ਚੰਡੀਗੜ੍ਹ (ਖ਼ੇਤਰੀ ਪ੍ਰਤੀਨਿਧ):
ਚੰਡੀਗੜ੍ਹ ਨਗਰ ਨਿਗਮ ਨੇ ਬਰਸਾਤਾਂ ਦੇ ਮੌਸਮ ਦੌਰਾਨ ਡੱਡੂ ਮਾਜਰਾ ਸੈਨੇਟਰੀ ਲੈਂਡਫਿਲ ਦੇ ਆਲੇ ਦੁਆਲੇ ਕੁੜੇ ਤੋਂ ਨਿਕਲਣ ਵਾਲੇ ਚਿੱਕੜ ਜਮ੍ਹਾਂ ਹੋਣ ਦੀ ਗੰਭੀਰ ਸਮੱਸਿਆ ਨੂੰ ਦੂਰ ਕਰਨ ਲਈ ਡਰੇਨ ਦੀ ਉਸਾਰੀ ਸ਼ੁਰੂ ਕਰ ਦਿੱਤੀ ਹੈ। ਸ਼ਹਿਰ ਦੇ ਮੇਅਰ ਕੁਲਦੀਪ ਕੁਮਾਰ ਨੇ ਡੰਪਿੰਗ ਗਰਾਊਂਡ ’ਚ ਡੱਡੂਮਾਜਰਾ ਕਲੋਨੀ ਦੀ ਚਾਰਦੀਵਾਰੀ ਦੇ ਨਾਲ-ਨਾਲ ਡਰੇਨ ਦੇ ਨਿਰਮਾਣ ਦਾ ਰਸਮੀ ਤੌਰ ਤੇ ਉਦਘਾਟਨ ਕੀਤਾ। ਇਸ ਪ੍ਰਾਜੈਕਟ ਬਾਰੇ ਜਾਣਕਾਰੀ ਸਾਂਝੀ ਕਰਦਿਆਂ ਮੇਅਰ ਕੁਲਦੀਪ ਕੁਮਾਰ ਨੇ ਦੱਸਿਆ ਕਿ 1.2 ਮੀਟਰ ਚੌੜਾਈ ਵਾਲੇ 1235 ਮੀਟਰ ਲੰਬੇ ਡਰੇਨ ਦਾ ਨਿਰਮਾਣ ਅਗਲੇ 6 ਮਹੀਨਿਆਂ ਵਿੱਚ ਪੂਰਾ ਕਰ ਲਿਆ ਜਾਵੇਗਾ ਅਤੇ ਇਸਦੇ ਨਿਰਮਾਣ ਤੇ ਲਗਪਗ 301.00 ਲੱਖ ਰੁਪਏ ਖਰਚ ਕੀਤਾ ਜਾ ਰਿਹਾ ਹੈ।