ਜਸਬੀਰ ਸਿੰਘ ਚਾਨਾ
ਫਗਵਾੜਾ, 15 ਅਕਤੂਬਰ
ਜਲੰਧਰ ਤੋਂ ਫਗਵਾੜਾ ਵੱਲ ਆ ਰਹੀ ਮਜ਼ਦੂਰਾਂ ਦੀ ਭਰੀ ਗੱਡੀ ਦੇ ਡਰਾਈਵਰ ਵੱਲੋਂ ਚਹੇੜੂ ਲਾਗੇ ਬਰੇਕ ਲਗਾਉਣ ਕਾਰਨ ਪਿੱਛੋਂ ਆ ਰਹੀ ਬੱਸ ਟਕਰਾ ਗਈ। ਇਸ ਹਾਦਸੇ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਜਦਕਿ ਪੰਜ ਜ਼ਖਮੀ ਹੋ ਗਏ ਜਿਨ੍ਹਾਂ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਲਿਆਂਦਾ ਗਿਆ।
ਪ੍ਰਾਪਤ ਜਾਣਕਾਰੀ ਮੁਤਾਬਕ ਇਹ ਮਜ਼ਦੂਰ ਰੇਲਵੇ ਦੇ ਠੇਕੇਦਾਰ ਦਾ ਕੰਮ ਕਰ ਰਹੇ ਸਨ ਅਤੇ ਕੰਮ ਕਰਨ ਲਈ ਗੱਡੀ ਰਾਹੀਂ ਜਾ ਰਹੇ ਸਨ। ਜਿਸ ਥਾਂ ’ਤੇ ਕੰਮ ਕਰਨਾ ਸੀ ਤਾਂ ਉੱਥੇ ਗੱਡੀ ਨੇ ਸਾਈਡ ’ਤੇ ਬਰੇਕ ਲਗਾ ਦਿੱਤੀ। ਇਸੇ ਦੌਰਾਨ ਚੰਡੀਗੜ੍ਹ ਜਾ ਰਹੀ ਪੀ.ਆਰ.ਟੀ.ਸੀ ਦੀ ਬੱਸ ਇਸ ’ਚ ਟਕਰਾ ਗਈ।
ਐੱਸ.ਐੱਸ.ਐੱਫ. ਫੋਰਸ ਦੇ ਥਾਣੇਦਾਰ ਮੱਖਣ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕ ਦੀ ਪਛਾਣ ਗੌਤਮ ਗੁਪਤਾ (31) ਵਜੋਂ ਹੋਈ ਹੈ ਜਦਕਿ ਜ਼ਖਮੀਆਂ ਦੀ ਪਛਾਣ ਸੁਰਿੰਦਰ ਸਿੰਘ, ਪ੍ਰੇਮ ਬਾਬੂ ਗੁਪਤਾ, ਰਵਿੰਦਰ ਸਿੰਘ ਪੁੱਤਰ ਜਗਦੀਸ਼ ਸਿੰਘ ਵਾਸੀ ਦਿੱਲੀ, ਭੁਪਿੰਦਰ ਸਿੰਘ ਪੁੱਤਰ ਉਦੈ ਸ਼ੰਕਰ ਵਾਸੀ ਰੇਲਵੇ ਹੈੱਡਕੁਆਰਟਰ ਜਲੰਧਰ ਤੇ ਗੱਡੀ ਡਰਾਈਵਰ ਅਜੀਤ ਸਿੰਘ ਪੁੱਤਰ ਸੁਰਿੰਦਰ ਸਿੰਘ ਵਾਸੀ ਮਕਸੂਦਾ ਮੰਡੀ ਸ਼ਾਮਲ ਸਨ।