ਸਰਬਜੀਤ ਸਿੰਘ ਭੱਟੀ
ਲਾਲੜੂ, 4 ਅਪਰੈਲ
ਨਾਹਰ ਕੰਪਨੀ ਦੇ ਰਿਹਾਇਸ਼ੀ ਕੰਪਲੈਕਸ ਵਿੱਚ ਰਹਿੰਦੇ ਪਰਵਾਸੀ ਪਰਿਵਾਰ ਦਾ 15 ਸਾਲਾ ਲੜਕਾ ਜੋ 10ਵੀਂ ਜਮਾਤ ਵਿੱਚ ਪੜ੍ਹਦਾ ਹੈ, ਪਿਛਲੇ ਤਿੰਨ ਦਿਨਾਂ ਤੋਂ ਭੇਤਭਰੀ ਹਾਲਤ ’ਚ ਘਰ ਤੋਂ ਲਾਪਤਾ ਹੈ। ਮਾਪਿਆਂ ਨੇ ਉਸ ਦੀ ਗੁੰਮਸ਼ੁਦਗੀ ਦੀ ਰਿਪੋਰਟ ਪੁਲੀਸ ਨੂੰ ਦਰਜ ਕਰਵਾਈ ਹੈ।
ਲੜਕੇ ਦੇ ਪਿਤਾ ਰਾਜੇਸ਼ ਕੁਮਾਰ ਨੇ ਦੱਸਿਆ ਕਿ ਉਹ ਪਿਛਲੇ ਕਾਫੀ ਸਮੇਂ ਤੋਂ ਨਾਹਰ ਕੰਪਨੀ, ਲੈਹਲੀ ਵਿੱਚ ਕੰਮ ਕਰਦਾ ਹੈ ਅਤੇ ਮੂਲ ਰੂਪ ਵਿੱਚ ਯੂਪੀ ਦਾ ਰਹਿਣ ਵਾਲਾ ਹੈ, ਇਸ ਵੇਲੇ ਕੰਪਨੀ ਦੇ ਰਿਹਾਇਸ਼ੀ ਮਕਾਨਾਂ ਵਿੱਚ ਹੀ ਰਹਿ ਰਿਹਾ ਹੈ। ਉਸ ਦਾ 15 ਸਾਲਾ ਲੜਕਾ ਦਿਪਾਂਸ਼ੂ ਜੋ ਲਾਲੜੂ ਵਿੱਚ ਪ੍ਰਾਈਵੇਟ ਸਕੂਲ ਵਿੱਚ ਦਸਵੀਂ ਜਮਾਤ ਵਿੱਚ ਪੜ੍ਹਦਾ ਹੈ, ਦੋ ਅਪਰੈਲ ਨੂੰ ਸਵੇਰੇ 3 ਵਜੇ ਬਿਨਾਂ ਕੁੱਝ ਦੱਸੇ ਘਰ ਦੀ ਬਾਹਰੋਂ ਕੁੰਡੀ ਲਾ ਕੇ ਕਿਤੇ ਚਲਾ ਗਿਆ। ਉਨ੍ਹਾਂ ਉਸ ਦੀ ਆਪਣੇ ਪੱਧਰ ’ਤੇ ਕਾਫੀ ਭਾਲ ਕੀਤੀ, ਪਰ ਕੋਈ ਸੁਰਾਗ ਨਹੀਂ ਲੱਗਿਆ।
ਇਸ ਸਬੰਧੀ ਉਨ੍ਹਾਂ ਨੇ ਨਾਹਰ ਪੁਲੀਸ ਚੌਕੀ, ਲੈਹਲੀ ਵਿੱਚ ਗੁੰਮਸ਼ੁਦਗੀ ਦੀ ਰਿਪੋਰਟ ਲਿਖਵਾਈ ਹੈ। ਦਿਪਾਂਸ਼ੂ ਦੀ ਉਮਰ 15 ਸਾਲ, ਰੰਗ ਕਣਕਵੰਨਾ, ਕੱਦ 5 ਫੁੱਟ 2 ਇੰਚ, ਟੀ-ਸ਼ਰਟ ਤੇ ਲੋਅਰ ਅਤੇ ਪੈਰਾਂ ’ਚ ਹਵਾਈ ਚੱਪਲਾਂ ਹਨ, ਜੇਕਰ ਕਿਸੇ ਨੂੰ ਪਤਾ ਲੱਗਦਾ ਹੈ ਤਾਂ ਇਸ ਸਬੰਧੀ ਲਾਲੜੂ ਥਾਣੇ ਦੇ ਨੰਬਰ 9115516059, ਨਾਹਰ ਚੌਕੀ ਦੇ ਨੰਬਰ 9115516062 ਜਾਂ ਰਾਜੇਸ਼ ਕੁਮਾਰ ਦੇ ਨੰਬਰ 8360329091 ’ਤੇ ਸੂਚਨਾ ਦੇ ਸਕਦਾ ਹੈ।
