ਪੱਤਰ ਪ੍ਰੇਰਕ
ਟੋਹਾਣਾ, 20 ਨਵੰਬਰ
ਇੱਥੇ ਜਾਖਲ ਦੀ ਬੱਬਰਾਂ ਰੋਡ ’ਤੇ ਆਂਗਣਵਾੜੀ ਸੈਂਟਰ ’ਤੇ ਦਿਨ-ਦਿਹਾੜੇ ਦੋ ਲੁਟੇਰਿਆਂ ਨੇ ਮਹਿਲਾ ਕਰਮਚਾਰੀਆਂ ਨੂੰ ਕਮਰੇ ਵਿੱਚ ਬੰਦ ਕਰ ਕੇ ਨਕਦੀ ਤੇ ਅਨਾਜ ਲੁੱਟ ਲਿਆ। ਇਸ ਸਬੰਘੀ ਸੂਚਨਾ ਪੁਲੀਸ ਨੂੰ ਦਿੱਤੀ ਗਿਈ। ਵਾਰਦਾਤ ਦੀ ਸੂਚਨਾ ਮਿਲਦਿਆਂ ਹੀ ਪੁਲੀਸ ਟੀਮ ਮੌਕੇ ’ਤੇ ਪੁੱਜੀ। ਆਂਗਣਵਾੜੀ ਵਰਕਰ ਮੀਨਾ ਰਾਣੀ ਮੁਤਾਬਕ ਸਵੇਰੇ 9.30 ਵਜੇ ਮੋਟਰਸਾਈਕਲ ’ਤੇ ਦੋ ਨੌਜਵਾਨ ਆਏ ਜਿਨ੍ਹਾਂ ਆਉਂਦਿਆਂ ਹੀ ਸ਼ਟਰ ਬੰਦ ਕਰ ਦਿੱਤੇ। ਉਸ ਦੀ ਸਹਾਇਕ ਸਰੋਜ ਅੰਦਰ ਕੰਮ ਕਰ ਰਹੀ ਸੀ। ਲੁਟੇਰਿਆਂ ਨੇ ਆਉਂਦਿਆਂ ਹੀ ਕਾਊਂਟਰ ’ਤੇ ਪਈ ਇੱਕ ਹਜ਼ਾਰ ਦੀ ਰਕਮ ਸਮੇਟ ਲਈ। ਦੂਜੇ ਸਾਥੀ ਨੇ ਚੌਲ ਦਾ ਥੈਲਾ ਤੇ ਕਣਕ ਦਾ ਥੈਲਾ ਮੋਟਰਸਾਈਕਲ ’ਤੇ ਰੱਖਿਆ ਤੇ ਫ਼ਰਾਰ ਹੋ ਗਏ। ਪੁਲੀਸ ਵਾਰਦਾਤ ਵਾਲੀ ਥਾਂ ਦੇ ਨਾਲ ਲੱਗਦੇ ਬਾਜ਼ਾਰਾਂ ਅਤੇ ਹੋਰਨਾਂ ਥਾਵਾਂ ਵਿੱਚ ਲੱਗੇ ਕੈਮਰਿਆਂ ਦੀ ਜਾਂਚ ਕਰ ਰਹੀ ਹੈ।
