ਨਾਨਟੇਰੇ (ਫਰਾਂਸ):
ਚੀਨ ਦੇ ਪਾਨ ਜ਼ਾਨਲੇ ਨੇ ਪੈਰਿਸ ਓਲੰਪਿਕ ਦੇ ਤੈਰਾਕੀ ਮੁਕਾਬਲੇ ਵਿੱਚ ਪੁਰਸ਼ਾਂ ਦੇ 100 ਮੀਟਰ ਫਰੀਸਟਾਇਲ ’ਚ 46.40 ਸਕਿੰਟਾਂ ਦਾ ਸਮਾਂ ਲੈ ਕੇ ਆਪਣੇ ਹੀ ਵਿਸ਼ਵ ਰਿਕਾਰਡ ਵਿੱਚ ਸੁਧਾਰ ਕਰਕੇ ਸੋਨ ਤਗ਼ਮਾ ਜਿੱਤਿਆ। ਪੈਰਿਸ ਓਲੰਪਿਕ ਤੈਰਾਕੀ ਮੁਕਾਬਲੇ ਪਿਛਲੇ ਚਾਰ ਦਿਨ ਤੋਂ ਚੱਲ ਰਹੇ ਹਨ ਪਰ ਇਸ ਤੋਂ ਪਹਿਲਾਂ ਕੋਈ ਵਿਸ਼ਵ ਰਿਕਾਰਡ ਨਹੀਂ ਬਣਿਆ ਸੀ। ਚੀਨ ਦਾ ਮੌਜੂਦਾ ਓਲੰਪਿਕ ਖੇਡਾਂ ਵਿੱਚ ਤੈਰਾਕੀ ’ਚ ਪਹਿਲਾਂ ਸੋਨ ਤਗ਼ਮਾ ਹੈ।
ਪਾਨ ਨੇ ਇਸ ਤੋਂ ਪਹਿਲਾਂ ਫਰਵਰੀ ਵਿੱਚ ਦੋਹਾ ’ਚ ਵਿਸ਼ਵ ਚੈਂਪੀਅਨਸ਼ਿਪ ਵਿੱਚ 46.80 ਸਕਿੰਟ ਦਾ ਸਮਾਂ ਲੈ ਕੇ ਵਿਸ਼ਵ ਰਿਕਾਰਡ ਬਣਾਇਆ ਸੀ। ਇਸ 19 ਸਾਲਾ ਖਿਡਾਰੀ ਨੇ ਬਾਅਦ ਵਿੱਚ ਕਿਹਾ, ‘‘ਇਹ ਸੱਚਮੁੱਚ ਜਾਦੂਈ ਪਲ ਹਨ। ਇਹ ਰਿਕਾਰਡ ਸਿਰਫ਼ ਚੀਨ ਦੀ ਟੀਮ ਲਈ ਨਹੀਂ, ਬਲਕਿ ਪੂਰੇ ਵਿਸ਼ਵ ਲਈ ਹੈ।’’ ਆਸਟਰੇਲੀਆ ਦੇ ਕਾਇਲ ਚਾਲਮਰਸ ਨੇ 47.48 ਸਕਿੰਟ ਦਾ ਸਮਾਂ ਲੈ ਕੇ ਚਾਂਦੀ ਅਤੇ ਰੋਮਾਨੀਆ ਦੇ ਡੇਵਿਡ ਪੋਪੋਵਿਸੀ ਨੇ 47.49 ਸਕਿੰਟ ਨਾਲ ਕਾਂਸੇ ਦਾ ਤਗ਼ਮਾ ਜਿੱਤਿਆ। -ਏਪੀ
