ਕਰਮਜੀਤ ਸਿੰਘ ਚਿੱਲਾ
ਬਨੂੜ, 13 ਜੁਲਾਈ
ਸਥਾਨਕ ਅਨਾਜ ਮੰਡੀ ਵਿੱਚ ਸਥਿਤ ਐਫ਼ਸੀਆਈ ਦੇ ਗੁਦਾਮਾਂ ਨੇੜਲੇ ਵਸਨੀਕਾਂ ਨੇ ਅੱਜ ਗੁਦਾਮਾਂ ਦੇ ਗੇਟ ਅੱਗੇ ਨਾਅਰੇਬਾਜ਼ੀ ਕੀਤੀ।ਲੋਕਾਂ ਨੇ ਚਿਤਾਵਨੀ ਦਿੱਤੀ ਕਿ ਜੇਕਰ ਇੱਕ ਹਫ਼ਤੇ ਦੇ ਦੌਰਾਨ ਸੁਸਰੀ ਨੂੰ ਕੰਟੋਰਲ ਕਰਨ ਲਈ ਐਫ਼ਸੀਆਈ ਨੇ ਕੋਈ ਠੋਸ ਉਪਰਾਲਾ ਨਾ ਕੀਤਾ ਤਾਂ ਉਹ ਆਪਣੇ ਪਰਿਵਾਰਾਂ ਸਮੇਤ ਐਫ਼ਸੀਆਈ ਦੇ ਗੁਦਾਮਾਂ ਦੇ ਗੇਟ ਦਾ ਘਿਰਾਓ ਕਰਨਗੇ।
ਪ੍ਰੇਮ ਸਿੰਘ ਘੜਾਮਾਂ, ਦੇਵਿੰਦਰ ਸਿੰਘ, ਕਰਤਾਰ ਸਿੰਘ, ਸੁਖਦੇਵ ਸਿੰਘ ਮੋਹੀ, ਜਤਿੰਦਰ ਸਿੰਘ, ਸਿਆਮ ਸਿੰਘ, ਗੁਰਦੇਵ ਸਿੰਘ, ਮਹਿੰਦਰ ਸਿੰਘ, ਬਲਦੇਵ ਸ਼ਰਮਾ ਆਦਿ ਨੇ ਆਖਿਆ ਕਿ ਗੁਦਾਮਾਂ ਦੇ ਨਾਲ ਲੱਗਦੇ ਵਾਰਡ ਨੰਬਰ 9, 10 ਅਤੇ ਵਾਰਡ 11 ਦੇ ਵਸਨੀਕਾਂ ਨੂੰ ਹਰ ਸਾਲ ਗੁਦਾਮਾਂ ਵਿੱਚੋਂ ਉਡ ਕੇ ਜਾਂਦੀ ਸੁਸਰੀ ਪ੍ਰੇਸ਼ਾਨ ਕਰਦੀ ਹੈ। ਵਾਰਡ ਵਾਸੀਆਂ ਨੇ ਦੱਸਿਆ ਕਿ ਸੁਸਰੀ ਦੀ ਰੋਕਥਾਮ ਲਈ ਉਹ ਐਫ਼ਸੀਆਈ ਦੇ ਹਰ ਛੋਟੇ-ਵੱਡੇ ਅਧਿਕਾਰੀ ਨੂੰ ਲਿਖਤੀ ਸ਼ਿਕਾਇਤ ਕਰ ਚੁੱਕੇ ਹਨ। ਉਨ੍ਹਾਂ ਕਿਹਾ ਕਿ ਸ਼ਹਿਰ ਦੀ ਸੰਘਣੀ ਆਬਾਦੀ ਵਾਲੇ ਖੇਤਰ ਵਿੱਚੋਂ ਗੁਦਾਮਾਂ ਨੂੰ ਬਾਹਰ ਕਢਾਉਣ ਲਈ ਉਹ ਹਾਈ ਕੋਰਟ ਵਿੱਚ ਪਟੀਸ਼ਨ ਵੀ ਦਾਇਰ ਕਰਨਗੇ। ਉਨ੍ਹਾਂ ਮੁਹਾਲੀ ਦੇ ਡਿਪਟੀ ਕਮਿਸ਼ਨਰ ਤੋਂ ਸਾਰੇ ਮਾਮਲੇ ਵਿੱਚ ਦਖਲ ਦੀ ਮੰਗ ਕਰਦਿਆਂ ਸੁਸਰੀ ਤੋਂ ਛੁਟਕਾਰਾ ਦਿਵਾਉਣ ਦੀ ਮੰਗ ਕੀਤੀ।
