ਪੱਤਰ ਪ੍ਰੇਰਕ
ਅੰਮ੍ਰਿਤਸਰ,14 ਮਾਰਚ
ਅੰਮ੍ਰਿਤਸਰ ਨਗਰ ਨਿਗਮ ਦੇ ਕਮਿਸ਼ਨਰ ਹਰਪ੍ਰੀਤ ਸਿੰਘ ਨੇ ਅੱਜ ‘ਪਿੰਕ ਆਟੋ’ ਸਕੀਮ ਨੂੰ ਅਧਿਕਾਰਤ ਪ੍ਰਵਾਨਗੀ ਦੇ ਕੇ ਸ਼ਹਿਰ ਵਿੱਚ ਇੱਕ ਅਧਿਆਏ ਦੀ ਸ਼ੁਰੂਆਤ ਕੀਤੀ ਹੈ। ਪਿੰਕ ਆਟੋ ਸਕੀਮ ਦਾ ਉਦੇਸ਼ ਮਹਿਲਾ ਆਟੋ ਚਾਲਕਾਂ ਨੂੰ ਆਰਥਿਕ ਸ਼ਕਤੀ ਪ੍ਰਦਾਨ ਕਰਨ ਦੇ ਨਾਲ-ਨਾਲ ਸ਼ਹਿਰ ਨੂੰ ਵਧ ਰਹੇ ਪ੍ਰਦੂਸ਼ਣ ਤੋਂ ਮੁਕਤ ਕਰਨਾ ਵੀ ਹੈ।
ਯੂਐੱਸਏਆਈਡੀ, ਕੌਂਸਲ ਆਨ ਐਨਰਜੀ ਐਨਵਾਇਰਨਮੈਂਟ ਐਂਡ ਵਾਟਰ, ਏਐੱਸਈਆਰ ਅਤੇ ਕਲੀਨ ਏਅਰ ਪੰਜਾਬ ਸ਼ਹਿਰ ਵਿੱਚ ਕਲੀਨ ਏਅਰ ਬੈਟਰ ਹੈਲਥ ਪ੍ਰੋਗਰਾਮ ਲਈ ਲਗਾਤਾਰ ਸਹਿਯੋਗ ਕਰ ਰਹੇ ਹਨ ਅਤੇ ਇਸ ਸਬੰਧ ਵਿੱਚ ਹਾਲ ਹੀ ਵਿੱਚ ਕਲੀਨ ਏਅਰ ਪੰਜਾਬ ਨੇ ਕੇਂਦਰੀ ਆਵਾਸ ਤੇ ਸ਼ਹਿਰੀ ਉਸਾਰੀ ਮਾਮਲਿਆਂ ਬਾਰੇ ਮੰਤਰੀ ਹਰਦੀਪ ਸਿੰਘ ਪੁਰੀ ਨੂੰ ਪੱਤਰ ਲਿਖਿਆ ਹੈ। ਇਸ ਸਕੀਮ ਨੂੰ ਲਾਗੂ ਕਰਨ ਦੀ ਮੰਗ ਕੀਤੀ ਗਈ। ਇਸ ਪ੍ਰਸਤਾਵ ਨੂੰ ਉਦੋਂ ਹੋਰ ਬਲ ਮਿਲਿਆ ਜਦੋਂ ਸ਼ਹਿਰ ਦੀਆਂ 200 ਔਰਤਾਂ ‘ਪਿੰਕ ਆਟੋ’ ਪਹਿਲ ਲਈ ਅੱਗੇ ਆਈਆਂ। ਸਕੀਮ ਤਹਿਤ ਔਰਤਾਂ ਨੂੰ ਅੰਮ੍ਰਿਤਸਰ ਵਿੱਚ ਈ-ਆਟੋਜ਼ ’ਤੇ 90 ਫੀਸਦੀ ਛੋਟ ਦਿੱਤੀ ਜਾਵੇਗੀ।