜਦਕਿ ਇਕ ਹੋਰ ਵਿਅਕਤੀ ਜ਼ਖ਼ਮੀ ਹੋ ਗਿਆ। ਉਧਰ ਰੂਸੀ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਉਨ੍ਹਾਂ ਐਤਵਾਰ ਵੱਡੇ ਤੜਕੇ 29 ਯੂਕਰੇਨ ਡਰੋਨ ਮਾਰ ਸੁੱਟੇ ਅਤੇ ਮਲਬਾ ਡਿੱਗਣ ਕਾਰਨ ਕੋਈ ਨੁਕਸਾਨ ਨਹੀਂ ਹੋਇਆ। ਉਨ੍ਹਾਂ ਕਿਹਾ ਕਿ ਪੱਛਮੀ ਰਿਆਜ਼ਾਨ ਖ਼ਿੱਤੇ ’ਚ ਜਵਾਨਾਂ ਨੇ ਇਕ ਯੂਕਰੇਨੀ ਡਰੋਨ ਫੁੰਡਿਆ। -ਏਪੀ