ਪੱਤਰ ਪ੍ਰੇਰਕ
ਕੁਰਾਲੀ, 28 ਅਗਸਤ
ਪੰਜਾਬ ਫੁਟਬਾਲ ਐਸੋਸੀਏਸ਼ਨ ਵਲੋਂ ਕਰਵਾਈ ਜਾ ਰਹੀ ਪੰਜਾਬ ਫੁਟਬਾਲ ਸੁਪਰ ਲੀਗ ਦਾ ਅਹਿਮ ਮੈਚ ਸਥਾਨਕ ਸਿੰਘਪੁਰਾ ਰੋਡ ਦੇ ਖੇਡ ਸਟੇਡੀਅਮ ਵਿਖੇ ਕਰਵਾਇਆ ਗਿਆ। ਜ਼ਿਲ੍ਹਾ ਫੁਟਬਾਲ ਐਸੋਸੀਏਸ਼ਨ ਦੀ ਦੇਖਰੇਖ ਹੇਠ ਕਰਵਾਏ ਗਏ ਇਸ ਮੈਚ ਵਿੱਚ ਦੋਆਬਾ ਯੂਨਾਈਟਿਡ ਫੁਟਬਾਲ ਕਲੱਬ ਆਦਮਪੁਰ ਨੇ ਖਾਲਸਾ ਵਾਰੀਅਰਜ਼ ਫੁਟਬਾਲ ਕਲੱਬ ਕੁਰਾਲੀ ਦੀ ਟੀਮ ਨੂੰ ਮਾਤ ਦਿੱਤੀ। ਸੁਰਜੀਤ ਸਿੰਘ ਅਤੇ ਸਪਿੰਦਰ ਸਿੰਘ ਦੀ ਅਗਵਾਈ ਵਿੱਚ ਹੋਏ ਇਸ ਮੈਚ ਦਾ ਉਦਘਾਟਨ ਪੰਜਾਬ ਫੁਟਬਾਲ ਐਸੋਸੀਏਸ਼ਨ ਦੇ ਸਕੱਤਰ ਹਰਜਿੰਦਰ ਸਿੰਘ ਨੇ ਕੀਤੇ ਜਦਕਿ ਗੁਰਮੇਲ ਸਿੰਘ ਇਸ ਮੌਕੇ ਵਿਸ਼ੇਸ਼ ਮਹਿਮਾਨ ਵਜੋਂ ਹਾਜ਼ਰ ਹੋਏ। ਉਨ੍ਹਾਂ ਖਿਡਾਰੀਆਂ ਨਾਲ ਜਾਣ-ਪਛਾਣ ਕੀਤੀ। ਇਸ ਮੌਕੇ ਮੇਜ਼ਬਾਨ ਖਾਲਸਾ ਵਾਰੀਅਰਜ਼ ਅਤੇ ਦੋਆਬਾ ਆਦਮਪੁਰ ਕਲੱਬ ਦੀਆਂ ਟੀਮਾਂ ਵਿਚਕਾਰ ਖੇਡਿਆ ਮੈਚ ਸੰਘਰਸ਼ ਭਰਪੂਰ ਰਿਹਾ। ਅਖ਼ੀਰ ਵਿੱਚ ਆਦਮਪੁਰ ਕਲੱਬ ਦੀ ਟੀਮ ਨੇ ਮੇਜ਼ਬਾਨ ਖਾਲਸਾ ਵਾਰੀਅਰਜ਼ ਨੂੰ 3-1 ਦੇ ਫ਼ਰਕ ਨਾਲ ਹਰਾ ਦਿੱਤਾ ਅਤੇ ਆਪਣੇ ਖਾਤੇ ਵਿੱਚ ਦੋ ਅੰਕ ਜੋੜੇ। ਇਸ ਮੌਕੇ ਸਪਿੰਦਰ ਸਿੰਘ ਨੇ ਦੱਸਿਆ ਕਿ 36ਵੀਂ ਪੰਜਾਬ ਫੁਟਬਾਲ ਸੁਪਰ ਲੀਗ ਦੇ ਮੈਚ ਪੰਜਾਬ ਦੀਆਂ ਵੱਖ ਵੱਖ ਥਾਵਾਂ ’ਤੇ ਕਰਵਾਏ ਜਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਹਰ ਟੀਮ 14 ਮੈਚ ਖੇਡੇਗੀ ਅਤੇ ਅੰਕਾਂ ਦੇ ਆਧਾਰ ’ਤੇ ਵਧੀਆ ਕਾਰਗੁਜ਼ਾਰੀ ਵਾਲੀਆਂ ਟੀਮਾਂ ਲੀਗ ਦੇ ਅਗਲੇ ਗੇੜ ਵਿੱਚ ਪੁੱਜਣਗੀਆਂ।
