ਲੈਫਟੀਨੈਂਟ ਦੀ ਟਰੇਨਿੰਗ ਕਰਕੇ ਪਰਤੇ ਨੌਜਵਾਨ ਦਾ ਸਵਾਗਤ

ਲਾਲੜੂ: ਸਿੱਧੇ ਲੈਫਟੀਨੈਂਟ ਭਰਤੀ ਹੋਏ ਯਤਿਨ ਨਾਸਾ ਦਾ ਅੱਜ ਇੱਕ ਸਾਲ ਦੀ ਟਰੇਨਿੰਗ ਪੂਰੀ ਕਰਕੇ ਲਾਲੜੂ ਪੁੱਜਣ ’ਤੇ ਭਰਵਾਂ ਸੁਆਗਤ ਕੀਤਾ ਗਿਆ। ਜ਼ਿਕਰਯੋਗ ਹੈ ਕਿ ਯਤਿਨ ਨਾਸਾ ਨੇ ਜੈਗ (ਜੱਜ ਐਡਵੋਕੇਟ ਜਨਰਲ) ਪ੍ਰੀਖਿਆ ’ਚੋਂ ਪ੍ਰੀਖਿਆ ’ਚ ਦੇਸ਼ ਅੰਦਰ ਚੌਥਾ ਸਥਾਨ ਪ੍ਰਾਪਤ ਕੀਤਾ ਸੀ ਅਤੇ ਉਹ ਪਿਛਲੇ ਇਕ ਸਾਲ ਤੋਂ ਚੇਨੱਈ ਵਿੱਚ ਬਤੌਰ ਲੈਫਟੀਨੈਂਟ ਦੀ ਟਰੇਨਿੰਗ ਲੈ ਰਿਹਾ ਸੀ, ਜਿਥੇ ਉਸ ਨੇ ਕਮਿਸ਼ਨ ਪ੍ਰਾਪਤ ਕੀਤਾ। ਅੱਜ ਲਾਲੜੂ ਪੁੱਜਣ ’ਤੇ ਬਹਾਵਲਪੁਰੀ ਭਾਈਚਾਰੇ ਸਮੇਤ ਵੱਖ-ਵੱਖ ਸਮਾਜਸੇਵੀ, ਸਿਆਸੀ ਤੇ ਧਾਰਮਿਕ ਸੰਸਥਾਵਾਂ ਨੇ ਯਤਿਨ ਦਾ ਸਵਾਗਤ ਅਤੇ ਬਹਾਵਲਪੁਰੀ ਭਵਨ ’ਚ ਸਨਮਾਨ ਕੀਤਾ। ਬੁਲਾਰਿਆਂ ਨੇ ਕਿਹਾ ਕਿ ਯਤਿਨ ਨਾਸਾ ਨੇ ਸ਼ਹਿਰ ਤੇ ਜ਼ਿਲ੍ਹੇ ਦਾ ਨਾਂ ਰੌਸ਼ਨ ਕੀਤਾ ਹੈ। ਇਸ ਮੌਕੇ ਯਤਿਨ ਦੇ ਪਿਤਾ ਵੇਦ ਪ੍ਰਕਾਸ਼ ਨਾਸਾ ਅਤੇ ਮਾਤਾ ਪ੍ਰਿਆ, ਬਹਾਵਲਪੁਰ ਬਰਾਦਰੀ ਦੇ ਚੇਅਰਮੇਨ ਕੰਵਲ ਨੈਨ, ਪ੍ਰਧਾਨ ਘਨਸ਼ਿਆਮ ਦਾਸ ਕਟਾਰੀਆ ਚੱਠਾ, ਵਾਈਸ ਚੇਅਰਮੇਨ ਹਰੀਸ਼ ਮਦਾਨ ਆਦਿ ਮੌਜੂਦ ਸਨ। -ਪੱਤਰ ਪ੍ਰੇਰਕ