ਐਨਪੀ ਧਵਨ
ਪਠਾਨਕੋਟ, 27 ਮਾਰਚ
ਪਿੰਡ ਭੱਬਰ ਤੋਂ ਸ਼ਾਹਪੁਰਕੰਡੀ ਆ ਰਹੇ ਮੋਟਰਸਾਈਕਲ ਨੂੰ ਟਿੱਪਰ ਨੇ ਪਿੱਛੋਂ ਟੱਕਰ ਮਾਰ ਦਿੱਤੀ। ਇਸ ਹਾਦਸੇ ਕਾਰਨ ਮੋਟਰਸਾਈਕਲ ਸਵਾਰ ਦਾਦੀ ਦੀ ਮੌਤ ਹੋ ਗਈ ਤੇ ਉਸ ਦੀ ਪੋਤੀ ਜ਼ਖਮੀ ਹੋ ਗਈ। ਪੋਤੀ ਨੂੰ ਪ੍ਰਾਈਵੇਟ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਮ੍ਰਿਤਕ ਦਾਦੀ ਦੀ ਪਛਾਣ ਦਰਸ਼ਨਾ ਦੇਵੀ (60) ਵਾਸੀ ਪਿੰਡ ਭੱਬਰ ਵਜੋਂ ਹੋਈ ਹੈ ਤੇ ਜ਼ਖ਼ਮੀ ਪੋਤੀ ਦਾ ਨਾਂ ਪ੍ਰਿਆ (19) ਹੈ। ਮੋਟਰਸਾਈਕਲ ਨੂੰ ਚਲਾ ਰਿਹਾ ਵਿਅਕਤੀ ਵਾਲ-ਵਾਲ ਬਚ ਗਿਆ।
ਸ਼ਾਹਪੁਰਕੰਡੀ ਥਾਣੇ ਦੇ ਏਐੱਸਆਈ ਸੁੰਦਰ ਲਾਲ ਨੇ ਦੱਸਿਆ ਕਿ ਦਰਸ਼ਨਾ ਦੇਵੀ ਆਪਣੀ ਪੋਤੀ ਨਾਲ ਆਧਾਰ ਕਾਰਡ ਬਣਵਾਉਣ ਲਈ ਆਪਣੇ ਭਾਣਜੇ ਮਨਜੀਤ ਨਾਲ ਮੋਟਰਸਾਈਕਲ ’ਤੇ ਜਾ ਰਹੀ ਸੀ। ਜਦੋਂ ਮੋਟਰਸਾਈਕਲ ਟੂਟੀਕੁਆਲੀ ਦੇ ਮੋੜ ’ਤੇ ਪੁੱਜਿਆ ਤਾਂ ਪਿੱਛੋਂ ਆ ਰਹੇ ਟਿੱਪਰ ਨੇ ਮੋਟਰਸਾਈਕਲ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ। ਜਿਵੇਂ ਹੀ ਮੋਟਰਸਾਈਕਲ ਡਿੱਗਾ ਤਾਂ ਦਾਦੀ ਤੇ ਪੋਤੀ ਦੇ ਉਪਰੋਂ ਟਿੱਪਰ ਦੇ ਟਾਇਰ ਨਿਕਲ ਗਏ ਤੇ ਦਾਦੀ ਦਰਸ਼ਨਾ ਦੇਵੀ ਬੁਰੀ ਤਰ੍ਹਾਂ ਕੁਚਲੀ ਗਈ ਅਤੇ ਮੌਕੇ ’ਤੇ ਹੀ ਉਸ ਦੀ ਮੌਤ ਹੋ ਗਈ। ਪੋਤੀ ਦੀਆਂ ਲੱਤਾਂ ਟੁੱਟ ਗਈਆਂ ਹਨ।
ਪੁਲੀਸ ਨੇ ਟਿੱਪਰ ਚਾਲਕ ਖ਼ਿਲਾਫ਼ ਕੇਸ ਦਰਜ ਕਰਦਿਆਂ ਧਾਰਾ 304-ਏ ਤਹਿਤ ਕਾਰਵਾਈ ਕੀਤੀ ਹੈ।
ਹਾਦਸੇ ’ਚ ਫੌਜੀ ਹਲਾਕ
ਫਗਵਾੜਾ (ਜਸਬੀਰ ਸਿੰਘ ਚਾਨਾ): ਦਿੱਲੀ ਤੋਂ ਆ ਰਹੇ ਫ਼ੌਜੀ ਦੀ ਸੜਕ ਹਾਦਸੇ ’ਚ ਮੌਤ ਹੋ ਗਈ। ਮ੍ਰਿਤਕ ਦੀ ਪਛਾਣ ਪ੍ਰਵੀਨ ਸਿੰਘ ਪੁੱਤਰ ਬਲਵੰਤ ਵਾਸੀ ਸ਼ੇਰਪੁਰਬਾਲਾ ਵਜੋਂ ਹੋਈ ਹੈ। ਇੰਡਸਟਰੀਅਲ ਏਰੀਆ ਪੁਲੀਸ ਚੌਕੀ ਦੇ ਇੰਚਾਰਜ ਕੁਲਵੰਤ ਸਿੰਘ ਨੇ ਦੱਸਿਆ ਕਿ ਫ਼ੌਜੀ ਪਿੰਡ ਨੂੰ ਟੈਕਸੀ ਕਰਕੇ ਜਾ ਰਿਹਾ ਸੀ। ਜਦੋਂ ਉਹ ਜਮਾਲਪੁਰ ਲਾਗੇ ਪੁੱਜਾ ਤਾਂ ਕਾਰ ਦੀ ਟਰੱਕ ਨਾਲ ਟੱਕਰ ਹੋ ਗਈ ਜਿਸ ਕਾਰਨ ਫ਼ੌਜੀ ਦੀ ਮੌਤ ਹੋ ਗਈ ਤੇ ਡਰਾਈਵਰ ਜ਼ਖ਼ਮੀ ਹੋ ਗਿਆ।
