ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 21 ਜੁਲਾਈ
ਇੱਥੇ ਅੱਜ ਮੀਂਹ ਪੈਣ ਕਾਰਨ ਕੌਮੀ ਰਾਜਧਾਨੀ ਖੇਤਰ (ਐੱਨਸੀਆਰ) ਵਿੱਚ ਨੀਵੀਆਂ ਥਾਵਾਂ ’ਤੇ ਮੀਂਹ ਦਾ ਪਾਣੀ ਭਰ ਗਿਆ ਤੇ ਲੋਕਾਂ ਲਈ ਮੁਸੀਬਤ ਬਣੀ ਰਹੀ। ਇੰਦਰਾ ਗਾਂਧੀ ਕੌਮਾਂਤਰੀ ਹਵਾਈ ਅੱਡੇ ਨੂੰ ਜਾਂਦੇ ਅੰਡਰਗਰਾਊਂਡ ਰਾਹ ਵਾਲੀ ਸੁਰੰਗ ਵਿੱਚ ਪਾਣੀ ਭਰ ਗਿਆ। ਇਸ ਕਾਰਨ ਦੋ ਪਹੀਆ ਵਾਹਨ ਚਾਲਕਾਂ ਨੂੰ ਪ੍ਰੇਸ਼ਾਨੀ ਝੱਲਣੀ ਪਈ। ਇਸੇ ਤਰ੍ਹਾਂ ਇੱਕ ਬੱਸ ਦੇ ਖਰਾਬ ਹੋਣ ਮਗਰੋਂ ਆਈਟੀਓ ਤੇ ਅਕਸ਼ਰਧਾਮ ਮੰਦਰ ਨੇੜੇ ਬੱਸਾਂ, ਕਾਰਾਂ ਤੇ ਹੋਰ ਗੱਡੀਆਂ ਦੀਆਂ ਲੰਮੀਆਂ ਕਤਾਰਾਂ ਲੱਗ ਗਈਆਂ।
ਦਿੱਲੀ ਟ੍ਰੈਫਿਕ ਪੁਲੀਸ ਵੱਲੋਂ ਦਿੱਲੀ ਵਾਸੀਆਂ ਨੂੰ ਸਲਾਹ ਦਿੱਤੀ ਗਈ ਕਿ ਉਹ ਟ੍ਰੈਫਿਕ ਸਲਾਹਨਾਮੇ ਮੁਤਾਬਕ ਚੱਲਣ ਅਤੇ ਟਵਿੱਟਰ ਉਪਰ ਪਾਣੀ ਭਰਨ ਕਾਰਨ ਲੱਗੇ ਜਾਮ ਬਾਰੇ ਜਾਣਕਾਰੀ ਦਿੱਤੀ। ਮੀਂਹ ਕਾਰਨ ਨਵੀਂ ਰੋਹਤਕ ਰੋਡ ’ਤੇ ਆਨੰਦ ਪਰਬਤ ਤੋਂ ਜ਼ਖੀਰਾ ਵੱਲ ਜਾਣ ਵਾਲੇ ਕੈਰੇਜਵੇਅ ’ਤੇ ਪਾਣੀ ਭਰ ਜਾਣ ਕਾਰਨ ਗਲੀ ਨੰ. 10, ਆਨੰਦ ਪਰਬਤ ਆਵਾਜਾਈ ਪ੍ਰਭਾਵਿਤ ਹੋਈ। ਜ਼ਿਕਰਯੋਗ ਹੈ ਕਿ ਬੁੱਧਵਾਰ ਨੂੰ ਵੀ ਦਿੱਲੀ ਅਤੇ ਰਾਸ਼ਟਰੀ ਰਾਜਧਾਨੀ ਖੇਤਰ ਦੇ ਕਈ ਹਿੱਸਿਆਂ ਵਿੱਚ ਭਾਰੀ ਮੀਂਹ ਪਿਆ ਸੀ। ਅੱਜ ਵੀ ਦਿੱਲੀ-ਐੱਨਸੀਆਰ ਵਿੱਚ ਭਾਰੀ ਮੀਂਹ ਕਾਰਨ ਆਵਾਜਾਈ ਪ੍ਰਭਾਵਿਤ ਹੋਈ ਅਤੇ ਸ਼ਹਿਰ ਦੇ ਕਈ ਹਿੱਸਿਆਂ ਵਿੱਚ ਘੰਟਿਆਂ ਤੱਕ ਵਾਹਨ ਫਸੇ ਰਹੇ। ਇਸ ਤੋਂ ਇਲਾਵਾ ਸ਼ਹਿਰ ਦੇ ਸਰਹੱਦੀ ਖੇਤਰਾਂ ਜਿਵੇਂ ਕਿ ਦਿੱਲੀ-ਨੋਇਡਾ ਬਾਰਡਰ, ਚਿੱਲਾ ਬਾਰਡਰ ਤੇ ਦਿੱਲੀ-ਗੁਰੂਗ੍ਰਾਮ ਰੋਡ ’ਤੇ ਵੀ ਭਾਰੀ ਜਾਮ ਕਾਰਨ ਆਵਾਜਾਈ ਠੱਪ ਹੋਈ। ਟਵਿੱਟਰ ’ਤੇ ਲੈ ਕੇ, ਦਿੱਲੀ ਟ੍ਰੈਫਿਕ ਪੁਲੀਸ ਨੇ ਦੱਸਿਆ ਕਿ ਧੌਲਾ ਕੁਆਂ ਤੋਂ ਗੁੜਗਾਓਂ ਵੱਲ ਜਾਣ ਵਾਲੇ ਦੋਵੇਂ ਕੈਰੇਜਵੇਅ ’ਤੇ ਅਤੇ ਜੀਜੀਆਰ/ਪੀਜੀਆਰ ਨੇੜੇ ਪਾਣੀ ਭਰਨ ਕਾਰਨ ਆਵਾਜਾਈ ਪ੍ਰਭਾਵਿਤ ਹੋਈ ਹੈ। ਯੂਸਫ਼ ਸਰਾਏ ਮਾਰਕੀਟ ਨੇੜੇ ਇੱਕ ਬੱਸ ਦੇ ਖਰਾਬ ਹੋਣ ਕਾਰਨ ਅਲੀਮਸ ਤੋਂ ਆਈਆਈਟੀ ਤੱਕ ਕੈਰੇਜਵੇਅ ਵਿੱਚ ਵੀ ਆਵਾਜਾਈ ਪ੍ਰਭਾਵਿਤ ਹੋਈ। ਨਜ਼ਫਗੜ੍ਹ ਫਿਰਨੀ ਰੋਡ ’ਤੇ ਢਾਂਸਾ ਸਟੈਂਡ ਅਤੇ ਬਹਾਦਰਗੜ੍ਹ ਸਟੈਂਡ ਨੇੜੇ ਪਾਣੀ ਭਰ ਜਾਣ ਕਾਰਨ ਆਵਾਜਾਈ ਪ੍ਰਭਾਵਿਤ ਹੋਈ ਤੇ ਸਾਰਾ ਦਿਨ ਵਾਹਨਾਂ ਦੀਆਂ ਲੰਮੀਆਂ ਕਤਾਰਾਂ ਲੱਗੀਆਂ ਰਹੀਆਂ। ਯੂਸਫ ਸਰਾਏ ਮਾਰਕੀਟ ਨੇੜੇ ਬੱਸ ਦੇ ਖਰਾਬ ਹੋਣ ਕਾਰਨ ਅਲੀਮਸ ਤੋਂ ਆਈਆਈਟੀ ਤੱਕ ਕੈਰੇਜਵੇਅ ਵਿੱਚ, ਰੰਗਪੁਰੀ ਚੌਕ ’ਤੇ ਪਾਣੀ ਭਰਨ ਕਾਰਨ ਤੇ ਮਹੀਪਾਲਪੁਰ ਚੌਕ ’ਤੇ ਪਾਣੀ ਭਰਨ ਕਾਰਨ ਆਵਾਜਾਈ ਪ੍ਰਭਾਵਿਤ। ਧੌਲਾ ਕੂੰਆਂ ਫਲਾਈਓਵਰ ਦੇ ਹੇਠਾਂ ਪਾਣੀ ਭਰ ਜਾਣ ਕਾਰਨ ਨਰੈਣਾ ਤੋਂ ਮੋਤੀ ਬਾਗ ਤੱਕ ਕੈਰੇਜਵੇਅ ਅਤੇ ਇਸ ਦੇ ਉਲਟ ਰਿੰਗ ਰੋਡ ’ਤੇ ਆਵਾਜਾਈ ਉਪਰ ਅਸਰ ਪਿਆ।
