ਸ਼ਗਨ ਕਟਾਰੀਆ
ਬਠਿੰਡਾ, 7 ਅਕਤੂਬਰ
ਬਠਿੰਡਾ ਦੇ ਬਲਵੰਤ ਗਾਰਗੀ ਓਪਨ ਏਅਰ ਥੀਏਟਰ ਵਿੱਚ ਚੱਲ ਰਹੇ 15 ਦਿਨਾਂ ਨਾਟਿਅਮ ਮੇਲੇ ਦੇ 7ਵੇਂ ਦਿਨ ਪੰਜਾਬ ਦੇ ਨਾਮਵਰ ਨਾਟਕਕਾਰ ਪਾਲੀ ਭੁਪਿੰਦਰ ਦੇ ਲਿਖੇ ਨਾਟਕ ਦਾ ਹਿੰਦੀ ਰੂਪਾਂਤਰਨ ‘ਵਿਚ ਕਲਰ ਡੂ ਯੂ ਲਾਈਕ?’ ਕਰਨ ਗੁਲਜ਼ਾਰ ਦੀ ਨਿਰਦੇਸ਼ਨਾ ਵਿੱਚ ‘ਯਾਤਰਾ ਥੀਏਟਰ ਚੰਡੀਗੜ੍ਹ’ ਦੀ ਟੀਮ ਵੱਲੋਂ ਪੇਸ਼ ਕੀਤਾ ਗਿਆ। ਨਾਟਕ ਵਿੱਚ ਪਾਤਰਾਂ ਵੱਲੋਂ ਵਿਸ਼ੇਸ਼ ਤਰੀਕੇ ਨਾਲ ਆਪਸੀ ਗੱਲਬਾਤ ਕਰਦਿਆਂ ਭਾਵਨਾਵਾਂ ਅਤੇ ਸੰਵੇਦਨਾਵਾਂ ਨੂੰ ਦਰਸਾਇਆ ਗਿਆ। ਸੀਮਤ ਪਾਤਰਾਂ ਵਾਲੇ ਇਸ ਨਾਟਕ ਰਾਹੀਂ ਮਰਦ-ਔਰਤ ਦੇ ਰਿਸ਼ਤਿਆਂ, ਵਿਆਹ, ਨੈਤਿਕ ਕਦਰਾਂ ਕੀਮਤਾਂ ਅਤੇ ਸਰੀਰਕ ਖਿੱਚ ਜਿਹੇ ਗੰਭੀਰ ਮੁੱਦਿਆਂ ’ਤੇ ਪਾਤਰਾਂ ਵੱਲੋਂ ਬੇਬਾਕੀ ਨਾਲ ਚਰਚਾ ਕੀਤੀ ਗਈ। ਨਾਟਕ ਮੇਲੇ ਦੇ 7ਵੇਂ ਦਿਨ ਪਹੁੰਚੇ ਖਾਸ ਮਹਿਮਾਨਾਂ ਵਿੱਚ ਬਠਿੰਡਾ ਦੇ ਐਡੀਸ਼ਨਲ ਡਿਪਟੀ ਕਮਿਸ਼ਨਰ ਪਰਮਵੀਰ ਸਿੰਘ, ਆਲ ਇੰਡੀਆ ਰੇਡੀਓ ਬਠਿੰਡਾ ਤੋਂ ਸਟੇਸ਼ਨ ਮੁਖੀ ਰਾਜੀਵ ਅਰੋੜਾ ਅਤੇ ਮੈਕਸ ਹਸਪਤਾਲ ਬਠਿੰਡਾ ਦੇ ਜਨਰਲ ਮੈਨੇਜਰ ਸੰਦੀਪ ਸਿੰਘ ਨੇ ਵਿਸ਼ੇਸ਼ ਹਾਜ਼ਰੀ ਲੁਆਈ। ਇਨ੍ਹਾਂ ਸ਼ਖ਼ਸੀਅਤਾਂ ਨੇ ਨਾਟਕ ਮੇਲੇ ਰਾਹੀਂ ਪੈਦਾ ਕੀਤੀ ਜਾ ਰਹੀ ਸਮਾਜਿਕ ਚੇਤਨਾ ਲਈ ਨਾਟਿਅਮ ਟੀਮ ਨੂੰ ਵਧਾਈ ਦਿੱਤੀ ਅਤੇ ਭਵਿੱਖ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ।
